Samuel wotete 16:1-23
16 Jehova okwa lombwela Samuel a ti: “Fiyo onaini to kala wa nyika oluhodi omolwaSaul, eshi inandi hala vali a kale ohamba yaIsrael? Yadifa oshanga yoye omaadi, ndele to i. Ohandi ke ku tuma kuIsai, Omubetlehem, molwaashi onde lihoololela ohamba mokati kovanamati vaye.”
2 Ashike Samuel okwa tya: “Ohandi i ko ngahelipi? Ngeenge Saul e shi udu, ota ka dipaa nge.” Jehova okwa nyamukula a ti: “Twaalela ongobe yondema, ndele to ti, ‘Onde uya okuyambela Jehova.’
3 Shiva Isai konhele oko to ka yambela, nohandi ke ku lombwela osho u na okuninga. Ou na okuvaekela nge oo handi ke ku ulikila.”
4 Samuel okwa ninga osho Jehova e mu lombwela. Eshi e uya kuBetlehem, ovakulunhu voshilando ova li tava kakama, eshi ve ke mu shakeneka, ndele tava ti: “Owe uya po ngoo nombili?”
5 Okwa tya: “Onde uya nombili. Onde uya okuyambela Jehova. Liyapuleni, ndele hatu yeni konhele oko handi ka yambela.” Opo nee okwa yapula Isai novanamati vaye, ndele te va shivi va ye konhele oko ta ka yambela.
6 Eshi ve uya mo, okwa mona Eliab, ndele ta ti: “Ou oye filufilu omuvaekwa waJehova.”
7 Ashike Jehova okwa lombwela Samuel a ti: “Ino yandja elitulemo keholokepo laye nokoule waye, molwaashi inandi mu hokwa. Osho omunhu ha tale kusho, hasho Kalunga ha tale kusho, molwaashi omunhu oha mono ashike eholokepo lokombada, ndele Jehova oha tale momutima.”
8 Isai okwa ifana Abinadab, nokwe mu eta kuSamuel, ndele Samuel ta ti: “Ou naye Jehova ine mu hoolola.”
9 Isai okwa eta vali Shamma, ndele Samuel ta ti: “Ou naye Jehova ine mu hoolola.”
10 Ovanamati vaheyali vaIsai ova twalwa kuSamuel, ndele Samuel ta ti kuIsai: “Jehova ina hoolola nande oumwe womwaava.”
11 Xuuninwa, Samuel okwa pula Isai a ti: “Ovanamati voye ovo aveke ava?” Isai okwa tya: “Ou munini ine uya natango, molwaashi okwa ka lifa eedi.” Opo nee Samuel okwa tya kuIsai: “Mu tuma a ka ifanwe ko, molwaashi itatu li ofimbo ine uya.”
12 Onghee okwe mu tuma a ka ifanwe, ndele ta etwa. Okwa li omunyasha e na omesho mawa, noku na eholokepo liwa. Opo nee Jehova okwa tya: “Fikama, mu vaeka, ou oye nda hoolola.”
13 Samuel okwa kufa oshanga yaye yomaadi, ndele te mu vaeke moipafi yovamwaina. Okudja mefiku olo, Jehova okwa kala ta pe David eenghono okupitila momhepo yaye. Lwanima, Samuel okwa fikama, ndele ta i kuRama.
14 Omhepo yaJehova oya dja mo muSaul, na Jehova okwe mu efa a hepekwe komhepo ya nyata.
15 Ovapiya vaSaul ova tya kuye: “Ou shi shii kutya Kalunga okwa efa omhepo ya nyata i ku hepeke.
16 Alikana, omwene wetu, lombwela ovapiya voye va konge omulumenhu oo e na ounongo wokushika okaxumbafeta. Opo nee ngeenge Kalunga a efa omhepo ya nyata i uye kwoove, omulumenhu oo ote ke ka shika, noto ka kala u li po xwepo.”
17 Opo nee Saul okwa tya kovapiya vaye: “Alikana, kongelei nge omulumenhu ou e shii oku ka shika nawa, ndele tamu mu eta kwaame.”
18 Umwe womovapiya vaye okwa tya: “Tala, onda mona omonamati waIsai, Omubetlehem, onghulungu mokushika okaxumbafeta, e na ouladi noku li omukwaita omunaenghono. Oku shii okupopya, e na ondjelo iwa, na Jehova oku li pamwe naye.”
19 Saul okwa tuma ovatumwa kuIsai, ndele ta ti: “Tumine nge omonamati woye David, oo e li koimuna.”
20 Onghee Isai okwa londeka omingome kondongi, okakutu* komaviinyu ka longwa moshipa nosho yo okakombo, ndele te i tumu i ye nomonamati waye, David, kuSaul.
21 David okwe uya kuSaul, ndele ta hovele oku mu longela. Saul okwa kala e mu hole neenghono, nokwa li a ninga omuhumbati woilwifo yaye.
22 Saul okwa tuma etumwalaka kuIsai tali ti: “Alikana David na kale ta longele nge, molwaashi onde mu hokwa.”
23 Ngeenge Kalunga a efa omhepo ya nyata i ye muSaul, David oha kufa okaxumbafeta noku ka shika, na Saul oha kala a pepelelwa noha kala e li xwepo, nomhepo ya nyata ohai di mo muye.
Eshangelo lopedu
^ Ile “okandini.”
