Ũngĩambĩrĩria atĩa nĩguo ũkenere gũthoma Bibilia na ũgunĩke? Ta rora maũndũ maya matano marĩa mateithĩtie andũ aingĩ.

Etha handũ hega ha gũthomera. Geria gwetha handũ hatarĩ na inegene. Ndũkareke ũthumbũrũo nĩ kĩndũ nĩguo ũhote kũiga meciria harĩ kĩrĩa ũrathoma. Nĩ wega ũikare handũ harĩ na rĩera rĩega na ũtheri wa kũigana nĩguo ũhote kũgunĩka biũ nĩ kĩrĩa ũrathoma.

Korũo na mwerekera ũrĩa wagĩrĩire. Tondũ Bibilia yumĩte kũrĩ Ithe witũ, no ũgunĩke mũno ũngĩkorũo na mwerekera ta wa kaana, ũrĩa gakoragwo kehaarĩirie kwĩruta kuuma harĩ mũciari wako ũkendete. Angĩkorũo nĩ ũkoragwo na mawoni matagĩrĩire kwerekera Bibilia, geria kũmeheria nĩguo ũhote kũrutwo nĩ Ngai.—Thaburi 25:4.

Hoya ũtanambĩrĩria gũthoma. Ũhoro ũrĩa ũrĩ thĩinĩ wa Bibilia umĩte kũrĩ Ngai, kwoguo no mũhaka tũbatare ũteithio wake nĩguo tũtaũkĩrũo nĩyo. Ngai nĩ eranĩire atĩ nĩ aheaga “roho mũtheru arĩa mamũhoyaga!” (Luka 11:13) Roho mũtheru no ũgũteithie kũgĩa na mwĩcirĩrie ta wa Ngai. Thutha wa ihinda, no ũkũhingũre meciria na ũhote gũtaũkĩrũo nĩ “nginya maũndũ marĩa marikĩru ma Ngai.”—1 Akorintho 2:10.

Thoma ũrĩ na muoroto wa gũtaũkĩrũo. Ndũgathome tu nĩguo ũrĩkie. Wĩcirie na njĩra ndikĩru ũhoro wa kĩrĩa ũrathoma. Wĩyũrie ciũria ta ici: ‘Nĩ maũndũ marĩkũ ndamenya megiĩ mũndũ ũyũ ndĩrathoma ũhoro wake? Ingĩhũthĩra maũndũ macio atĩa ũtũũro-inĩ wakwa?’

Thoma ũrĩ na muoroto wa kwĩruta ũndũ mũna. Nĩguo wone moimĩrĩro mega ma gũthoma Bibilia, thoma ũrĩ na muoroto wa kwĩruta ũndũ ũngĩgũteithia ũtũũro-inĩ waku. No wĩigĩre mĩoroto ta ĩno: ‘Ndĩrenda kwĩruta menye ũrĩa Ngai atariĩ.’ ‘Ndĩrenda gũtuĩka mũndũ mwega, mũthuri kana mũtumia mwega.’ Thutha ũcio no ũthuure icunjĩ cia Bibilia iria ingĩgũteithia kũhingia mĩoroto ĩyo. *

Maũndũ macio matano twarĩrĩria nĩ megũgũteithia kwambĩrĩria gũthoma Bibilia. No nĩ maũndũ marĩkũ mangĩ ũngĩka nĩguo ũkenere gũthoma Bibilia biũ? Gĩcunjĩ kĩrĩa kĩrũmĩrĩire nĩ gĩtaarĩirie maũndũ macio.