•   “Bũrũri wa China ugĩte atĩ mwaka ũyũ nĩ kwarĩte na gũkoma mũno. Rĩrĩ nĩ riita rĩa gatatũ historĩ-inĩ ya China gũkorũo yandĩkithĩtie ũrugarĩ mũnene ũguo.”—The Guardian, Septemba 7, 2022.

•   “Icunjĩ imwe cia Afrika nĩ ikũingĩra mwaka wa gatano kũrĩ o na wagi mũnene wa mbura.”—Mohoro ma UN, Agosti 26, 2022.

•   “Makĩria ma nuthu ya Europe ĩrĩ ũgwati-inĩ wa kũgĩa na wagi wa mbura, na no kũhoteke nĩguo ũgũkorũo ũrĩ mũnene ihinda-inĩ rĩa mĩaka 500 mĩhĩtũku.”—Mohoro ma BBC, Agosti 23, 2022.

 Ataaramu aingĩ nĩ maregereria atĩ nĩ gũgũthiĩ na mbere gũkorũo na wagi ta ũcio wa mbura na gũthũke o na makĩria. Hihi no twĩhoke atĩ maũndũ nĩ makaagĩra ihinda rĩũkĩte? Bibilia yugaga atĩa?

 Bibilia yarathĩte ũũ igũrũ rĩgiĩ mahinda maya maitũ:

•   “Nĩ gũkaagĩa . . . ngʼaragu . . . kũndũ na kũndũ.”—Luka 21:11.

 Kaingĩ wagi wa mbura ũtũmaga kũgĩe na ngʼaragu. Mathĩna na gĩkuũ iria irehagwo nĩ ngʼaragu, nĩ ihingagia ũrathi wa Bibilia.—Kũguũrĩrio 6:6, 8.

 Bibilia nĩ ĩguũrĩtie gĩtũmi kĩnene kĩrĩa gĩtũmĩte wagi wa mbura wongerereke na gĩkĩro kĩnene. Yugĩte ũũ:

•   “Mũndũ tiwe wagĩrĩirũo o na gũtongoria ikinya rĩake.”—Jeremia 10:23.

 Ũguo nĩ kuuga atĩ andũ matingĩhota “gũtongoria ikinya (rĩao),” kana gwĩtongoria o ene na njĩra njega. Matua mao moru kaingĩ matũmaga kwage mbura na maĩ.

•   Athomi aingĩ a sayansi nĩ metĩkanagia atĩ maũndũ marĩa andũ mekaga nĩ matũmĩte kũgĩe na ũrugarĩ mũingĩ thĩinĩ wa thĩ, ũndũ ũrĩa ũtũmĩte kũgĩe na wagi mũnene wa mbura thĩinĩ wa thĩ.

•   Ũkoroku wa andũ na mawatho marĩa mathondekagwo matekũrĩrĩra rũciũ matũmaga mĩtitũ ĩthũkangio, gũkagĩa na gĩko kĩingĩ, na ũhũthĩri mũũru wa indo cia ndũire. Maũndũ macio matumaga ihumo cia maĩ ikorũo ũgwati-inĩ wa gũthira.

 O na kũrĩ ũguo, Bibilia nĩ ĩtũheaga mwĩhoko.

 Bibilia nĩ ĩranĩire atĩ Ngai nĩ akaaniina thĩna ũrĩa ũrĩ kuo wa kwaga maĩ. Hihi akaaũniina atĩa?

1.  1. Ngai nĩ “[akaananga] arĩa manangaga thĩ.” (Kũguũrĩrio 11:18) Nĩ akaaniina andũ aganu na akoroku arĩa mekaga maũndũ marathũkangia thĩ, magatũma kũgĩe na thĩna wa kwaga maĩ.—2 Timotheo 3:1, 2.

2.  2. “Kũndũ kũrĩa kũrĩ ũrugarĩ na kũngʼaru gũgaatuĩka karia karĩ na mathanjĩ.” (Isaia 35:1, 6, 7) Ngai nĩ agaathondeka kũrĩa gũthũkangĩte nĩ ũndũ wa wagi wa mbura na atue thĩ ĩno paradiso ĩrĩ na maĩ maingĩ.

3.  3. “Wee nĩ ũrũmbũyagia thĩ, ũgatũma ĩciare mũno na ĩkorũo ĩrĩ noru.” (Thaburi 65:9) Ngai nĩ akaarathima thĩ ĩno ĩgĩe na irio nyingĩ njega na maĩ matheru mangĩigana andũ othe.