Kũringana na Joshua 6:10-15, 20, mbũtũ ya Isiraeli yathiũrũrũkire Jeriko mĩthenya ĩtandatũ o mũthenya riita rĩmwe. Mũthenya wa mũgwanja yathiũrũrũkire itũũra rĩu maita mũgwanja, nake Ngai agĩtũma thingo nene mũno cia itũũra rĩu igũe. Ũndũ ũcio nĩ wahotithirie Aisiraeli kũingĩra itũũra-inĩ rĩu na makĩrĩtooria. Hihi nĩ kũrĩ ũira o wothe wa indo cia tene ũngĩnyita mbaru ũrĩa Bibilia yugaga atĩ itũũra rĩu rĩarigicĩirio o thikũ nini rĩkĩgwa?

Mahinda-inĩ macio ma tene, thigari nĩ ingĩarigicĩirie itũũra rĩirige na thingo nene, nĩguo irĩtunyane. Thigari ingĩarigicĩirie itũũra matukũ maingĩ andũ a itũũra rĩu maarĩaga mũthithũ wothe wa irio makaniina. Thutha wa kũgũithia itũũra rĩu andũ meetahagĩra indo ciothe o hamwe na irio iria cingĩakorirũo itigarĩte. Thĩinĩ wa matigari ma itũũra rĩa Jeriko, athuthuria arĩa mathikũragia indo cia tene nĩ maakorire irio nyingĩ mũno. Ibuku rĩmwe rĩĩtagwo Biblical Archaeology Review, rĩkĩaria ũhoro ũcio, riugaga ũũ: ‘Makĩria ma indo cia rĩũmba iria ciathikũririo matigari-inĩ macio, kĩrĩa kĩarĩ kĩingĩ mũno nĩ irio. Ũcio nĩ ũndũ wa mwanya mũno harĩ indo iria cianathikũrio matigari-inĩ ma matũũra thĩinĩ wa Palestina. Andũ no mathikũrie kĩbaba kĩmwe kana igĩrĩ cia irio no gũthikũria irio nyingĩ ũguo warĩ ũndũ wa mwanya mũno.’

Bibilia yonanagia atĩ Aisiraeli nĩ meerĩtwo nĩ Jehova matigetahĩre irio iria ciarĩ itũũra-inĩ rĩa Jeriko. (Josh. 6:17, 18) Aisiraeli maatharĩkĩire Jeriko ihinda inini mũno thutha wa magetha na nĩ ũndũ ũcio kwarĩ na mũthithũ mũnene mũno wa irio. (Josh. 3:15-17; 5:10) Thutha wa itũũra rĩu kũgũa gwakorirũo kũrĩ na mũthithũ mũnene mũno wa irio. Ũcio nĩ ũira mũiganu wa kuonania atĩ itũũra rĩu rĩarigicĩirio o thikũ nini o ta ũrĩa Bibilia yugaga.