Nĩ ũndũ wa andũ ngiri nyingĩ arĩa marabatithio o mwaka, nĩ tũrabatara nyũmba nyingĩ cia kũhũthĩrũo ũthathaiya-inĩ wa Jehova. Nĩ ũndũ ũcio, Honge cia Gũcora/Mĩako thĩinĩ wa thĩ yothe nĩ ciabangire gwaka kana gũcokereria nyũmba cia gũthathaĩria makĩria ma 2,700 mwaka-inĩ wa ũtungata wa 2020. a

 O na kũrĩ ũguo, mĩbango ĩyo nĩ yathũkirio nĩ mũrimũ wa COVID-19. Nĩguo aarĩ na ariũ a Ithe witũ magitĩrũo na nĩguo twathĩkĩre mawatho ma thirikari, Kamĩtĩ ya Ũcabi ya Kĩama Kĩrĩa Gĩtongoragia nĩ yambire kũrũgamia kwa ihinda mĩako mĩingĩ thĩinĩ wa thĩ yothe. O na kũrĩ ũguo, mwaka-inĩ wa ũtungata wa 2020, makĩria ma nyũmba 1,700 cia gũthathaĩria nĩ ciaakirũo kana igĩcokererio mbere ya mũrimũ wa corona wambĩtie. Ningĩ, makĩria ma mĩako 100 ya wabici cia honge nĩ yarĩkirie gwakwo kana gũcokererio. Haha harĩ na ũrĩa mĩako ĩĩrĩ harĩ ĩyo ĩrĩkĩtie gwakwo ĩraguna aarĩ na ariũ a Ithe witũ.

 Wabici ya Rũhonge ya Cameroon. Wabici ya rũhonge tene yarĩ taũni-inĩ ya Douala na yarĩ nini mũno na nĩ yabataraga gũthondekwo ũndũ ũngĩ. Kĩambĩrĩria-inĩ Kamĩtĩ ya Ũcabi yatuĩte itua rĩa gũcokereria kũrĩa wabici ĩyo yathũkangĩte, no yacokire ĩkĩona atĩ mbeca cia kũruta wĩra ũcio ingĩarĩ nyingĩ gũkĩra thogora wa mwako ũcio. Ningĩ nĩ yekire ũthuthuria wĩgiĩ gwaka handũ hangĩ kana kũgũra nyũmba ĩngĩ na ĩcokererio kũrĩa ĩthũkangĩte, no maũndũ macio merĩ matiahotekire.

 Ihinda-inĩ o rĩu, ariũ a Ithe witũ nĩ maamenyire atĩ mwena wa rũgongo wa taũni ya Douala, thirikari nĩ yabangĩte gwaka barabara hakuhĩ na Nyũmba ya Kĩgomano. Barabara ĩyo nĩ ĩngĩatũmire ũkorũo ũrĩ ũndũ mũhũthũ gũkinya nyũmba-inĩ ĩyo na gũkinyia motungata mangĩ ta maĩ na thitima. Maũndũ macio no mo wabici ya rũhonge yabataraga. Kwoguo, Kĩama Kĩrĩa Gĩtongoragia nĩ kĩaheanire rũtha gwakwo wabici ya rũhonge njerũ mwena-inĩ ũmwe wa mũgũnda wa Nyũmba ya Kĩgomano.

 Aarĩ na ariũ a Ithe witũ na andũ angĩ arĩa maaheirũo kandarathi nĩ maarutithanirie wĩra hamwe, na ũndũ ũcio ũkĩhonokia mahinda na mbeca. Mwako ũcio ũkĩrĩka, nĩ wahonoketie dola milioni igĩrĩ (cia Amerika). Famĩlĩ ya Betheli nĩ yathamĩire kuo kahinda kanini mbere ya mũrimũ wa COVID-19 ũtuthũkĩte.

 Andũ a famĩlĩ ya Betheli ya Cameroon nĩ makenaga gũikara na kũrutĩra wĩra kuo, na monaga wabici ĩyo ĩrĩ kĩheo kuuma kũrĩ Jehova. Mũthuri ũmwe na mũtumia wake mooigire ũũ: “Tũraigua o gũthiĩ na mbere kwĩrutanĩria nĩguo tuonanie ngatho nĩ ũndũ wa kĩheo gĩkĩ.”

 Wabici ya Ũtaũri ya Tojolabal, Mexico. Kwa ihinda rĩa mĩaka mĩingĩ, timu ya ũtaũri ya Tojolabal yarutagĩra wĩra wabici-inĩ ya rũhonge ya Central America, ĩrĩa ĩrĩ hakuhĩ na Taũni ya Mexico. O na kũrĩ ũguo, rũthiomi rwa Tojolabal rwaragio mũno icigo-inĩ cia Altamirano na Las Margaritas iria irĩ hakuhĩ kilomita 1,000 (mairo 620) kuuma kũu. Nĩ ũndũ ũcio, ataũri matiahotaga kũhũthĩra rũthiomi rũrĩa andũ mararia nĩ ũndũ wa gũkorũo marĩ kũraihu nao. Ningĩ wabici ya rũhonge yarĩ na wĩra mũritũ wa gũcaria aarĩ na ariũ a Ithe witũ a hakuhĩ arĩa mangĩateithĩrĩirie gũtaũra na kũrekondwo indo cia rũthiomi rwa Tojolabal.

 Nĩ ũndũ wa itũmi icio, Kamĩtĩ ya Wandĩki ya Kĩama Kĩrĩa Gĩtongoragia nĩ yeendaga gũthamia ataũri a Tojolabal mathiĩ kũrĩa rũthiomi rũu rwaragio. Nĩguo ũndũ ũcio ũhinge, wabici ya rũhonge nĩ yatuire itua rĩa kũgũra nyũmba na ĩmĩthondeke kũrĩa yathũkangĩte. Ũndũ ũcio nĩ ũngĩahonokirie mbeca gũkĩra gwaka kana gũkombora wabici.

 Mũtaũri ũmwe ooigire ũũ agĩtaarĩria ũrĩa agunĩkĩte: “Ihinda-inĩ rĩa mĩaka ikũmi ĩrĩa ngoretwo ndĩ mũtaũri wabici-inĩ ya rũhonge, ndiaumire njemanĩtie na famĩlĩ o na ĩmwe yaaragia rũthiomi rwitũ hakuhĩ na kũu wabici ĩrĩ. Rĩu wabici itũ ya ũtaũri ĩkoragwo kũrĩa rũthiomi rwa Tojolabal rwaragio. Nĩ njemanagia na andũ arĩa maragia rũthiomi rwa Tojolabal o mũthenya. Nĩ menyete ciugo nyingĩ na ngagagĩria wĩra wakwa.”

 Mwaka wa ũtungata wa 2021, maũndũ mangĩtĩkĩria, nĩ kũbangĩtwo gwaka na gũcokereria mĩako ya wabici cia ũtaũri na cukuru cia gĩtheokrasi 75. Wĩra nĩ ũgũthiĩ na mbere kũrutwo wabici-inĩ inyanya cia honge, iria nĩ hamwe na mwako wa Ramapo, New York, wa kũhũthĩrũo nĩ wabici nene, o hamwe na gũthamia wabici cia honge cia Argentina na Italy. Ningĩ makĩria ma Nyũmba cia Ũthamaki 1,000 nĩ irabatara gwakwo, makĩria ma kũndũ 6,000 gwa gũcemanĩria gũtikinyanĩirie ikĩro na nĩ kũrabatara gwethwo kũngĩ, na Nyũmba cia Ũthamaki ingĩ 4,000 nĩ irabatara gũcokererio kũrĩa ithũkangĩte.

 Mbeca cia gwaka na gũcokereria mĩako ĩyo ciumaga kũ? Mũrũ wa Ithe witũ Lázaro González, wa Kamĩtĩ ya Wabici ya Rũhonge ya Central America nĩ aacokirie kĩũria kĩu rĩrĩa aaragia ũhoro wa mwako wa Wabici ya Ũtaũri ya Tojolabal. Ooigire ũũ: “Thĩinĩ wa gĩcigo kĩa wabici itũ, tũtikoragwo na ũhoti mũnene wa kĩĩmbeca. Kwoguo tũngĩaga gũteithio nĩ aarĩ na ariũ a Ithe witũ, tũtingĩhota gwaka wabici cia ũtaũri nĩ ũndũ wa aarĩ na ariũ a Ithe witũ arĩa maragia thiomi cia gũkũ. Mĩhothi ĩrĩa ĩrutagwo nĩ aarĩ na ariũ a Ithe witũ thĩinĩ wa thĩ yothe nĩ ĩtũmĩte ataũri makuhĩrĩrie kũrĩa thiomi iria mataũraga ciaragio. Nĩ tũracokeria aarĩ na ariũ a Ithe witũ ngatho nĩ ũndũ wa ũtaana wao.” Mĩako ĩyo ĩhotekete nĩ ũndũ wa mĩhothi ĩrĩa ĩrutagwo nĩ ũndũ wa wĩra wa thĩ yothe, na mĩingĩ ĩrutagwo kũgerera donate.mr1310.com.