Samuel wotete 4:1-22
4 Samuel okwa twikila okupopya nOvaisrael aveshe.
Opo nee Ovaisrael ova ya va ka shakeneka Ovafilisti molwoodi. Ovaisrael ova li va onga onhanda popepi naEben-eser, nOvafilisti ova li va onga onhanda muAfek.
2 Ovafilisti ova li ve lilongekidila olwoodi va ka lwife Ovaisrael, ashike olwoodi olo ola li la kwata moiti neenghono, nOvaisrael ova li va findwa kOvafilisti. Ova dipaa ovalumenhu 4 000 lwaapo, ovo va li ponhele yolwoodi.
3 Eshi ovanhu va shuna konhanda, ovakulunhu vOvaisrael ova tya: “Omolwashike Jehova a efa tu findwe* nena kOvafilisti? Natu ka taleni oshikefa shehangano laJehova kuSilo, opo shi kale pufye shi tu xupife momake ovatondi vetu.”
4 Onghee ovanhu ova tuma ovalumenhu kuSilo, nova dja ko noshikefa shehangano laJehova, Kalunga komatangakwaita, oo e li omutumba kolukalwapangelo pombada* yovakerubi. Ovanamati vavali vaEli, Hofni naPinehas, navo ova li pamwe noshikefa shehangano laKalunga kashili.
5 Diva eshi oshikefa shehangano laJehova she uya monhanda, Ovaisrael aveshe ova ingida pombada, nedu ola kakama.
6 Eshi Ovafilisti va uda omaweelelo oo, ova tya: “Omolwashike monhanda yOvaheberi mu na omaweelelo e li pombada?” Xuuninwa, ova ka uda kutya Oshikefa shaJehova oshe uya monhanda.
7 Ovafilisti ova li va tila, ndele tava ti: “Kalunga okwe uya monhanda!” Onghee ova tya vali: “Otwa hangwa koupyakadi, osheshi oshinima sha tya ngaha inashi ningwa nale!
8 Otwa hangwa koupyakadi! Olyelye te ke tu xupifa momake aKalunga munene? Oo oye Kalunga oo a dipaa Ovaegipiti nedipao linyanyalifi mombuwa.
9 Ovafilisti nye, kaleni ovaladi, ndele tamu katuka ngaashi ovalumenhu elela, opo muha longele Ovaheberi ngaashi ve mu longela. Katukeni ngaashi ovalumenhu elela nokulwa!”
10 Onghee Ovafilisti ova lwa, nOvaisrael ova findwa, nakeshe umwe okwa faduka po a ya ketwali laye. Edipao olo ola li linyanyalifi neenghono; ovakwaita vokolupadi Ovaisrael 30 000 ova fya.
11 Oshikefa shaKalunga osha li yo sha kwatwa ko, novanamati vavali vaEli, Hofni naPinehas, ova fya.
12 Omulumenhu Omubenjamin okwa tondoka a dja ponhele yolwoodi, nokwa fika kuSilo mefiku olo, a djala oikutu ya pombauka noku na edu momutwe waye.
13 Eshi omulumenhu oo a fika, Eli okwa li omutumba popepi nondjila ta tale, molwaashi omutima waye owa li tau kakama omolwOshikefa shaKalunga kashili. Omulumenhu oo okwa ya moshilando nokupopya osho sha ningwa po, noshilando ashishe osha hovela okulilaana.
14 Eshi Eli a uda elilaano, okwa pula a ti: “Omaweelelo oashike oo?” Omulumenhu oye tuu oo okwa endelela, ndele ta ka lombwela Eli osho sha ningwa po.
15 (Pefimbo opo, Eli okwa li e na eedula 98, nokwa li a mana mo omesho ta tale, ndele ka li e wete ko.)
16 Opo nee omulumenhu oo okwa tya kuEli: “Ame onda dja konhele yolwoodi! Onda tondoka nda dja konhele yolwoodi nena eli.” Eli okwa pula a ti: “Mumati wange, oshike sha ningwa ko?”
17 Onghee, omulumenhu oo a eta etumwalaka okwa tya: “Ovaisrael ova faduka po Ovafilisti, nova findwa filufilu, navahapu ova fya. Ovanamati voye vavali, Hofni naPinehas, ova fya yo, nOshikefa shaKalunga kashili osha kwatwa ko.”
18 Eshi a tumbula Oshikefa shaKalunga kashili, Eli okwa wa ko koshipundi, osho sha li popepi nomuvelo, nokwe lidenga po ongali, ndele ofingo yaye tai teka nokwa fya, osheshi okwa li a kulupa nokwa li e na olutu linene. Okwa kala omutokoli muIsrael oule weedula 40.
19 Oshitenya shaye, omukulukadi waPinehas, okwa li omufimba nokwa li popepi nokudala. Eshi a uda ehokololo kutya Oshikefa shaKalunga kashili osha kwatwa ko nosho yo kutya xemweno nomushamane waye ova fya, osha li she mu yahameka unene, ndele ta hovele okufetwa ombadilila nokwa mona okaana.
20 Eshi a li pokufya, ovakainhu ovo va li tave mu kwafele ova tya: “Ino tila, osheshi owa dala okaana okamati.” Ka li a nyamukula, noka li a yandja elitulemo kusho.*
21 Ashike okaana oko kokamati okwe ka luka Ikabod,* a ti: “Efimano ola dja mo muIsrael la ya moukwatwa,” ta ulike kOshikefa shaKalunga kashili osho sha kwatwa po, naasho sha ningilwa xemweno nosho yo omushamane waye.
22 Okwa ti: “Efimano ola dja mo muIsrael la ya moukwatwa, molwaashi Oshikefa shaKalunga kashili osha kwatwa ko.”
Eshangelo lopedu
^ Eln., “Omolwashike Jehova e tu finda?”
^ Ile tashi dulika, “pokati.”
^ Ile “noka li e shi tula komutima.”
^ Tali ti “Efimano oli li peni?”
