Mbaara Ya Hari–Magedoni Ĩgooka Rĩ?

“Ngĩrora, ngĩona atĩrĩ, gwĩ kĩrĩndĩ kĩingĩ mũno, gĩtangĩgereka nĩ mũndũ, kĩa andũ moimĩte ndũrĩrĩ-inĩ ciothe, na marĩ a mĩhĩrĩga yothe na nduka ciothe o na mĩario yothe . . . moimĩte mĩnyamaro-inĩ ĩrĩa mĩnene.”​—KŨGUŨRĨRIO 7:9, 14.

MBAARA ya Hari–Magedoni rĩu ĩrĩ hakuhĩ gũtuthũka. Nĩkĩ?

Thĩinĩ wa thĩ yothe kũrĩ na andũ maratungatĩra Jehova marĩ na ũrũmwe na magatũũra kũringana na ithimi ciake cia igũrũ cia ũthingu. Nĩ ũndũ wa irathimo cia Ngai andũ milioni nyingĩ kuuma mabũrũri-inĩ mothe, ndũrĩrĩ, na thiomi nĩ maracokanĩrĩrio magathondeka ũrũmwe ũrĩ na wendo wa aarĩ na ariũ a Ithe witũ. Ũrũmwe ũcio wonekaga gatagatĩ-inĩ ka Aira a Jehova.—Johana 13:35.

Ica ikuhĩ Shaitani nĩ ekũrũrũnganithia mbũtũ yake atharĩkĩre na njĩra nene makĩria andũ acio makoragwo na thayũ na monagwo ta matarĩ na ũgitĩri. (Ezekieli 38:8-12; Kũguũrĩrio 16:13, 14, 16) Ũngĩkorũo na ma atĩa na ũndũ ũcio? Bibilia nĩ ĩtaaragĩria cara rũkũ maũndũ marĩa magaatũteithia kũmenya rĩrĩa mbaara ya Hari–Magedoni ĩgooka. Maingĩ ma maũndũ marĩa yonanagia nĩ marahinga.

Maũndũ Ũreyonera Makĩhinga

Arutwo a Jesu nĩ maamũririe ũrĩa andũ mangĩkaamenya rĩrĩa “ithirĩro rĩa mahinda maya” rĩgaakinya. (Mathayo 24:3) Jesu aamerire ũhoro wa ihinda rĩrĩa “rũrĩrĩ o rũrĩrĩ rũgokĩrĩra rũrĩa rũngĩ, na o ũthamaki ũũkĩrĩre ũrĩa ũngĩ: na gũkagĩa na ng’aragu na ithingithia cia thĩ kũndũ kũingĩ.” Agĩcoka akĩmeera ũũ: “Namo maũndũ macio mothe no kĩambĩrĩria ta kĩa ruo ta rũa kũrũmwo.” (Mathayo 24:7, 8) Mũtũmwo Paulo akĩaria ũhoro wa ihinda rĩu aarĩtire “matukũ marĩa ma kũrigĩrĩria,” na akiuga atĩ matukũ macio mangĩgaakorũo marĩ “mahinda ma ũgwati.” (2 Timotheo 3:1) Hihi wee nĩ ũrona morathi macio ta marataarĩria ũhoro wa maũndũ marĩa marahanĩka ũmũthĩ?

 Mahinda macio mangĩgaakorũo marĩ maritũ mũno nĩkĩ? Mũtũmwo Johana nĩ aaheanĩte gĩtũmi. Aarathire atĩ Shaitani na ndaimono ciake nĩ mangĩgaakorũo na “ihinda inyinyi” rĩa kũruta wĩra wao gũkũ thĩ. Ihinda-inĩ rĩu Shaitani ataarĩirio arĩ na “marũrũ manene.” (Kũguũrĩrio 12:7-12) Hihi nĩ wonete atĩ kũrĩ na roho wa mang’ũrĩka na ũhinyagatagatĩ-inĩ ka andũ ũmũthĩ, na ti kũndũ kũmwe no nĩ thĩinĩ wa thĩ yothe?

Ningĩ Jesu nĩ oigire atĩ ihinda-inĩ rĩu rĩa moritũ manene, nĩ kũrĩ wĩra wa bata mũno ũgaakorũo ũkĩhingio. “Naguo Ũhoro-ũyũ-Mwega wa ũthamaki nĩũkahunjio thĩ yothe, ũtuĩke ũira kũrĩ ndũrĩrĩ ciothe; na hĩndĩ ĩo nĩrĩo ithirĩro rĩgakinya.” (Mathayo 24:14) Ũmũthĩ Aira a Jehova nĩ marahunjia ũhoro ũrĩa mwega wa ũthamaki wa Ngai thĩinĩ wa mabũrũri makĩria ma 235, makĩhũthĩra thiomi makĩria ma 500. Ngathĩti iria macabaga, nĩcio Mũrangĩri na Amkeni! iria ikoragwo na ũhoro uumĩte Bibilia-inĩ, nĩcio ngathĩti iria itheremagio mũno thĩinĩ wa thĩ yothe. Ningĩ Aira a Jehova nĩ macabĩte Bibilia na thiomi makĩria ma 100. Wĩra wao ũrutagwo nĩ andũ a kwĩrutĩra na kũndũ guothe ũtwarithagio na mbere na mĩhothi ya kwĩyendera. Hihi no kũhoteke atĩ wĩra ũcio wa bata wa kũhunjiaũrahingia ũrathi wa Jesu?

Ningĩ Bibilia nĩ yonanagia maũndũ marĩa magaatongoria ĩmwe kwa ĩmwe harĩ mbaara gatagatĩ ka Jehova Ngai na arĩa mamũkararagia. Ta wĩcirie ũhoro wa morathi matatũ ũkwĩyonera makĩhinga.

Maũndũ Ũkwĩyonera Magĩkĩka Ica Ikuhĩ

Ũrathi wa 1. Bibilia yugaga atĩ thirikari nĩ ikaaruta kĩmenyithia kĩa mwanya kĩgiĩ ‘thayũ na ũgitĩri.’ Magaakorũo meĩrĩte atĩ marĩ hakuhĩ kũniina mathĩna marĩa manene. Ĩndĩ, maũndũ marĩa magaacoka kũrũmĩrĩra matigaakorũo marĩ ma thayũ.—1 Athesalonike 5:1-3.

Ũrathi wa 2. Ũndũ ũrĩa ũkaarũmĩrĩra nĩ thirikari itiganĩte gũũkĩrĩra mathondeka ma ndini gũkũ thĩ. Thĩinĩ wa Bibilia thirikari icio iringithanĩtio na nyamũ ndĩani; nacio ndini cia maheeni cia gũkũ thĩ ikaringithanio na mũndũ mũka ũrĩa ũkuuĩtwo nĩ nyamũ ĩyo. (Kũguũrĩrio 17:3, 15-18) Nyamũ ĩyo ya mũhaano ĩtekũmenya nĩ ĩkaahingia wendi wa Ngai na njĩra ya kũniina ndini iria ciĩtuaga atĩ nĩwe citungatagĩra.

Mũtũmwo Johana aatarĩirie ũndũ ũcio ũũ: ‘Nacio hĩa icio wona ikũmi, o na nyamũ nyene, acio nĩ gũthũũra magathũũra mũmaraya ũcio, mamũtige akirĩte ihooru na e njaga, na marĩe nyama cia mwĩrĩ wake, na mamũcine na mwaki athire biũ! Amu Ngai nĩ amataarĩte ngoro-inĩ ciao meke ũrĩa we atuĩte, na magĩe karĩko kamwe, na mahe nyamũ ĩo ũthamaki wao, kinya uuge wa Ngai ũrĩkie gwĩkĩka.’—Kũguũrĩrio 17:16, 17.

Ũrathi wa 3. Thuthawa gũtooria gũtharĩkĩra ndini ya maheeni, Shaitani nĩ agaatongoria thirikari nĩguo ciũkĩrĩre athathaiya a Jehova Ngai.—Kũguũrĩrio 7:14; Mathayo 24:21.

Ũkũbatara Gwĩka Atĩa?

Angĩkorũo ndũrĩ wagĩa na mweke wa kwĩruta Bibilia wega, no wone ũrĩ ũndũ mũritũ gwĩtĩkia atĩ maũndũ macio magwetetwo hau igũrũ nĩ magekĩka. No kũrĩ na gĩtũmi kĩega gĩa gũtũma twĩtĩkie atĩ maũndũ macio mothe gũtirĩ ũtakaahinga na atĩ megwĩkĩka ica ikuhĩ. Morathi maingĩ ma Bibilia marĩa marĩkĩtie kũhinga nĩ matũmaga tũgĩe na ũũma ũcio. a

Kaĩ ũtangĩhũthĩra mahinda manyinyi gũthuthuria kĩrĩa gĩtũmaga Aira a Jehova makorũo na ma biũ atĩ “mbaara ya mũthenya ũrĩa mũnene wa Ngai, Mwene-Hinya-Wothe” ĩrĩ hakuhĩ na nĩ kĩĩ gĩtũmi ndũkũbatara kũmĩĩtigĩra? Mere magũteithie ũmenye Bibilia yugaga wagĩrĩirũo nĩ gwĩka atĩa nĩguo ũkorũo ũrĩ ũmwe wa arĩa Jehova Ngai agitagĩra. (Kũguũrĩrio 16:14) Maũndũ marĩa ũkwĩruta mahota gũcenjia mawoni maku megiĩ mahinda marĩa maroka.

[Kohoro ka magũrũ-inĩ]

[Mbica karatathi ka 8]

Hihi no kũhoteke wĩra wa Aira a Jehova ũrahingia ũrathi wa Bibilia?