Samuel wotete 10:1-27
10 Samuel okwa kufa oshanga yomaadi, ndele ta tile omaadi momutwe waSaul. Okwe mu xupita, ndele ta ti: “Jehova okwe ku vaeka u ninge omuwiliki woshiwana shaye.
2 Ngeenge owa di po pwaame nena, oto ka hanga ovalumenhu vavali ve li popepi nombila yaRakel, moshitukulwa shaBenjamin, puSelsa, notave ke ku lombwela tava ti: ‘Eendongi odo wa ka kongele oda monika, ashike xo okwa dimbwa kombinga yeendongi odo, note lipula ashike shi na sha nanye. Xo ote lipula kutya, “Nandi ninge ngahelipi shi na sha nomonamati wange?”’
3 Okudja opo, inda fiyo okomuti wa kula muTabor, opo to ka shakena novalumenhu vatatu tava i kuKalunga kashili kuBetel, umwe okwa humbata oukombwena vatatu, mukwao okwa humbata omingome nhatu, namukwao okwa humbata oshitoo sha kula shomaviinyu.
4 Otave ke ku popifa, ndele tave ku pe omingome mbali, nou na oku di tambula.
5 Konima yaasho, oto ka ya koshikulundudu shaKalunga kashili, oko ku na ongudu yovakwaita Ovafilisti. Ngeenge mwa i moshilando, otamu ka shakena nongudu yovaprofeti tai di koshikulundudu shiyapuki novanhu ve va li komesho, tava shiki oshishikomwa sheengodi, eenyalilo nokaxumbafeta, notava denge okangoma, ofimbo ovaprofeti tava xunganeke.
6 Jehova ote ke ku pa eenghono nomhepo yaye, noto ka xunganeka pamwe navo, ndele to lunduluka u ninge omunhu umwe e lili.
7 Ngeenge oinima* aishe oyo oya wanifwa po, ninga keshe osho to dulu u wanife po oilonga yoye, molwaashi Kalunga kashili oku li pamwe naave.
8 Ou na okutetekela u ye kuGilgal, nohandi ke uya kwoove oko ndi yandje omaxwikiloyambo nomayambo oukumwe. Ou na okuteelela pa pite omafiku aheyali, fiyo osheshi nde uya kwoove, nohandi ke ku lombwela osho u na okuninga.”
9 Diva eshi Saul a piluka a dje po puSamuel, Kalunga okwa hovela okulundulula omutima waye u kale ngaashi womunhu umwe e lili, noinima aishe oyo oya wanifwa mefiku olo.
10 Onghee ova dja po opo, ndele tava i koshikulundudu, nongudu yovaprofeti oye mu shakeneka. Opo nee Kalunga okwe mu pa eenghono nomhepo yaye, ndele ta hovele okuxunganeka mokati kavo.
11 Eshi ovanhu aveshe, ovo va li ve mu shii ve mu mona ta xunganeke pamwe novaprofeti, ova pulafana tava ti: “Oshike sha ningwa po shi na sha nomonamati waKish? Saul naye oumwe womovaprofeti?”
12 Onghee omulumenhu umwe waako okwa ti: “Olyelye xe yavo?” Onghee opa totwa omupopyo tau ti: “Saul naye oumwe womovaprofeti?”
13 Eshi a mana okuxunganeka, okwa ya koshikulundudu shiyapuki.
14 Lwanima, omumwaina waxe yaSaul okwa pula Saul nomupiya waye a ti: “Omwa ile peni?” Saul okwa nyamukula a ti: “Otwa li twa ka konga eendongi, ashike inatu di mona, onghee otwa ya kuSamuel.”
15 Omumwaina waxe yaSaul okwa pula a ti: “Alikana lombwele nge kutya Samuel okwe mu lombwela shike?”
16 Saul okwe mu nyamukula a ti: “Okwe tu lombwela kutya eendongi oda monika nale.” Ashike Saul ine mu lombwela kutya ota ka ninga ohamba, ngaashi a lombwelwa kuSamuel.
17 Samuel okwa ongaleka ovanhu koshipala shaJehova muMispa,
18 ndele ta lombwele Ovaisrael ta ti: “Jehova Kalunga kaIsrael okwa ti ngaha: ‘Aame nda kufa mo Ovaisrael muEgipiti nonde mu xupifa momake Ovaegipiti noomauhamba aeshe oo a li tae mu hepeke.
19 Ndele nena omwa ekelashi Kalunga keni, oo e mu xupifa momaupyakadi nomomaudjuu eni aeshe, ndele tamu ti: “Ahawe, nangeka po ohamba i tu pangele.” Fikameni paife koshipala shaJehova pamapata eni nopamaludi* eni.’”
20 Onghee Samuel okwa ifana omapata aeshe aIsrael a ehene popepi, nepata laBenjamin olo la li la hoololwa.
21 Opo nee epata laBenjamin ola ehena popepi pamaludi alo, noludi laMatri olo la hoololwa. Xuuninwa, Saul, omonamati waKish, oye a li a hoololwa. Ashike eshi va li ve ke mu konga, inave mu mona.
22 Onghee ova pula Jehova va ti: “Omulumenhu oo okwe uya po ngoo apa?” Jehova okwa nyamukula a ti: “Oye winya a hondama meendongelwa.”
23 Onghee ova endelela, ndele tave mu kufa mo. Eshi a li a fikama mokati kovanhu, okwa li mule e dule ovanhu aveshe, novanhu ova li ashike ve mu tetela pomapepe.
24 Samuel okwa lombwela ovanhu aveshe a ti: “Taleni oo a hoololwa kuJehova, kape na nande oumwe e mu fa mokati kovanhu aveshe.” Ovanhu aveshe ova hovela okwiingida tava ti: “Ohamba, kala nomwenyo mule!”
25 Samuel okwa lombwela ovanhu osho ohamba ya teelela va ninge nokwe shi shanga membo, ndele te li tula metwalihangano laJehova. Opo nee Samuel okwa lekela ovanhu aveshe, nakeshe umwe okwa ya keumbo lavo.
26 Saul naye okwa ya keumbo lavo kuGibea, a waiminwa kovakwaita ovo omitima davo de linyengifwa kuJehova.
27 Ashike ovalumenhu vamwe ovakolokoshi ova tya: “Ou ote ke tu xupifa ngahelipi?” Onghee ove mu tonda noinave mu twaalela nande oshali yasha. Ndele ka li a popya sha.*
Eshangelo lopedu
^ Eln., “omadidiliko.”
^ Eln., “pamayovi.”
^ Eln., “Okwa li a fa omunhu oo iha popi.”
