Oshipango osho tashi ti “eisho omeisho” osha hala okutya ngahelipi?
Enyamukulo lopaMbiibeli
Omhango “eisho omeisho” oya li oshitukulwa shOmhango yaMoses oyo Kalunga a li a pa Ovaisreal vonale, na Jesus okwa li a tofa eendjovo odo mEudifo laye lokOmhunda. (Mateus 5:38; Exodus 21:24, 25; Deuteronomion 19:21) Osho osha hala okutya ngeenge omunyoni ta handukilwa, okwa li e na okuhandukilwa shi fike pominyonena odo a longa. a
Omhango oyo oya li ya yukifwa kwaavo hava ningile vakwao ominyonena owina. She likolelela komunyoni oo a ningila owina, Omhango yaMoses oya ti: “Okuteka omokuteka, eisho omeisho, eyoo omeyoo. Ondjo tuu pwaayo ye e i tula molutu lamukwao, ye e i tulwe yo.” — Leviticus 24:20.
Elalakano lomhango “eisho omeisho” ola li lashike?
Omhango “eisho omeisho” kaya li ya pa ovanhu pauhandimwe oufemba wokushunifila vakwao owii. Ponhele yaasho, oya kwafela ovapanguli ovo va nangekwa po opo va tokole pandjele.
Omhango oyo oya li yo tai longo nokwaavo va li va hala ile va diladila okuningila vakwao ominyonena. Ombiibeli oya ti: “Novakwao ngeenge tave shi udu otava kala nokutila, opo paha kale vali ou ta ningi owii wa tya ngaha mokati keni.” — Deuteronomion 19:20.
Mbela omhango “eisho omeisho” oi na okutulwa moilonga kOvakriste?
Ahowe, omhango oyo itai longo vali kOvakriste. Oshipango osho osha li oshitukulwa shOmhango yaMoses, oyo ya li ya xulifwa po kuJesus eshi a yandja ekulilo. — Ovaroma 10:4.
Ndele nande ongaho, omhango oye tu kwafela tu mone nghee Jehova ha diladila. Pashihopaenenwa, oya ulika kutya Jehova okwa lenga ouyuki. (Epsalme 89:14) Otai holola yo kutya omifikamhango daye odi li pauyuki, ngaashi kutya ovanyoni ove na ‘okuhandukilwa nondjele.’ — Jeremia 30:11.
Omitotolombo di na sha nomhango “eisho omeisho”
Omutotolombo: Omhango “eisho omeisho” oya li unene ya kwata moiti.
Oshili: Omhango kaya li ya pitika omunhu a ungaungwe naye nonyanya ile a hepekwe. Ponhele yaasho, opo ovatokoli ovo va pyokoka va tule moilonga oshipango osho ova li ve na tete okukonakona ngeenge enyono ola ningilwa owina ile hasho. (Exodus 21:28-30; Numeri 35:22-25) Omhango “eisho omeisho” oya li hai kwafele omunyoni opo kaa handukilwe nonyanya.
Omutotolombo: Omhango “eisho omeisho” oya li ya yandja oufemba opo ovanhu va kale tave lishunine owii.
Oshili: Omhango yaMoses oya popya ya ti: “Ovanhu vomoshiwana shoye ino va kwatela onghone noino va tonda.” (Leviticus 19:18) Ponhele omhango i ladipike ovanhu va kale tava shunifilafana owii, oye va ladipika va kale ve lineekela muKalunga nokweefa ovatokoli va yukife oinima. — Deuteronomion 32:35.
a Efinamhango olo omafimbo amwe ohali yukifwa koshitya shOshilatin osho tashi ti lex talionis, nola li yo la hangika momaufwamhango amwe omoiwana yonale.
Otashi dulika yo u hafele oikundafanwa ei
OSHUNGONANGELO
Omhango oyo Kalunga a pa Ovaisrael oya li ngoo pauyuki?
Omafinamhango ane oo a li haa wilike ovatokoli vaIsrael.
OSHUNGONANGELO
Nghee hatu dulu okweefa po outondwe — Ino kwata onghone
Finda oukwatya wonghone, u na elineekelo kutya mafiku Kalunga ota ka xulifa po owii aushe.
OMBIIBELI OHAI LUNDULULA ONGHALAMWENYO YOVANHU
Onda kala nda hala okukondjifa okuhenouyuki
Rafika okwa li a ya mongudu yonhumba opo a kondjife okuhenouyuki. Ndele okwa li e lihonga kombinga yomaudaneko Ombiibeli e na sha nombili nouyuki oo tau ka etwa kOuhamba waKalunga.
KOMBINGA YETU
Pula u talelwe po
Kundafaneni kombinga yepulo lopaMbiibeli, ile u lihonge shihapu kombinga yEendombwedi daJehova.