Samuel wotete 2:1-36
2 Hanna okwa ilikana a ti:
“Omutima wange owa hafa omolwaJehova;Jehova okwa pa nge eenghono.*
Ovatondi vange ohandi va nyamukula nouladi,Osheshi onda hafa eshi wa xupifa nge.
2 Kape na nande oumwe muyapuki a fa Jehova,Kape na nande oumwe, oove auke.
Kalunga ketu oove auke u na eenghono ngaashi emanya.
3 Inamu kala hamu popi nelinenepeko;Momakanya eni inamu dja eendjovo dowii,Osheshi Jehova oKalunga e na eshiivo,Noye ta konakona pauyuki oilonga yomunhu keshe.
4 Omauta ovalumenhu ovanaenghono ote a teyaula po,Naavo vehe na eenghono* ote va pe eenghono.
5 Ovo va lya nawa otava ka longela vamwe, opo ve limonene omungome,Naavo va fya ondjala itava ka fya vali ondjala.
Ongadji otai ka dala ounona vaheyali,Nomukainhu oo e na ounona vahapu ita ka dala vali.*
6 Jehova ota dulu okudipaa, nota dulu okukaleka nomwenyo;*Ota dulu okutwala mOmbila,* nota dulu okupendula po.
7 Jehova ota dulu okuningifa omunhu ohepele, nota dulu okupunapalifa;Ota dulu okuninipika, nota dulu okunenepeka.
8 Oha pendula ovafyoona mondwi yedu,Noha yambula eehepele monduba yomute,*
Opo e va kaleke omutumba pamwe nomalenga,Noku va pe oshipundi shefimano.
Omakanghameno edu oaJehova,Noitukulwa iwa yedu okwe i tenheka kuo.
9 Oha pashukile eenghatu dovadiinini vaye,Ashike ovakolokoshi otava ka hanaunwa po momilaulu,Osheshi omunhu ke li po keenghono dopanhu.
10 Jehova ota ka mweneka ovo tave mu kondjifa;*Ote ke va handukila nehandu la fa omipwalakato tadi di keulu.
Jehova ota ka tokola ovanhu fiyo okominghulo dedu,Ota ka pa ohamba yaye eenghono,Nota ka yandja eenghono komuvaekwa waye.”*
11 Opo nee Elkana okwa ya keumbo laye kuRama, ashike omonamati waye okwa kala ta longele* Jehova koshi yepashukilo lomupristeri Eli.
12 Ovanamati vaEli ova li hava longo owii; kava li hava tila Jehova.
13 Eshi osho va li hava ningi shi na sha noitukulwa yovapristeri oyo ya dja kovanhu: Ngeenge omunhu ta yambe eyambo, omuyakuli womupristeri ohe uya e na efoloko la kula meke laye, eshi ombelela tai fuluka.
14 Opo nee ohe li tu moshiyaxa, mombiya yoikongo ivali, mombiya yakashitenda, ile mombiya yoshikongo shimwe. Keshe osho tashi di mo nefoloko, omupristeri ohe shi kufa ko shi ninge shaye. Osho osho va li hava ningile Ovaisrael aveshe ovo tave uya kuSilo.
15 Natango, ofimbo oinghene yeyambo inai xwikwa, opo i dje omwifi, omuyakuli womupristeri ohe uya, ndele ta lombwele omunhu oo a eta eyambo ta ti: “Pa omupristeri ombelela a ka yofe. Ita ka tambula ko ombelela ya telekwa momeva oyo to mu pe, ndele oyoyo ashike inai pya.”
16 Ngeenge omunhu oo okwe mu nyamukula a ti: “Teelela manga oinghene i xwikwe, opo u likufile po nawa osho wa hala,”* oha ti: “Ahawe, shi pe nge paife, ngeenge hasho, ohandi shi ku kufa keenghono!”
17 Onghee omanyono ovayakuli ovo okwa li a kwata moiti neenghono kuJehova, molwaashi kava li hava ungaunga nefimaneko nomayambo aJehova.
18 Samuel okwa li ha longele* Jehova a djala* okatetahema koliina, nonande okwa li okamatyona.
19 Natango, ina okwa li he mu ningile oundjafa vehe na omaoko, nokwa li he ve mu etele omudo keshe, eshi te uya nomushamane waye va yambe eyambo lokomudo.
20 Eli okwa nangeka noupuna Elkana nomukulukadi waye, ndele ta ti: “Jehova ne ku pe okaana taka di momukulukadi ou ponhele yaako a yandja kuJehova.” Opo nee ova shuna keumbo.
21 Jehova okwa dimbuluka Hanna, nokwa ninga oufimba, ndele ta dala oumati vatatu noukadona vavali. Okamati Samuel oka enda taka kulu taka longele Jehova.*
22 Eli okwa li a kulupa neenghono, ashike okwa li a uda oinima aishe oyo ovanamati va li tava ningile Ovaisrael aveshe, nonghee hava nangala novakainhu ovo va li hava longele poshivelo shetwali lokwoongalela.
23 Okwa li ha ti kuvo: “Omolwashike tamu twikile okuninga oinima i li ngaho? Osheshi oinima oyo nda uda kovanhu aveshe kombinga yeni oii.
24 Xulifei po oshinima osho ovana vange. Ehokololo olo ndi udite le lihanena movapiya vaJehova kaliwa.
25 Ngeenge omunhu a nyono komunhu mukwao, umwe ota dulu oku mu ilikanena kuJehova,* ndele ngeenge omunhu a nyono kuJehova, olyelye ta dulu oku mu ilikanena?” Ashike kava li va pwilikina kuxe, na Jehova okwa li a tokola oku va dipaa.
26 Mokweendela ko kwefimbo, okamati Samuel oka enda taka kulu noka kala ka hokiwa kuJehova nokovanhu.
27 Omulumenhu umwe a tumwa kuKalunga, okwe uya kuEli, ndele ta ti kuye: “Jehova okwa ti ngaha: ‘Mbela inandi lihololela eumbo laxo, eshi va li muEgipiti ve li ovapika meumbo laFarao?
28 Okwa li a hoololwa mokati komapata aeshe aIsrael a ninge omupristeri wange noku ye koaltari yange a ka yambe omayambo, a ka yandje oitwimifo* noku humbate okatetahema moipafi yange. Onda yandja yo keumbo laxokulululwa omayambo aeshe oo taa yambwa kOvaisrael* okupitila momundilo.
29 Omolwashike itamu ungaunga nefimaneko* nomayambo ange nosho yo eeshaliyambo odo nda popya di yambelwe monhele yange? Omolwashike wa kala to fimaneke ovanamati voye shi dulife nge, eshi mwa kala tamu lipalula noitukulwa ya denga mbada yomayambo aeshe oo taa yambwa koshiwana shange Israel?
30 “‘Onghee ondjovo yaJehova Kalunga kaIsrael oya ti: “Onda ti kutya eumbo loye neumbo laxokulululwa otaa ka longela nge alushe.” Ashike paife Jehova okwa ti: “Osho itandi ka efa vali shi ningwe, molwaashi ohandi ka fimaneka ou ta fimaneke nge, ndele ovo tava dini nge, otava ka dinika.”
31 Tala, efimbo otali uya eshi handi ke mu kufa eenghono,* ove neumbo laxo, opo meumbo loye muha kale omulumenhu ta kala nomwenyo fiyo omoukulupe.
32 Pefimbo opo handi ka ningila Israel ouwa, oto ka mona ashike omutondi monhele yange, nomeumbo loye itamu ka kala vali omunamido.
33 Ovalumenhu vomoludalo loye, ovo inandi kufa moilonga yokulonga koaltari yange, otava ka twikifa omesho oye notave ke ku nyikifa oluhodi,* ashike vahapu vomeumbo loye otava ka fya keongamukonda.
34 Osho tashi ka ningilwa ovanamati voye vavali, Hofni naPinehas, otashi kala edidiliko kwoove: Aveshe otava ka fya mefiku limwe.
35 Opo nee ohandi ka nangeka po omupristeri wange omudiinini. Ota ka wanifa po ehalo lange;* ohandi ke mu tungila eumbo tali kalelele, ndele ta kala alushe omupristeri womuvaekwa wange.
36 Keshe oo ta ka fyaala meumbo loye, ote ke uya, note ke linyongamena kuye a futwe oimaliwa nomungome, ndele ta ti: “Alikana, pe nge oilonga youpristeri, opo ndi dule okulya oshipambu shomungome.”’”
Eshangelo lopedu
^ Ile “okwa yelula oluvinga lange.”
^ Ile “ovo tava punduka.”
^ Eln., “ota ka ka.”
^ Ile “okuyandja omwenyo.”
^ Sha hala okutya, kOufi. Tala Omafatululo oitya.
^ Ile tashi dulika, “moshala shoimbodi.”
^ Ile tashi dulika, “Ovo tava kondjifa Jehova otava ka tilifwa.”
^ Eln., “ota ka tumbaleka oluvinga.”
^ Ile “ta yakula.”
^ Ile “osho omwenyo woye wa hala.”
^ Ile “ha yakula.”
^ Ile “e limanga.”
^ Ile “moipafi yaJehova.”
^ Ile tashi dulika, “Kalunga ote ke mu tokola.”
^ Ile tashi dulika, “e ke i twimikile.”
^ Eln., “ovanamati vaIsrael.”
^ Eln., “tamu lyata.”
^ Eln., “okwooko.”
^ Ile “otava ka lolola omwenyo woye.”
^ Ile “osho shi li momutima wange naasho shi li momwenyo wange.”
