1. Twagĩrĩirũo gũcokagĩria Jehova ngatho nĩkĩ?

HATARĨ nganja, nĩ twagĩrĩirũo gũcokagĩria Jehova ngatho tondũ nĩwe Mũheani wa “kĩheo o gĩothe kĩrĩa kĩagĩrĩire.” (Jak. 1:​17) Arĩ Mũrĩithi witũ ũrĩ wendo, nĩ arũmbũyagia biũ mabataro maitũ mothe ma kĩĩmwĩrĩ na ma kĩĩroho. (Thab. 23:​1-3) Akoretwo arĩ ‘mũrahĩro na hinya witũ’ makĩria hĩndĩ ya mĩnyamaro! (Thab. 46:1) Ma nĩ atĩ, tũrĩ na itũmi nyingĩ cia gwĩtĩkania biũ na ciugo ici cia mwandĩki wa Thaburi: “Goocai Jehova! Ĩ gĩcokeriei Jehova Ngatho, tondũ nĩ mwega; tondũ ũtugi wake nĩ wa tene na tene.”​—Thab. 106:1.

2, 3. (a) Moimĩrĩro mangĩkorũo marĩ marĩkũ tũngĩagĩra kĩene irathimo iria tũrĩ nacio? (b) Nĩ ciũria irĩkũ tũkwarĩrĩria gĩcunjĩ-inĩ gĩkĩ?

² Nĩkĩ harĩ bata gwĩciria ũhoro wĩgiĩ gũcokia ngatho? O ta ũrĩa kwarathĩtwo, matukũ-inĩ maya ma kũrigĩrĩria andũ nĩ mathiĩte makĩagaga ngatho. (2 Tim. 3:2) Andũ aingĩ o na mationaga maũndũ mega marĩa Jehova amekĩire. Nĩ ũndũ wa kũgucĩrĩrio nĩ thĩ ĩno yendete mũno indo cia kĩĩmwĩrĩ o hamwe na imenyithia iria irĩ kuo cia biacara, andũ milioni nyingĩ marerutanĩria mũno kũgĩa na indo nyingĩ makĩria handũ ha kũiganwo nĩ kĩrĩa marĩ nakĩo. O na ithuĩ no tũthũkio nĩ roho ũcio wa kwaga ngatho. O ta Aisiraeli a tene, no twage ngatho na twagĩre kĩene ũkuruhanu wa goro ũrĩa tũrĩ naguo  na Jehova, o hamwe na irathimo iria atũheete.​—Thab. 106:​7, 11-13.

³ Ningĩ, ta wĩcirie ũrĩa kũngĩthiĩ tũngĩcemania na magerio maritũ. Mahinda-inĩ ta macio, nĩ ũndũ mũhũthũ gũkua ngoro mũno nginya twage kuona ũrĩa Jehova atũrathimĩte. (Thab. 116:3) Gũkĩrĩ ũguo-rĩ, tũngĩhota atĩa gũkũria na gũtũũria ngoro ĩrĩ na ngatho? Na nĩ kĩĩ kĩrĩtũteithagia gũikara tũrĩ na mawoni marĩa magĩrĩire o na rĩrĩa twacemania na magerio maritũ? Rekei tuone.

4. Tũngĩka atĩa nĩguo tũthiĩ na mbere gũkorũo na ngoro ĩrĩ na ngatho?

⁴ Angĩkorũo nĩ tũgũkũria na tũthiĩ na mbere gũkorũo na ngoro ĩrĩ na ngatho, no mũhaka tuonage ũrĩa Jehova atũrathimĩte, na twĩcũranagie ũrĩa irathimo icio ironania wendo mũnene wa Jehova gũtwerekera. Rĩrĩa mwandĩki wa Thaburi eekire ũguo, nĩ aagegirio mũno nĩ maũndũ maingĩ ma magegania marĩa Jehova aamwĩkĩire.​—Thoma Thaburi 40:5; 107:43.

5. Tũngĩĩruta atĩa kuumana na mũtũmwo Paulo igũrũ rĩgiĩ gũkũria ngoro ĩrĩ na ngatho?

⁵ No twĩrute ũrĩa tũngĩkũria ngoro ĩrĩ na ngatho kwerekera Jehova kuumana na kĩonereria kĩa mũtũmwo Paulo. Hatarĩ nganja, nĩ eecũranagia mũno igũrũ rĩgiĩ irathimo iria aarĩ nacio tondũ kaingĩ nĩ aacokagĩria Jehova ngatho kuuma ngoro. Paulo nĩ aamenyaga wega atĩ kũrĩ hĩndĩ aarĩ “mũrumi Ngai, na mũnyarirani, o na ndũrĩka.” Nĩ ũndũ ũcio, nĩ aacokagia ngatho nĩ ũndũ wa kũmenya atĩ o na gũtuĩka mbere-inĩ aarĩ mũndũ mwaganu, Ngai na Kristo nĩ maamũiguĩrĩire tha na makĩmwĩhokera ũtungata. (Thoma 1 Timotheo 1:​12-14.) Ningĩ Paulo nĩ aakenagio mũno nĩ Akristiano arĩa angĩ, na maita maingĩ nĩ aacokagĩria Jehova ngatho nĩ ũndũ wa ngumo ciao njega na ũtungata wao wa wĩhokeku. (Afil. 1:​3-5, 7; 1 Thes. 1:​2, 3) Na rĩrĩa aacemania na magerio, nĩ aahiũhaga gũcokeria Jehova ngatho nĩ ũndũ wa ũteithio wa ihinda rĩrĩa rĩagĩrĩire ũrĩa aaheagwo nĩ aarĩ na ariũ a Ithe witũ. (Atũm. 28:15; 2 Kor. 7:​5-7) Ũndũ ũcio no ũgĩtũteithie gũtaũkĩrũo kĩrĩa gĩtũmaga Paulo eekĩre Akristiano ngoro ‘monanagie ngatho na mekĩranage hinya na thaburi, makĩgoocaga Ngai, na nyĩmbo cia kĩĩroho iria ciinagwo na ngatho.’​—Kol. 3:​15-​17, NW.

6. Nĩ ũndũ ũrĩkũ ũtũmaga wee ũcokerie Jehova ngatho?

⁶ Tũngĩĩgerekania atĩa na kĩonereria kĩega kĩa Paulo harĩ gũkũria na gũthiĩ na mbere kuonania ngatho? O ta Paulo, tũkũbatara gwĩcũrania maũndũ marĩa Jehova atwĩkĩire tũrĩ mũndũ ũmwe ũmwe. (Thab. 116:12) Kwa ngerekano-rĩ, ũngĩcokia atĩa ũngĩũrio kĩũria gĩkĩ: ‘Nĩ maũndũ marĩkũ Jehova akũrathimĩte namo matũmaga ũmũcokerie ngatho?’ Hihi no ũririkane kũgweta ũkuruhanu waku wa goro mũno hamwe na Jehova? Kana ũrĩa Jehova akuohagĩra mehia nĩ ũndũ wa wĩtĩkio waku harĩ igongona rĩa ũkũũri rĩa Kristo? Hihi no ũririkane kũgweta marĩĩtwa ma aarĩ na ariũ a Ithe witũ arĩa managũtiirĩrĩra hĩndĩ ya magerio? Ma nĩ atĩ, ndũngĩriganĩrũo nĩ kũgweta mũndũ ũrĩa mũhikanĩtie nake kana ciana ciaku tondũ nĩ ũmendete. Kũhũthĩra mahinda maku gwĩcũrania ũhoro wa irathimo ta icio njega ũguo ciumĩte kũrĩ Jehova Ithe witũ ũrĩ wendo, nĩ kũrĩgũteithagia gũkũria ngoro ĩrĩ na ngatho mũno, na nĩ kũrĩgũtindĩkaga gũcokia ngatho o mũthenya.​—Thoma Thaburi 92:​1, 2.

7. (a) Twagĩrĩirũo kũhoya mahoya ma gũcokia ngatho nĩkĩ? (b) Ũrĩgunĩkaga atĩa nĩ ũndũ wa gũcokeria Jehova ngatho mahoya-inĩ maku?

⁷ Twecũrania biũ ũhoro wa irathimo iria tũrĩ nacio, nĩ tũrĩiguaga tũkĩenda kũhoya Jehova na kũmũcokeria ngatho. (Thab. 95:2; 100:​4, 5) Andũ aingĩ monaga mahoya ĩrĩ njĩra tu ya kwĩra Ngai amahingĩrie maũndũ  matiganĩte. Ĩndĩ, ithuĩ nĩ tũmenyaga atĩ Jehova nĩ akenaga rĩrĩa tũramũcokeria ngatho nĩ ũndũ wa maũndũ marĩa atwĩkĩire. Bibilia nĩ ĩkoragwo na mahoya maingĩ ma gũcokia ngatho. Mamwe mamo nĩ marĩa maahoirũo nĩ Hana na Hezekia. (1 Sam. 2: 1-10; Isa. 38:​9-​20) Kwoguo, wĩgerekanagie na ndungata icio njĩhokeku iria cionanirie ngatho. Rĩrĩa ũrahoya, cokagĩria Jehova ngatho nĩ ũndũ wa irathimo iria ũrĩ nacio. (1 Thes. 5:​17, 18) Weka ũguo nĩ ũrĩgunĩkaga mũno. Ngoro yaku nĩ ĩrĩkoragwo na gĩkeno, wendo waku harĩ Jehova nĩ ũrĩongererekaga, na nĩ ũrĩmũkuhagĩrĩria mũno.​—Jak. 4:8.

8. Nĩ kĩĩ kĩngĩtũma twambĩrĩrie kũnyarara maũndũ marĩa Jehova atwĩkĩire?

⁸ Twagĩrĩirũo kwĩmenyerera mũno nĩkĩ tũtikanaagĩre kĩene maũndũ mega marĩa Jehova atwĩkĩire? Nĩ ũndũ wa kwaga gũkinyanĩra nĩ tũkoragwo na mwerekera wa kwaga ngatho. Ta wĩcirie ũndũ ũyũ: Aciari aitũ a mbere Adamu na Hawa, maaigĩtwo thĩinĩ wa paradiso mũgũnda-inĩ wa Edeni. Nĩ maahingagĩrio mabataro mao mothe, na maarĩ na kĩĩrĩgĩrĩro gĩa gũtũũra tene na tene marĩ na thayũ. (Kĩam. 1:​28) O na kũrĩ ũguo, matiigana kuonania ngatho nĩ ũndũ wa irathimo icio. Nĩ ũndũ wa ũkoroku, meerirĩirie maũndũ mangĩ makĩrĩte marĩa maahetwo. Nĩ ũndũ ũcio, makĩũrũo nĩ inya makinyĩrĩte inyanya. (Kĩam. 3:​6, 7, 17-​19) O na ithuĩ, nĩ ũndũ wa gũkorũo tũthiũrũrũkĩirio nĩ andũ matarĩ ngatho, no twambĩrĩrie kũnyarara maũndũ marĩa Jehova atwĩkĩire. O na no twambĩrĩrie kũhũthia ũrata witũ nake. Twahota kuona gĩtĩo kĩrĩa tũrĩ nakĩo gĩa gũkorũo tũrĩ thĩinĩ wa ũrũmwe wa thĩ yothe wa aarĩ na ariũ a Ithe witũ gĩtarĩ kĩa bata mũno. Ningĩ nĩ ũndũ mũhũthũ kũrikĩra maũndũ-inĩ ma thĩ ĩno ĩrĩa ĩkiriĩ kũniinwo. (1 Joh. 2:​15-​17) Nĩguo twĩtheme kũgũa mũtego-inĩ ũcio, tũkũbatara gwĩcũrania irathimo nyingĩ iria tũrĩ nacio, na tũcokagĩrie Jehova ngatho kaingĩ nĩ ũndũ wa gĩtĩo gĩa gũkorũo tũrĩ andũ ake.​​—Thoma Thaburi 27:4.

9. Rĩrĩa twacemania na magerio maritũ-rĩ, nĩkĩ nĩ twagĩrĩirũo gwĩcũrania irathimo iria tũrĩ nacio?

⁹ Gũkorũo na ngoro ĩrĩ na ngatho no gũtũteithie kũhiũrania na magerio maritũ. No tũigue tũritũhĩirũo mũno tũngĩcemania o rĩmwe na maũndũ marahutia mũno ũtũũro witũ, ta wagi wa wĩhokeku wa mũndũ ũrĩa tũhikanĩtie nake, mũrimũ mũnene, gũkuĩrũo nĩ mũndũ twendete, kana moimĩrĩro moru ma gĩcanjama kĩa ndũire. Mahinda-inĩ ta macio, gwĩcũrania ũhoro wa irathimo iria tũrĩ nacio nĩ kũrĩtũmagĩrĩria na gũgatwĩkĩra hinya. Ta wĩcirie ũhoro wa maũndũ maya monetwo.

10. Irina agunĩkĩte atĩa nĩ ũndũ wa gwĩcũrania irathimo iria arĩ nacio?

 ¹⁰ Painia ũmwe wĩtagwo Irina, * kuuma Amerika ya Rũgongo, aahikĩtio nĩ mũthuri wa kĩũngano. Mũthuri ũcio nĩ aacokire akĩaga wĩhokeku kĩhiko-inĩ kĩao na agĩtiganĩria Irina hamwe na ciana ciao. Nĩ kĩĩ gĩteithĩtie mwarĩ wa Ithe witũ ũcio athiĩ na mbere gũtungatĩra Jehova arĩ mwĩhokeku? Oigire ũũ: “Nĩ njokagia ngatho mũno nĩ ũndũ wa ũrĩa Jehova aanũmbũyagia. Nĩ ũndũ wa gwĩcũrania kaingĩ irathimo iria ngoragwo nacio, nyonaga kĩrĩ gĩtĩo kĩnene kũmenywo na kwendwo nĩ Ithe witũ wa igũrũ ũrĩa ũtũgitagĩra. Nĩ menyaga atĩ yuraga ĩkĩaga gũtirĩ hingo akandiganĩria.” O na gũtuĩka Irina nĩ acemanĩtie na maũndũ maingĩ maritũ ũtũũro-inĩ wake-rĩ, gũkorũo arĩ na ngoro ĩrĩ na gĩkeno nĩ kũmũteithĩtie gũkirĩrĩria na gwĩkĩra andũ arĩa angĩ ngoro.

11. Nĩ kĩĩ gĩteithĩtie Kyung-sook kũhiũrania na mũrimũ mũnene?

¹¹ Mwarĩ wa Ithe witũ Kyung-sook, ũrĩa ũikaraga Asia maatungatire na mũthuri wake marĩ mapainia makĩria ma mĩaka 20. Mũthenya ũmwe thutha wa gũthimwo nĩ onekire atĩ aarĩ na kansa ya mahũri na akĩrũo atĩ angĩakuire thutha wa mĩeri ĩtatũ nginya ĩtandatũ. O na gũtuĩka Kyung-sook na mũthuri wake nĩ macemanĩtie na magerio maingĩ, manini na mangĩ manene, hingo ciothe nĩ mahotaga kũhiũrania na ndwari yao. Kyung-sook oigire ũũ: “Mũrimũ ũcio nĩ watũmire hahũke mũno. Ndonire ta ũtũũro wakwa wothe wathũka, na ngĩigua guoya mũno.” Nĩ kĩĩ gĩteithĩtie mwarĩ wa Ithe witũ ũcio ahiũranie na thĩna ũcio? Oigire ũũ: “O mũthenya o mũthenya itanathiĩ toro, nyambaga gũthiĩ igũrũ rĩa nyũmba itũ ngahoya Jehova na kayũ kanene nĩ ũndũ wa maũndũ matano marĩa ngeneire mũthenya ũcio. Ũndũ ũcio ũtũmaga njookwo nĩ hinya, na ngahota gũcokeria Jehova ngatho nĩ ũndũ wa kũmwenda.” Kyung-sook ateithĩkĩte atĩa nĩ mahoya macio ahoyaga atanathiĩ toro? Oigire ũũ: “Nĩ menyete atĩ Jehova nĩ atũtiiragĩrĩra hĩndĩ ya magerio, na atĩ ũtũũro-inĩ witũ irathimo nĩcio ikoragwo irĩ nyingĩ gũkĩra magerio.”

12. Nĩ kĩĩ kĩomĩrĩirie Jason thutha wa gũkuĩrũo nĩ mũtumia wake?

¹² Mũrũ wa Ithe witũ Jason, ũrĩa ũtungataga wabici-inĩ ĩmwe ya rũhonge thĩinĩ wa Afrika, akoretwo ũtungata-inĩ wa hĩndĩ-ciothe makĩria ma mĩaka 30. Oigire ũũ: “Mĩaka mũgwanja mĩhĩtũku nĩ ndakuĩrĩirũo nĩ mũtumia wakwa, na ũndũ ũcio nĩ ũtũmaga ngorũo na ruo rũnene. Gwĩciria mũno ũhoro wa thĩna ũrĩa aarĩ naguo akĩrũa na mũrimũ wa kansa nĩ kũnjũragaga ngoro mũno.” Nĩ kĩĩ gĩteithĩtie Jason ahote kũhiũrania na thĩna ũcio? Oigire ũũ: “Kũrĩ hĩndĩ ndaririkanire mahinda mega marĩa twakoragwo namo hamwe na mũtumia wakwa, na ngĩcokeria Jehova ngatho mahoya-inĩ nĩ ũndũ wa mahinda macio. Ũndũ ũcio nĩ watũmire njigue ndagĩa na thayũ wa meciria, na thutha ũcio ngĩambĩrĩria gũcokagĩria Jehova ngatho hingo ciothe nĩ ũndũ wa maũndũ ta macio mega ma tene. Gũkorũo na ngoro ĩrĩ na ngatho nĩ gũcenjetie mũno muonere wakwa wa maũndũ. No njiguaga ruo nĩ ũndũ wa gũkuĩrũo, ĩndĩ gũcokeria Jehova ngatho nĩ ũndũ wa ũrĩa twarĩ na kĩhiko kĩega na nĩ ũndũ wa gĩtĩo gĩa kũmũtungatĩra hamwe na mũndũ wamwendete mũno, nĩ kwagagĩrĩtie muonere wakwa wa maũndũ.”

13. Nĩ kĩĩ gĩteithĩtie Sheryl ahote gũkirĩrĩria thutha wa gũkuĩrũo nĩ hakuhĩ andũ othe a famĩlĩ yao?

¹³ Mũico-inĩ wa mwaka wa 2013, nĩ kwagĩire na kĩhuhũkanio kĩnene gĩetagwo Haiyan bũrũri-inĩ wa Philippines. Mwarĩ wa Ithe witũ Sheryl ũrĩa hĩndĩ ĩyo warĩ na mĩaka 13, orirũo nĩ hakuhĩ indo ciake ciothe. Oigire ũũ: “Ndorirũo nĩ mũciĩ witũ na ngĩũrũo nĩ hakuhĩ andũ othe a famĩlĩ itũ.” Ithe, nyina, na ciana ciao ithatũ, maakuire hĩndĩ ya kĩhuhũkanio kĩu. Nĩ kĩĩ gĩteithĩtie Sheryl ahiũranie na gĩcanjama kĩu ategũkua ngoro mũno? Nĩ gũkorũo na ngoro ya gũcokia ngatho na gũikara akĩririkanaga irathimo iria aarĩ nacio. Oigire ũũ: “Nĩ ndeyoneire maũndũ marĩa mothe aarĩ na  ariũ a Ithe witũ meekire nĩguo mateithie na momĩrĩrie arĩa maabataraga ũteithio. Nĩ ndaamenyaga atĩ aarĩ na ariũ a Ithe witũ thĩinĩ wa thĩ yothe nĩ maahoyagĩra.” Aathire na mbere kuuga ũũ: “Nĩ njokagia ngatho mũno nĩ ũndũ wa gũkorũo Jehova arĩ Ngai wakwa. Hĩndĩ ciothe atũheaga indo iria tũrabatara.” Ma nĩ atĩ, tuonania ngatho nĩ ũndũ wa irathimo iria tũrĩ nacio, nĩ tũrĩĩthemaga gũtoorio nĩ kĩeha. Gũkorũo na ngoro ĩrĩ na ngatho nĩ kũrĩtũteithagia kũũmĩrĩria moritũ o mothe marĩa tũngĩcemania namo.​—Ef. 5:​20; thoma Afilipi 4:​6, 7.

14. Nĩ kĩĩrĩgĩrĩro kĩrĩkũ kĩa magegania twetereire? (Rora mbica kĩambĩrĩria-inĩ gĩa gĩcunjĩ gĩkĩ.)

¹⁴ Kuuma o hĩndĩ ya tene, andũ a Jehova nĩ moonanagia atĩ nĩ makenagĩra irathimo ciao. Kwa ngerekano, thutha wa Aisiraeli kũhonokio kuuma kũrĩ Firauni na mbũtũ ciake Iria-inĩ Itune, nĩ moonanirie gĩkeno kĩao na njĩra ya kũina nyĩmbo cia kũgooca na gũcokia ngatho. (Tham. 15:​1-​21) Kĩmwe kĩa irathimo iria tuonaga irĩ cia goro mũno ũmũthĩ, nĩ kĩĩrĩgĩrĩro gitũ kĩa ma gĩa kũhonokio kuuma kũrĩ maũndũ marĩa mothe matũrehagĩra ruo na mĩnyamaro. (Thab. 37:​9-​11; Isa. 25:8; 33:24) Ta hũũra mbica ũrĩa tũgaakena rĩrĩa Jehova akamemenda thũ ciake ciothe na acoke atũingĩrie thĩinĩ wa thĩ njerũ ĩiyũrĩtwo nĩ thayũ na ũthingu. Na githĩ ũcio ndũgaakorũo ũrĩ mũthenya wa gũcokia ngatho mũno!​​—Kũg. 20:​1-3; 21:​3, 4.

15. Ũtuĩte itua rĩa gwĩka atĩa mwaka-inĩ ũyũ wothe wa 2015?

¹⁵ Nĩ tũratanya kwamũkĩra irathimo nyingĩ cia kĩĩroho kuuma kũrĩ Jehova mwaka ũyũ wa 2015. O na kũrĩ ũguo, no kũhoteke tũcemanie na magerio. Ĩndĩ, nĩ tũĩ atĩ o ũrĩa wothe kũngĩthiĩ, gũtirĩ hingo Jehova agaatũtiganĩria. (Gũcok. 31:8; Thab. 9:​9, 10) Nĩ arĩtũheaga kĩrĩa gĩothe tũrabatara nĩguo tũhotage kũmũtungatĩra tũrĩ ehokeku. Nĩ ũndũ ũcio, rekei tũtue itua rĩa gũthiĩ na mbere kuonania mwerekera ta ũrĩa warĩ na mũnabii Habakuku, ũrĩa woigire ũũ: “O na mũkũyũ ũngĩtuĩka ndũkũruta kĩro, o na kana mĩthabibũ ĩciare maciaro; naguo wĩra ũrĩa ũrutĩirũo mũtamaiyũ wage uumithio, nayo mĩgũnda yage gũciara irio ciayo; ningĩ rũũru rũa mbũri rũninwo, kiugũ gĩtigwo ũtheri, o nacio ciugũ cia ng’ombe ciage ng’ombe irĩ kuo; o na kũngĩtuĩka nĩ ũguo-rĩ, niĩ no gũkena ngakenera Jehova, njanjamũke ngoro nĩ ũndũ wa Ngai wa ũhonokio wakwa.” (Hab. 3:​17, 18) Mwaka-inĩ ũyũ wothe, rekei tũthiĩ na mbere gwĩcũrania tũrĩ na gĩkeno irathimo iria tũrĩ nacio, na nĩ ũndũ ũcio tũtindĩkwo kũrũmĩrĩra ũtaaro ũrĩa ũrĩ thĩinĩ wa rĩandĩko ritũ rĩa mwaka wa 2015: ‘Cokeriai Jehova ngatho, tondũ nĩ mwega.’​—Thab. 106:1.