Ndaciarĩirũo London, Ngeretha, gĩcigo-inĩ kĩmwe gĩkoragwo na andũ aingĩ gĩtagwo Paddington. Twaikaraga na mami hamwe na aarĩ a maitũ atatũ akũrũ kũngĩra. Baba aarĩ mũnyui wa njohi, ũndũ ũrĩa watũmaga kaingĩ atũtiganĩrie.

Ndĩ mũnini mami nĩ aandutĩte kũhoyaga hwaĩ-inĩ o mũthenya. Ndaarĩ na Bibilia yarĩ na Thaburi tu na nĩ ndathondekaga mĩgambo ya gũciina. Nĩ ngũririkana ngĩthoma ciugo ici ibuku-inĩ rĩmwe ndakoragwo narĩo: “Kwĩ hĩndĩ ĩrĩũka rũciũ rwage gũkinya.” Ciugo icio ciatũmaga njage toro ũtukũ ngĩciria ũhoro wa ihinda rĩũkĩte. Ndeĩraga ũũ: ‘No mũhaka akorũo kwĩna maũndũ maingĩ itoĩ megiĩ ũtũũro.’ Na ngeyũria, ‘Muoroto wa ũtũũro nĩ ũrĩkũ?’ Ndieendaga gũkua!

Nĩ ndambĩrĩirie kwĩrirĩria kũmenya ũhoro wa maũndũ ma ndaimono. Ndageragia kwaranĩria na arĩa makuĩte, ngathiĩ tũburi-inĩ hamwe na arĩa twathomaga nao, na ngerorera thenema irĩ na maũndũ ma kũguoyohia. Maũndũ macio maarĩ ma kũguoyohia no nĩ twamakenagĩra.

Ndambĩrĩirie kwagana ndĩ wa mĩaka ikũmi tu. Nĩ ndambĩrĩirie kũnyua thigara na thutha ũcio ngĩambĩrĩria kũnyua nginya bangi. Ndĩna mĩaka 11 nĩ ndambĩrĩirie gũcamacama njohi. O na gũtuĩka ndiendete mũcamo wayo, nĩ ndakenaga ndĩ mũrĩu. Ningĩ nĩ ndendete nyĩmbo o hamwe na kũina ndaci. Nĩ ndaathiaga maruga-inĩ na irabu-inĩ cia ũtukũ rĩrĩa rĩothe ndahota. Kaingĩ nĩ ndooraga mũciĩ ũtukũ, ngacoka rũcinĩ tene gũtanakĩa. Nĩ ũndũ wa kũnoga, ndiathiaga cukuru mũthenya ũyũ ũngĩ. Na ingĩathire cukuru, kaingĩ ndaikaraga ngĩnyuaga njohi.

Nĩ ndagũire mũno kĩgeranio kĩa mũico. Mami nĩ aarakarire mũno na agĩkua ngoro tondũ o na ndamenyete harĩa ndaakinyĩtie mĩtugo. Twanegenanirie nginya ngĩũra mũciĩ. Ndaathire kwa mwanake ũrĩa twarĩ ndũgũ na tũgĩikara nake kwa ihinda. Eetagwo Tony na aarĩ Mũrasta. Nĩ aiyaga, akendia ndawa cia kũrebia, na nĩ oĩkaine na mbaara. Ndiaikarire itatuĩkĩte mũritũ, na ngĩgĩa kaana ga kahĩĩ ndĩ na mĩaka 16 tu.

Ndaacemanirie na Aira a Jehova rĩa mbere hĩndĩ ndaikaraga mũciĩ ũmwe wa atumia arĩa magĩte ciana no ti ahiku. Ndaaheetwo rumu kũu nĩ atongoria a thirikari. Harĩ atumia erĩ Aira a Jehova mookaga gũceerera atumia amwe twaikaraga nao. Mũthenya ũmwe nĩ ndaathire gũthikĩrĩria ndeereti yao. Ndaarĩ na muoroto wa kuonia atumia acio Aira a Jehova atĩ matiarutanaga ũhoro wa ma. Ĩndĩ o kĩũria kĩrĩa ndamoria, maacokagia marĩ na ũhoreri makĩhũthĩra Bibilia. Ndonire marĩ ega mũno na marĩ na ũrata, na ũndũ ũcio ũkĩngenia mũno. Ũndũ ũcio nĩ watũmire nyende mandute Bibilia.

Thutha wa ihinda inini, nĩ nderutire ũndũ wagarũrire mũtũũrĩre wakwa. Nĩ ndaatũũrĩte ndĩtigĩrĩte gũkua kuuma ndĩ o mũnini. No nĩ ndamenyire ũrutani wa Jesu wĩgiĩ kũriũkio kwa andũ arĩa makuĩte. (Johana 5:28, 29) Ningĩ nĩ nderutire atĩ Ngai nĩ aanũmbũyagia. (1 Petero 5:7) Nĩ ndaahutirio mũno nĩ ciugo ici cia Jeremia 29:11: “Nĩ gũkorũo nĩnjũĩ meciria marĩa ndĩĩciragia ũhoro-inĩ wanyu, o meciria ma thayũ, na ti ma ũũru, nĩgetha ndũme mũgĩe na kĩĩrĩgĩrĩro gĩa atĩ ũhoro wanyu nĩũkaagĩra thutha-inĩ; ũguo nĩguo Jehova ekuuga.” Hĩndĩ ĩyo nĩrĩo ndambĩrĩirie gwĩtĩkia atĩ no ngĩe na kĩĩrĩgĩrĩro gĩa gũtũũra tene na tene thĩinĩ wa Paradiso gũkũ thĩ.—Thaburi 37:29.

Aira a Jehova nĩ maanyonirie wendo wa ma. Rĩrĩa ndaathire mĩcemanio yao riita rĩa mbere, nĩ ndakeneire mũno tondũ andũ othe maarĩ na ũrata. (Johana 13:34, 35) Ũndũ ũcio warĩ ngũrani mũno na ũrĩa ndeyoneire kanitha-inĩ ũmwe. Aira a Jehova maanyitire ũgeni matekũrora ũrĩa ndaatariĩ. Nĩ maahũthagĩra mahinda mao hamwe na niĩ, makanũmbũyia, magathikĩrĩria rĩrĩa ndĩreyaria, na nĩ maandeithagia mũno. Ndaiguaga ta ndĩ thĩinĩ wa famĩlĩ nene ĩrĩ na wendo.

Maũndũ marĩa nderutaga kuuma Bibilia-inĩ nĩ maatũmire nyone atĩ nĩ ndaabataraga kũgarũrĩra mũtũũrĩre wakwa nĩguo hote gũikara na mĩtugo ĩrĩa Ngai endaga. Ndwarĩ ũndũ mũhũthũ gũtiga thigara. Ihinda-inĩ o rĩu nĩ ndamenyire atĩ nyĩmbo imwe nĩ ciatũmaga nyende mũno kũnyua bangi na kwoguo ngĩtiga gũcithikĩrĩria. Nĩguo njikare itarĩ mũrĩu, nĩ ndatigire gũthiaga kũrĩa ingĩacemanirie na magerio ma kũnyua njohi, ta maruga-inĩ na irabu-inĩ. Ningĩ nĩ ndethire arata marĩ na mĩtugo mĩega arĩa mangĩandeithirie gũikara ũrĩa kwagĩrĩire.—Thimo 13:20.

Ihinda-inĩ rĩu o nake Tony nĩ eerutaga Bibilia na Aira a Jehova. Na tondũ maamũcokagĩria ciũria makĩhũthĩra Bibilia, o nake nĩ onire atĩ maamũrutaga ũhoro wa ma. Nĩ eekire mogarũrũku manene ũtũũro-inĩ wake ta gũtiga kũiya, gũtiga kũnyua bangi, na kwĩyeherania na arata ake arĩa meendete mbaara. Ningĩ nĩguo tũhote gũkenia Jehova biũ, nĩ tuonire bata wa kũrera mwana witũ na njĩra njega na gũtiga mĩthiĩre mĩũru. Nĩ ũndũ ũcio, tũkĩhikania mwaka wa 1982.

Nĩ ngũririkana ngĩcaria icunjĩ cia Mũrangĩri na Amkeni! * iria ciakoragwo na andũ mataarĩirie ũrĩa maahotire gwĩka mogarũrũku ta marĩa ndeendaga gwĩka. Kĩonereria kĩao nĩ kĩanjĩkĩrire ngoro mũno! Ndaiguire ndagĩa na hinya wa gũthiĩ na mbere kwĩrutanĩria gwĩka mogarũrũku handũ ha gũkua ngoro. Ndaikaraga ngĩthaithaga Jehova ndakandiganĩrie. Ithuerĩ na Tony twabatithirio Julaĩ 1982.

Kũgĩa ũrata na Jehova nĩ kwahonokirie muoyo wakwa. Ningĩ ithuerĩ na Tony nĩ twĩyoneire Jehova agĩtũteithia hĩndĩ ĩrĩa tũrĩ na moritũ. Nĩ twĩrutĩte kwĩhokaga Jehova rĩrĩa moritũ matũkora na nĩ tuonaga atĩ akoretwo agĩtũteithia hĩndĩ ciothe na akahingĩria famĩlĩ itũ mabataro.—Thaburi 55:22.

Nĩ ngenaga mũno nĩ ũndũ nĩ ndateithirie mwanake wakwa na mũirĩtu wakwa mamenye Jehova. Ngoragwo na gĩkeno mũno ndona ciana ciao igĩkũra ciũĩ ũhoro wa Ngai.

Rĩu ndiagaga toro ngĩciria ũhoro wa ihinda rĩũkĩte kana ũhoro wa gĩkuũ. Tũrĩ na Tony tũceeragĩra ciũngano ngũrani cia Aira a Jehova o kiumia nĩguo tũgekĩre andũ ngoro. Tũnyitanagĩra nao harĩ kũruta andũ arĩa angĩ atĩ mangĩonania wĩtĩkio harĩ Jesu, o nao nĩ magaakenera gũtũũra tene na tene.