MĨAKA mĩnini mĩhĩtũku, Cesar na mũtumia wake Rocio maarĩ na mũtũũrĩre mwega mũno thĩinĩ wa California. Cesar aarutaga wĩra wa mahinda mothe kĩganda-inĩ gĩa gũthondeka indo ta air conditioner, heater, na indo ingĩ ta icio. Nake Rocio aarutaga wĩra ũtarĩ wa hĩndĩ ciothe thibitarĩ-inĩ ĩmwe. Maarĩ na nyũmba yao na matiarĩ na ciana. O na kũrĩ ũguo, kũrĩ ũndũ watũmire magarũrĩre ũtũũro wao. Nĩ ũndũ ũrĩkũ ũcio?

Kũrĩ Oktomba 2009, wabici ya rũhonge ya Amerika nĩ yatũmĩire ciũngano ciothe cia bũrũri ũcio marũa, marĩa moorĩtie arĩa marĩ na ũbundi wa mũthemba mũna maiyũrie bomu ya kũruta wĩra Betheli kwa ihinda nĩguo mateithĩrĩrie harĩ kwararamia wabici ya Wallkill, New York. O na arĩa makĩrĩtie mĩaka ya gwĩtwo Betheli nĩ moorĩtio maiyũrie bomu. Cesar na Rocio mooigire ũũ: “Twarora mĩaka itũ nĩ twonire atĩ no kũhoteke tũtikagĩa na mweke ũngĩ wa gũtungata Betheli. Nĩ ũndũ ũcio tũtingĩetĩkĩrire o na hanini mweke ũcio ũrĩre thĩ!” Matekũrĩa marĩgu, Cesar na Rocio makĩiyũria bomu cia Betheli na magĩcitũma.

Cesar na Rocio maaikarire makĩria ma mwaka ũmwe matetĩtwo Betheli. O na kũrĩ ũguo, maathire o na mbere kũhũthahũthia ũtũũro nĩguo makinyĩre muoroto wao. Mooigire ũũ: “Twathondekire ngaranji ĩgĩtuĩka nyũmba ya gũikara, nĩguo tũkomborithie mũndũ ũngĩ nyũmba itũ. Tũgĩthaama nyũmba itũ twendete mũno ĩrĩa yarĩ ya rumu mũgwanja na twamĩikarĩte o mĩaka mĩnini tu, tũkĩingĩra ĩyo twathondekire.” Cesar oigire ũũ: “Gwĩka mogarũrũku macio nĩ gwatũteithirie gũikara twĩhaarĩirie gũthiĩ gũtungata Betheli tũngĩetirũo.” Gwacokire gũgĩthiĩ atĩa? Rocio oigire ũũ: “Mweri ũmwe thutha wa gũthaamĩra nyũmba ĩyo, nĩ twanyitire marũa ma gũtwĩta tũthiĩ tũgatungate Betheli ya Wallkill kwa ihinda. Ũndũ ũcio watũteithirie kuona wega atĩ rĩrĩa twahũthirie mũtũũrĩre witũ, Jehova nĩ aagĩire na gĩtũmi gĩa gũtũrathima.”

O ta Cesar na Rocio, aarĩ na ariũ a Ithe witũ aingĩ nĩ meimĩte nĩguo magĩe na itemi wĩra-inĩ wa mwako  ũrĩa ũrathiĩ na mbere thĩinĩ wa New York State. Amwe ao mararuta wĩra wa kwandandũra wabici ya Wallkill, nao angĩ aingĩ maraaka wabici nene ya Aira a Jehova kũũrĩa Warwick. * Famĩlĩ nyingĩ nĩ itigĩte nyũmba njega, mawĩra mega, na indo ingĩ, nĩguo ithiĩ igatungatĩre Jehova na gĩkĩro kĩnene. Hihi Jehova nĩ arathimĩte roho ũcio wa kwĩima? Hatarĩ nganja, nĩ ekĩte ũguo!

Kwa ngerekano Way, ũrĩa ũkoragwo arĩ bundi wa thitima, na Debra, arĩa marĩ hakuhĩ gũkinyia mĩaka 60, nĩ meendirie nyũmba yao na indo nyingĩ ciao itũũra-inĩ rĩa Kansas, na magĩthaamĩra Wallkill nĩguo mathiage gũtungata Betheli rĩmwe na rĩmwe. * O na gũtuĩka nĩ maabatarire gwĩka mogarũrũku ũtũũro-inĩ wao, nĩ meyoneire atĩ roho wao wa kwĩima nĩ ũrathimĩtwo. Akĩaria ũhoro wa wĩra ũrĩa arutaga Betheli, Debra oigaga ũũ: “Rĩmwe nyonaga ta ndĩraruta wĩra mĩako-inĩ ĩrĩa tuonaga thĩinĩ wa mbica cia Paradiso iria ikoragwo mabuku-inĩ maitũ!”

Melvin na Sharon kuuma South Carolina meendirie nyũmba na indo ciao nĩguo mathiĩ magateithĩrĩrie mwako thĩinĩ wa Warwick. O na gũtuĩka ndwarĩ ũndũ mũhũthũ gwĩka mogarũrũku macio, monaga kĩrĩ gĩtĩo kĩnene gũkorũo na itemi wĩra-inĩ ũcio ũrĩa ũgũtũũra ũririkanagwo. Moigire ũũ: “Gĩkeno kĩrĩa kiumanaga na kũmenya atĩ ũrahingia ũndũ ũrĩgunaga aarĩ na ariũ a Ithe witũ thĩinĩ wa thĩ yothe nĩ kĩnene mũno.”

Kenneth, ũrĩa warutaga wĩra wa mĩako tene agĩcoka akĩritaya, na Maureen, arĩa rĩu marĩ na mĩaka mĩrongo ĩtano na kĩndũ, nĩ maathamire California nĩguo magateithĩrĩrie wĩra mwako-inĩ wa Warwick. Nĩguo mahote gũthaama, nĩ maabangire na mwarĩ wa Ithe witũ ũmwe kĩũngano-inĩ kĩao amaramatagĩre mũciĩ wao, na magĩcoka makĩaria na andũ a famĩlĩ yao nĩguo mamateithie kũrũmbũiya ithe wa Ken tondũ nĩ mũkũrũ. Hihi nĩ meriraga nĩ ũndũ wa kwĩima magatungate Betheli? Aca! Ken oigire ũũ: “Nĩ tũkenaga mũno. No hihi nĩ kuuga atĩ tũticemanagia na moritũ? Moritũ no tũcemanagia namo, ĩndĩ tũkoragwo na ũtũũro ũrĩ na irathimo nyingĩ mũno, na no twĩkĩre andũ angĩ ngoro maingĩre thĩinĩ wa ũtungata ũyũ.”

Andũ aingĩ arĩa mahotete kwĩrutĩra na njĩra icio nĩ harĩ moritũ maabatarire gũtooria. Kwa ngerekano, William na Sandra, arĩa rĩu marĩ na kĩndũ mĩaka 60, maaikaraga ũtũũro mwega mũno itũũra-inĩ rĩa Pennsylvania. Maarĩ na kambuni njega mũno ya gũthondeka macini na maandĩkĩte andũ 17. Ningĩ maatũũrĩte kĩũngano-inĩ kĩmwe kuuma marĩ ciana na andũ aingĩ a famĩlĩ ciao maaikaraga o kũu. Nĩ  ũndũ ũcio, rĩrĩa mweke woimĩrire wa gũthiĩ gũtungata Wallkill, nĩ maamenyire atĩ nĩguo mathiĩ no mũhaka mangĩatigire hakuhĩ andũ na indo ciothe iria maamenyerete. William oigire ũũ: “Hatarĩ nganja, ũritũ ũrĩa warĩ mũnene harĩ ithuĩ, warĩ gũtiga ũtũũro mwega ũrĩa twarĩ naguo.” O na kũrĩ ũguo, thutha wa kũhoya mũno, mũthuri ũcio na mũtumia wake nĩ maatuire itua rĩa gũthaama, na matiĩriraga. William aacokire kuuga ũũ: “Gĩkeno gĩa kũruta wĩra Betheli na kũrutithania wĩra na famĩlĩ ya Betheli gĩtingĩringithanio na kĩndũ kĩngĩ. Tũrĩ na Sandra, tũrĩ na gĩkeno kĩnene gũkĩra kĩrĩa twarĩ nakĩo hau kabere!”

Ricky, ũrĩa warĩ menenja wa kambuni ĩmwe ya mĩako Hawaii, nĩ eetirũo athiage gũteithĩrĩria wĩra wa mwako Warwick. Mũtumia wake Kendra, nĩ eendaga Ricky etĩkĩre mathiĩ. O na kũrĩ ũguo, nĩ meeciragia mũno ũrĩa ũndũ ũcio ũngĩahutirie Jacob, kamwana kao ka mĩaka 11. Nĩ maariragwo kana warĩ ũndũ wa ũũgĩ gũthaamĩra New York State na kana hihi Jacob nĩ angĩahotire kũmenyera ũtũũro wa kũndũ kwerũ.

Ricky oigire ũũ: “Ũndũ wa mbere ũrĩa tweciririe, nĩ gũcaria kĩũngano kĩrĩ na andũ ethĩ na a kĩĩroho tondũ twendaga Jacob akorũo na arata aingĩ ega.” O na kũrĩ ũguo, kĩũngano kĩrĩa maathire, gĩtiarĩ na ciana nyingĩ ĩndĩ nĩ kĩarĩ na andũ maigana ũna a Betheli. Ricky oigire ũũ: “Thutha wa gũthiĩ mĩcemanio riita rĩa mbere, nĩ ndoririe Jacob mawoni make igũrũ rĩgiĩ kĩũngano kĩu kĩerũ. Ũndũ ũmwe watũmire ndĩmũũrie nĩ tondũ gũtiarĩ na mwana o na ũmwe wa riika rĩake. Aanjĩrire ũũ: ‘Tiga kũmaka Baba. Ariũ a Ithe witũ acio ethĩ a Betheli nĩo megũtuĩka arata akwa.’”

Ma nĩ atĩ, ariũ acio a Ithe witũ a Betheli nĩ matuĩkĩte arata a Jacob. Ũndũ ũcio ũmũteithĩtie atĩa? Ricky oigire ũũ: “Mũthenya ũmwe nĩ ndahĩtũkĩire hakuhĩ na rumu ya Jacob ũtukũ, ngĩkora atahoretie thitima. Ndeciragia ngũkora agĩthaka mĩthako ya kompiuta, ĩndĩ aathomaga Bibilia. Rĩrĩa ndaamũririe ũrĩa areka, aanjĩrire ũũ: ‘O na niĩ ndĩ wa Betheli, na ndĩrenda gũthoma Bibilia na mwaka ũmwe.’” Ũrĩa kũrĩ nĩ atĩ, Ricky na Kendra matikenaga tu nĩ kuona atĩ Ricky nĩ araruta wĩra wa gwaka thĩinĩ wa Warwick, ĩndĩ nĩ nginya kuona atĩ gũthaamĩra kũu nĩ kũratũma mwana wao akũre kĩĩroho.​—Thim. 22:6.

Macũngĩrĩro-inĩ wĩra wa mwako Wallkill na Warwick nĩ ũrĩkinya mũico, kwoguo arĩa meetirũo magateithĩrĩrie nĩ moĩ atĩ ũtungata wao wa Betheli nĩ ũrĩthira. Hihi aarĩ na ariũ a Ithe witũ acio nĩ matangĩkaga mũno magĩciria kũrĩa magaathiĩ kana ũrĩa mageeka? Aca! Aingĩ ao makoragwo na mwerekera ta wa  athuri erĩ na atumia ao kuuma Florida arĩa marĩ mĩaka-inĩ ya 50. John, ũrĩa ũkoragwo arĩ menenja wa mĩako, na mũtumia wake Carmen, arĩa maratungata kwa ihinda Warwick mooigire ũũ: “Nĩ tuonete ũrĩa Jehova arũmbũyĩtie mabataro maitũ gũkinyĩria rĩu. Ũrĩa tũĩ nĩ atĩ Jehova ndatũrehete gũkũ agaacoka gũtũtiganĩria mahinda marĩa maroka.” (Thab. 119:116) Luis, ũrĩa ũrutaga wĩra wa gũthondeka macini cia kũhoria mwaki, na mũtumia wake Quenia, maratungata Wallkill. Moigaga ũũ: “Nĩ tuonete guoko kwa Jehova gũgĩtũhe indo iria tũbataraga cia kĩĩmwĩrĩ. O na gũtuĩka tũtiũĩ nĩ na njĩra ĩrĩkũ, nĩrĩ, kana nĩkũ, tũrĩ na ma atĩ nĩ egũthiĩ na mbere gũtũhe mabataro maitũ.”​​—Thab. 34:10; 37:25.

Andũ aingĩ arĩa makoretwo magĩteithĩrĩria wĩra wa mwako thĩinĩ wa New York, korũo nĩ meendire nĩ mangĩarutire ciĩgwatio cia kwaga kwĩrutĩra. O na kũrĩ ũguo, maatuire itua rĩa kũgeria Jehova o ta ũrĩa ithuothe atwĩraga twĩke: “Mũndorie ũguo muone ũrĩa o na niĩ ngwĩka, muone kana ndingĩmũhingũrĩra ndirica cia igũrũ, ndĩmũikũrũkĩrie kĩrathimo kĩingĩ, o nginya mwage handũ kĩngĩiganĩra nĩ ũndũ wa ũrĩa kĩingĩhĩte.”​—Mal. 3:​10.

Hihi wee nĩ ũkũgeria Jehova nĩguo wĩgĩĩre na irathimo ciake nyingĩ? Thuthuria na njĩra ya mahoya ũrĩa ũngĩka nĩguo ũgĩe na itemi wĩra-inĩ ũyũ wa bata mũno, wa gũteithĩrĩria gwaka thĩinĩ wa New York kana mĩako-inĩ ĩngĩ ĩkonainie na Ũthamaki, na nĩ ũkwĩyonera irathimo cia Jehova.​—Mar. 10:​29, 30.

Injinia ũmwe wa mĩako wĩtagwo Dale, na mũtumia wake Cathy, kuuma Alabama, arĩa meerutĩire gũtungata Wallkill, nĩ magathagĩrĩria mũno ũtungata ũyũ. Moigaga ũũ: “Ũngĩgĩa na ũmĩrĩru wa kwĩima, no ũgĩe na mweke wa kwĩyonera roho wa Jehova ũgĩgũtongoria.” Nĩ kĩĩ kĩbataranagia nĩguo mũndũ ahote kwĩrutĩra? Dale oigire ũũ: “Hũthahũthia mũtũũrĩre waku na ndũrĩ hĩndĩ ũkerira!” Gary, kuuma North Carolina, arutĩte wĩra wa kũrũgamĩrĩra mĩako kwa ihinda rĩa mĩaka 30. Marĩ na mũtumia wake Maureen, moigaga atĩ kĩrathimo kĩmwe kĩrĩa marakenera Warwick nĩ “gũcemania na kũrutithania wĩra na aarĩ na ariũ a Ithe witũ aingĩ arĩa mahũthĩrĩte ũtũũro wao gũtungatĩra Jehova Betheli.” Gary aacokire akiuga ũũ: “Nĩguo ũhote gũtungata Betheli, ũkũbatara gũikara ũtũũro mũhũthũ, na ũcio nĩguo ũtũũro ũrĩa mwega mũno thĩinĩ wa mũtabarĩre ũyũ.” Jason, ũrĩa warutaga wĩra wa thitima, na mũtumia wake Jennifer, kuuma Illinois, moigaga atĩ kũruta wĩra wa Betheli mwako-inĩ wa Wallkill nĩ “ũmwe wa maũndũ marĩa makuhĩrĩirie mũno ũtũũro ũrĩa tũgaakorũo naguo thĩinĩ wa thĩ njerũ.” Jennifer aacokire akiuga ũũ: “Nĩ ũndũ ũrehaga gĩkeno kĩnene kũmenya atĩ wĩra ũrĩa wothe ũraruta nĩ ũrakenia Jehova, na nĩ wĩra wa gũtũũra. Jehova atigagĩrĩra atĩ akũrathima na irathimo itangĩgereka.”