Ahowe, opulaneta yedu kai na efiku i hanaunwe po, i xwikwe po momundilo ile i pingenwe po. Ombiibeli otai hongo kutya Kalunga okwa shita edu li kalwe fiyo alushe.

•   “Ovayuki, vo otava ka fyuulula oshilongo, ndele tava kala mo alushe.” — Epsalme 37:29.

•   ‘Kalunga edu okwe li shitila keengudi dalo, lo liha tengauke nande fiyo alushe.’ — Epsalme 104:5.

•   ‘Edu otali kala po fiyo alushe.’ — Omuudifi 1:4.

•   “Ou a ma edu ndele te li wapaleke; okwe li pameka, . . . ine li shita li kale ombuwa, ndelenee okwe li ma li kalwe.” — Jesaja 45:18.

 Kalunga ita efa ovanhu va nyonaune edu filufilu moku li nyateka, noita ile meenghedi dimwe vali. Ponhele yaasho, ota ka ‘hanauna po ovo tava nyono edu.’ (Ehololo 11:18) Osho ote ke shi wanifa po ngahelipi?

 Kalunga ota ka pingena po omapangelo opanhu, oo a dopa okwaamena edu, nOuhamba womeulu. (Daniel 2:44; Mateus 6:9, 10) Ouhamba oo otau ka pangelwa kOmona waKalunga, Jesus Kristus. (Jesaja 9:6, 7) Eshi Jesus a li kombada yedu okwa li a longa oikumwifilonga a pangele eenghono domeshito. (Markus 4:35-41) Edu nosho yo oinima aishe otai ka kala mepashukilo laJesus, oo e li Ohamba yOuhamba waKalunga. Ota ka shitulula ile ta ka ningulula eenghalo kombada yedu di kale ngaashi da li moshikunino shaEden. — Mateus 19:28; Lukas 23:43.

 Ahowe, hasho nandenande. Omutotolombo wa tya ngaho owa holoka po omolweudeko la puka li na sha na 2 Petrus 3:7, oo a ti: “Eulu nedu lopaife oya tuvikililwa omundilo.” Didilika oitwa ivali ya fimana oyo ye tu kwafela tu ude ko eityo lomushangwa oo:

1.   Ombiibeli oya longifa omautumbulilo ngaashi “eulu,” ‘edu’ nosho yo “omundilo” tai ulike koinima i dulife pushimwe. Pashihopaenenwa, Epsalme 33:8 ola ti: “Edu alishe nali tile Omwene.” Apa, “edu” otali ulike kovanhu aveshe kombada yedu.

2.   Oshikalimo sha 2 Petrus 3:7 osha ulika eityo leulu, edu nosho yo omundilo oo wa tumbulwa mo. Ovelishe 5 nosho yo 6 otadi popi shi na sha nefiku lEyelu laNoa. Poshiningwanima osho, ounyuni owa li wa hanaunwa po, ashike opulaneta yetu opo i li natango. Ponhele yaasho, Eyelu ola li la kombolola po ovanhu aveshe ovakolokoshi ile tu tye “edu.” (Genesis 6:11) Ola li yo la hanauna po “eulu,” ovanhu ovo va li tava pangele kombada yedu. Onghee hano, ovanhu ovakolokoshi ova li va hanaunwa po, ndele hapulaneta yetu. Noa noukwaneumbo waye ova li va xupa pehanauno lounyuni oo, nova ka kala kombada yedu konima yEyelu. — Genesis 8:15-18.

 Ngaashi ashike omeva Eyelu, “omundilo,” oo wa tumbulwa mu 2 Petrus 3:7, otau ka hanauna ashike ovanhu ovakolokoshi, ndele hapulaneta yEdu. Kalunga okwa udaneka “eulu lipe nedu lipe” omo “tamu ka kala ouyuki.” (2 Petrus 3:13) “Edu lipe,” ile ovanhu ovo tava ka kala kombada yedu otava ka pangelwa ‘keulu lipe’ ile kepangelo lipe, Ouhamba waKalunga. Koshi yepangelo lOuhamba oo, edu otali ka ninga oparadisa i na ombili. — Ehololo 21:1-4.