Omuhongwanhu Alan S. Duthie okwa popya membo ledina Bible Translations and How to Choose Between Them, a ti: “Ngeenge owa itavela kutya Ombiibeli oi li Eendjovo daKalunga odo a pa ovanhu, osha yela kutya Kalunga oha popi nafye. . . . Onghee ngeenge elongelokalunga loye ola kuma onghalamwenyo yoye aishe, Ombiibeli oi na okukala i li melaka olo hali popiwa kunena.”

Ovo ve hole Eendjovo daKalunga nomutima aushe otava tu kumwe neendjovo domuhongwanhu oo. Ova itavela filufilu kutya “Omishangwa adishe oda nwefwa mo kuKalunga, notadi dulu okuhonga, okupukulula, okuyukifa oinima nokutekula mouyuki.” (2 Timoteus 3:16) Ombiibeli kai fi ashike embo longhuluyonale. Ndele oi na “omwenyo neenghono,” notai dulu oku tu kwafela tu ungaunge nomaupyakadi efiku keshe. (Ovaheberi 4:12) Embo olo liyapuki oli na okutolokwa melaka olo hali popiwa kunena, opo ovanhu aveshe va ude ko nova tule moilonga osho sha shangwa mo.

Ovo ve hole Eendjovo daKalunga ova tunhukwa eshi kwa pitifwa Ombiibeli — Etoloko lOunyuni Mupe lOmishangwa dopaKriste dOshigreka mOshikwanyama. Eendombwedi daJehova oda pitifa Ombiibeli oyo mo 16 Auguste 2019. Oya tolokwa mOshikwanyama monghedi ya yela, i li paushili notai kwafele ovanhu va ude ko nawa etumwalaka olo li li mEendjovo daKalunga. Otashi dulika u lipule kutya oolyelye ve i toloka.

Nonande Ombiibeli — Etoloko lOunyuni Mupe lOmishangwa dopaKriste dOshigreka otashi dulika ipe kovapopi vOshikwanyama, oya kala ko nale momalaka amwe okudja mo 1950 lwaapo. Pefimbo opo, Ombiibeli oyo oya li ya pitifwa mOshiingilisha kehangano lomounyuni aushe, o-Watch Tower Bible and Tract Society, olo la kala hali nyanyangida Eembiibeli oule womido. Oshungonangelo yo 15 Septemba 1950, oya ti: “Ovanhu ovo va ungaunga netoloko olo ova popya etaleko lavo . . . kutya inava hala okushiivika, noinava hala omadina avo a nyanyangidwe kutya nee osheshi ve li momwenyo ile ngeenge va fi. Elalakano letoloko olo olo okufimanekifa edina laKalunga kashili.”

Ombiibeli — Etoloko lOunyuni Mupe lOmishangwa Diyapuki ye lixwa po oya li ya pita mo 1961, mOshiingilisha. Nonande omadina aavo ve i toloka inaa hololwa fiyo okunena, inatu pumbwa okukala twa limbililwa omalinyengotomheno avo ile oilonga yavo youdiinini. Eenhetekelindjovo dOmbiibeli yOshiingilisha ya pepalekwa yomo 2013 oda ti: “Molwaashi etumwalaka lOmbiibeli ola fimanenena, otwa kendabala ngaashi hatu dulu tu pepaleke Ombiibeli nopehe na okulundulula etumwalaka layo. Otu udite kutya otu na oshinakuwanifwa sha kwata moiti shokutoloka etumwalaka olo paushili. . . . Elalakano letu kali fi ashike okutoloka etumwalaka olo ngaashi la li pehovelo, ndele oku li kaleka yo la yela nolipu okulesha.”

Kunena, opa nyanyangidwa eekopi eemiliyona 220 dOmbiibeli — Etoloko lOunyuni Mupe ye lixwa po ile oitukulwa yayo imwe mounyuni aushe momalaka a konda 160. Oshike osho ovaleshi vahapu vOmbiibeli oyo va didilika?

Jesus okwa honga ovahongwa vaye va ilikane ngaha: “Tate yetu ou u li meulu, edina loye nali yapulwe.” (Mateus 6:9) Ombiibeli oya tumbula edina laKalunga, Jehova, lwoikando 7 000 lwaapo. (Exodus 3:15; Epsalme 83:18) Konima yefyo lovayapostoli vaJesus, eongalo lopaKriste ola li li na etaleko la puka la faafana naalo la li li niwe kOvajuda vahapu li na sha nokuhalongifa edina laKalunga. (Oilonga 20:29, 30; 1 Timoteus 4:1) Ovashangululi voitukulwa yOshigreka ova pingena po edina laKalunga, Jehova, nomadinafimaneko ngaashi “Kalunga” nosho yo “Omwene.”

Okomitiye yOmbiibeli — Etoloko lOunyuni Mupe oya alulila mo edina Jehova mOmishangwa dopaKriste dOshigreka; * edina olo ola holoka mo lwoikando 237. Edina olo inali shunifwa mo ashike she likolelela kovatoloki, ndele opa ningwa omalafululo a kwata moiti. Pashihopaenenwa, eendjovo do di li muLukas 4:18 oda tofwa muJesaja 61:1. Movelise oyo yaJesaja omwa li edina Jehova momashangelo opehovelo Oshiheberi. MOmbiibeli — Etoloko lOunyuni Mupe, Lukas 4:18 okwa tolokwa ngaha: “Omhepo yaJehova oi li kombada yange, osheshi okwa vaeka nge ndi udifile eehepele onghundana iwa.”

Osho ohashi kwafele ovaleshi va mone eyooloko pokati kaJehova Kalunga nOmona waye Jesus Kristus. Pashihopaenenwa, mEembiibeli dimwe, Mateus 22:44 okwa tolokwa ngaha: “Omwene okwa lombwela Omwene wange.” (Ngaashi mo-King James Version) Ndele mbela olyelye a lombwela naao a lombwelwa? Ovelise oyo oya tofa oshitukulwa shimwe shEpsalme 110:1, olo la li li na edina laKalunga momashangelo opehovelo Oshiheberi. MOmbiibeli — Etoloko lOunyuni Mupe, Mateus 22:44 okwa tolokwa ngaha: “Jehova okwa lombwela Omwene wange.” Eyooloko pokati kaJehova Kalunga nosho yo Omona waye oli liwetikile. (Markus 13:32; Johannes 8:17, 18; 14:28) Otu na okukala tu shii eyooloko olo opo tu ka xupifwe. Oilonga 2:21 oya ti: “Keshe ou ta ifana edina Jehova ota ka xupifwa.”

Okwa ningwa eenghendabala da mana mo opo omashangelo opehovelo Oshigreka a tolokwe paushili monghedi ipu okuudiwa ko melaka olo hali popiwa kunena. Pashihopaenenwa, ovatoloki vOmbiibeli — Etoloko lOunyuni Mupe ova kendabala okukwatela po eityo loityalonga yOshigreka. Momalaka mahapu okunena, oityalonga ohai lunduluka opo ku hololwe efimbo opo oshinima tashi ningwa, ngaashi epitafimbo, epaifefimbo, ile eteelelwafimbo. MOshigreka, oityalonga ohai ulike kutya oshinima otashi ningwa momukalo ulipi, pashihopaenenwa, otashi ningwa ohaluka, osha pwa, ile otashi twikile. Diladila keendjovo daJesus odo tadi hangwa muMateus 6:33. Oshityalonga shOshigreka osho sha tolokwa ‘konga’ otashi yandje ediladilo loshinima tashi twikile. Eityo leendjovo daJesus ola yela nawa eshi la tolokwa ngaha: “Kaleni tamu kongo tete Ouhamba nouyuki waye, noinima aishe ikwao otamu ke i wedelwa ko.” Sha faafana, Mateus 7:7 okwa tolokwa ngaha “Kaleni hamu indile, opo nee otamu pewa; kaleni hamu kongo, opo nee otamu mono; kaleni hamu konghola, opo nee otamu yeululwa.” — Ovaroma 1:32; 6:2; Ovagalati 5:15.

Eli ehovelo ashike eshi Ombiibeli yOmishangwa dopaKriste dOshigreka ya pita mOshikwanyama. Opa ningwa omalongekido opo Ombiibeli aishe i ka tolokwe monakwiiwa. Mbela ovaleshi vOmbiibeli yOshikwanyama otava dulu ngoo okukala noushili kutya etoloko olo oli li paushili notali tu kumwe netoloko lOshiingilisha?

Heeno, molwaashi oilonga oyo yokutoloka oya kala tai pashukilwa noukeka kOlutuwiliki lEendombwedi daJehova. Opa li pa ningwa omalongekido opo oilonga yokutoloka Ombiibeli i ungaungwe nayo kovanhu tava longo ve li ospana. (Omayeletumbulo 11:14) Opa li pa totwa eespana dokutoloka mounyuni aushe. Keembelewa da kula dEendombwedi daJehova okwa totwa Oshikondo shOkutoloka opo shi kwafele eespana dokutoloka mokunyamukula omapulo ovatoloki nokukwafela eespana domalaka a yoolokafana di toloke Ombiibeli — Etoloko lOunyuni Mupe monghedi ya faafana. Opa li yo pa totwa osistema yopakompiyuta hai ifanwa Watchtower Translation System opo i kwafele ovatoloki vOmbiibeli. Osistema oyo ohai kwafele ovatoloki va mone nghee Oshiingilisha sha toloka oshitya keshe shOshiheberi noshOshigreka, naasho ohashi va kwafele va hoolole oitya oyo tai wapalele. Ndele nande ongaho, oilonga yokutoloka otai pula ombuda. Osistema oyo oye shi ningifa shipu kovatoloki opo va toloke Ombiibeli — Etoloko lOunyuni Mupe, i li paushili noya yela ngaashi naanaa yOshiingilisha.

Ohatu ku ladipike u konakone Ombiibeli — Etoloko lOunyuni Mupe lOmishangwa dopaKriste dOshigreka. Oto dulu oku i lesha kointaneta ile ko-JW Library, ile oku i pewa meongalo lEendombwedi daJehova olo li li moshitukulwa sheni. Eshi to ka lesha Ombiibeli oyo oto ka mona kutya: oya yela, oipu okulesha; oi na oikalimo oyo tai ku kwafele u mone noupu osho sha kundafanwa membo keshe notai ku kwafele yo u mone eevelise donhumba meendelelo; omu na yo Oshikongifo shoitya yOmbiibeli osho shi li ekwafo. Osho sha fimanenena, oto dulu okulesha Ombiibeli oyo u na elineekelo kutya oi na etumwalaka laKalunga li li paushili melaka olo hali popiwa kunena.

Omafatululo oitya yOmbiibeli: Omwa fatululwa oitya ihapu oyo ya longifwa mOmbiibeli