Bibilia nĩ ĩtwĩraga wega ũrĩa Jehova, na Mũrũ wake Jesu, mageka nĩguo meherie mĩnyamaro ĩrĩa ĩrehagwo nĩ Shaitani ũrĩa Mũcukani. Yugaga ũũ: “Ũndũ ũrĩa watũmire Mũrũ wa Ngai [Jesu] onithanio nĩ rĩrĩ, nĩ getha atharũrie wĩra wa mũcukani.” (1 Johana 3:8) Thĩ ĩno ĩrĩa ĩiyũrĩte ũkoroku, rũmena, na waganu nĩ ĩrĩanangwo. Jesu oigire atĩ, “mũnene wa gũkũ thĩ,” arĩ we Shaitani ũrĩa Mũcukani, “nĩekũingatwo.” (Johana 12:31) Tondũ gũtigakorũo na ũgucania mũũru wa Shaitani, nĩ gũkagĩa thĩ njerũ ĩrĩ na ũthingu, ĩrĩa ĩgakorũo ĩiyũire thayũ.—2 Petero 3:13.

Ĩ nao andũ arĩa maregaga na ũtũrĩka kũgarũrĩra mũtũũrĩre wao na magakĩrĩrĩria gwĩka maũndũ moru? Ta wĩcirie ũhoro wa kĩĩranĩro gĩkĩ: “Nĩ gũkorũo andũ arĩa arũngĩrĩru nĩo a gũtũũra bũrũri, acio akinyanĩru-rĩ, nĩo a gũgatigara kuo. No andũ arĩa aaganu nĩ kũrindũrũo makarindũrũo bũrũri, mĩgarũka ĩo nĩ kuombororio ĩkombororio kuo.” (Thimo 2:21, 22) Gũtigakorũo na ũgucania mũũru wa andũ arĩa aganu. Kũrĩ na thayũ ũcio, andũ arĩa aathĩki, nĩ makeehererio mehia marĩa ma kĩĩmerera kahora o kahora, na mehererio kwaga gũkinyanĩra.—Aroma 6:17, 18; 8:21.

Ngai akeheria atĩa maũndũ marĩa moru mathire biũ, thĩinĩ wa thĩ ĩyo njerũ? Ndakehereria andũ wĩyathi wao wa gwĩthuurĩra kana amahatĩrĩrie mekage ũrĩa we ekwenda, ĩndĩ akaamaruta njĩra ciake na amateithie kũgarũrĩra mwĩcirĩrie wao, na ciĩko ciao njũru.

Ngai ageka atĩa nĩ ũndũ wa maũndũ materĩgĩrĩirũo marĩa makoraga andũ? Eranĩire atĩ ica ikuhĩ, Ũthamaki kana thirikari yake, nĩ ĩrĩũka gũthamaka thĩ. Mũthamaki ũrĩa ũthuurĩtwo nĩ Ngai, nĩ Jesu Kristo, na nĩ arĩ hinya wa kũhonia andũ arĩa arũaru. (Mathayo 14:14) Ningĩ Jesu arĩ na hinya wa gũtooria mahinya ma ndũire. (Mariko 4:35-41) Kwoguo, mĩnyamaro ĩrĩa ĩrehagwo nĩ maũndũ moru marĩa materĩgĩrĩirũo nĩ ĩgaathira. (Kohelethu 9:12) Hĩndĩ ĩrĩa Kristo agakorũo agĩathana, gũtirĩ hĩndĩ andũ magakoragwo nĩ maũndũ moru.—Thimo 1:33.

Ĩ nao andũ milioni nyingĩ matarĩ na ũũru arĩa makuĩte nĩ ũndũ wa maũndũ macio materĩgĩrĩirũo? Kahinda kanini Jesu atanariũkia mũratawe Lazaro, oigire ũũ: “Nĩ niĩ kũriũka na nĩ niĩ muoyo.” (Johana 11:25) Hatarĩ nganja, Jesu nĩ arĩ hinya wa kũriũkania kana wa gũcokia arĩa akuũ muoyo!

Angĩkorũo no wende gũgatũũra thĩ hĩndĩ ĩrĩa maũndũ moru matagaakoraga andũ arĩa ega-rĩ, na githĩ ti wega ũmenye ma ĩgiĩ Ngai ũrĩa wa ma na muoroto wake, kũgerera kwĩruta Bibilia? Aira a Jehova nĩ megũkenera gũgũteithia kũmenya ma ĩyo. Tũrakũũria waranĩrie nao, kana wandĩkĩre arĩa macabĩte ngathĩti ĩno.