Mweri-inĩ wa Dicemba, andũ kũndũ kũingĩ thĩinĩ wa thĩ nĩ monaga mbica cia Jesu e gakenge. Onanagio arĩ thĩinĩ wa mũharatĩ, gĩthandũkũ kĩnene gĩa kũigwo nyeki ya kũrĩo nĩ ng’ombe kana mbũri. No hihi ũmũthĩ nĩ twagĩrĩirũo kuona Jesu arĩ gakenge?— * Ta reke tuone ũrĩa twagĩrĩirũo kũmuona atariĩ. Maũndũ marĩa meeyoneirũo nĩ arĩithi arĩa maarĩithagia ũtukũ hakuhĩ na Bethilehemu, no matũrute ũrĩa twagĩrĩire kuona Jesu atariĩ.

Arĩithi acio moimĩrĩirũo nĩ mũraika o rĩmwe. Akĩmeera ũũ: “Ũmũthĩ nĩmũciarĩirũo Mũhonokia . . . , nake nĩwe Kristo ũrĩa Mwathani.” Mũraika ũcio ningĩ akĩmeera atĩ nĩ megũkora Jesu ‘arigicĩirio tama wa ciana, na agakomio mũharatĩ-inĩ.’ O hĩndĩ ĩyo hakiumĩra araika angĩ aingĩ, na makĩambĩrĩria ‘kũgooca Ngai.’

Ũngĩigua atĩa ũngĩona araika makĩgooca Ngai?— Arĩithi acio nĩ maakenire mũno! Makĩĩrana ũũ: “Thiĩi tũthiĩ o rĩu tũkinye o Bethi-lehemu, tũkone ũhoro ũyũ ũkinyĩte.” Maathiĩ magĩkora “Mariamu na Jusufu, o erĩ, o na gakenge kau gakometio mũharatĩ-inĩ.”

Thutha wa kahinda kanini, gũgĩũka andũ angĩ kũu Bethilehemu kũrĩa Mariamu na Jusufu maarĩ. Rĩrĩa meerirũo nĩ arĩithi acio maũndũ marĩa meeyoneire, othe makĩgega. Hihi nĩ wakena nĩ ũndũ wa kũmenya maũndũ macio ma bata?— Ithuothe arĩa twendete Ngai nĩ tũkenagio nĩmo. Rĩu reke tuone kĩrĩa gĩtũmaga gũciarũo kwa Jesu kũrehe gĩkeno kĩnene. Nĩguo tuone gĩtũmi, tũkwarĩrĩria ũndũ ũrĩa wekĩkire harĩ Mariamu ataanahika.

Mũthenya ũmwe Mariamu nĩ oimĩrĩirũo nĩ mũraika wĩtagwo Gaburieli. Akĩmwĩra atĩ nĩ akaaheo mwana, na atĩ “nĩagatuĩka mũnene, ningĩ nĩagetagwo Mũrũ wa Ũrĩa-wĩ-Igũrũ-mũno.” Agĩcoka akĩmwĩra atĩ, ‘nake Mwathani Ngai nĩ akaamũhe gĩtĩ-gĩa-ũthamaki, naguo ũthamaki wake ndũgathira o na rĩ.’

Mariamu nĩ aarigagwo ũrĩa ũndũ ũcio ũngĩekĩkire, tondũ hĩndĩ ĩyo ndaarĩ na mũthuri. Nĩ ũndũ ũcio Gaburieli  akĩmwĩra ũũ: “Naguo hinya wa Ũrĩa-wĩ-Igũrũ-mũno” nĩ ũgakũhumbĩra, na “nĩ ũndũ wa ũhoro ũcio, karĩa gagaciarũo nĩgagatuwo gatheru, o Mũrũ wa Ngai.” Kĩu kĩarĩ kĩama kĩnene mũno, gũthamia Mũrũ wa Ngai kuuma kũrĩa igũrũ, na kũingĩria muoyo wake thĩinĩ wa nda ya Mariamu, nĩguo aciarũo arĩ kaana!

Hihi wanona mbica ironania “andũ ogĩ” atatũ marĩ hamwe na arĩithi magĩthiĩ kuona Jesu?— Mbica ta icio nĩ cionanagio hĩndĩ ya Krismasi. No ũrĩa cionanagia tiguo kũrĩ. Ũrĩa kũrĩ nĩ atĩ, “andũ ogĩ” acio, maarĩ atuĩria a njata, ũguo meekaga ũndũ ũrĩa Ngai akananĩtie. Reke tuone ũrĩa gwekĩkire maakinya. Bibilia yugaga ũũ: ‘Magĩtonya nyũmba, makĩona [“kaana,” The Holy Bible in Gĩkũyũ Language] karĩ na nyina Mariamu.’ Kwoguo, hĩndĩ ĩyo Jesu ndaarĩ gakenge kanini kaigĩtwo mũharatĩ-inĩ, ĩndĩ, aarĩ mwana mũnenanene warĩ kwao nyũmba marĩ na Jusufu na Mariamu!

Atuĩria acio a njata maamenyire atĩa kũrĩa Jesu aarĩ?— Maatongoririo nĩ “njata,” ĩkĩamba kũmatongoria mathiĩ Jerusalemu kũrĩ Mũthamaki Herode, ĩgĩcoka ĩkĩmatongoria gũthiĩ Bethilehemu. Bibilia yugaga atĩ, Herode nĩ aacaragia Jesu nĩguo amũũrage. Ta wĩcirie ũndũ ũyũ. Ũgwĩciria nũũ wabangĩte kĩndũ kĩu kĩahaanaga ta njata gĩtongorie andũ acio mathiĩ kũrĩ Herode?— Ti Ngai ũrĩa wa ma Jehova, no nĩ thũ yake ĩrĩa nene, Shaitani ũrĩa Mũcukani!

Mahinda-inĩ maya, Shaitani endaga andũ mone Jesu arĩ o gakenge. O na kũrĩ ũguo, mũraika Gaburieli eerire Mariamu ũũ: ‘Nĩ agaathana aarĩ mũthamaki, na ũthamaki wake ndũgathira o na rĩ.’ Ũmũthĩ ũyũ, Jesu nĩ Mũthamaki kũrĩa igũrũ, na ica ikuhĩ nĩ arĩniina thũ ciothe cia Ngai. Ũguo nĩguo twagĩrĩirũo kuona Jesu atariĩ, na nĩ tũbatiĩ kwĩra andũ arĩa angĩ ũndũ ũcio.