Exodus 34:1-35
34 Jehova okwa lombwela Moses, a ti: “Lihongela oipelende ivali yomamanya ya fa inya yotete, nokoipelende oyo ohandi ka shanga ko eendjovo odo da li koipelende yotete, oyo wa tatula.
2 Lilongekida ongula, osheshi oto ka ya komhunda yaSinai ongula noto ka kala ofika koshipala shange koxulo yomhunda oyo.
3 Ashike hamunhu a i pamwe naave, nokomhunda oyo inaku monika nande omunhu umwe. Eedi neengobe nado kadi na okulya popepi nomhunda oyo.”
4 Onghee Moses okwa honga oipelende ivali yomamanya ya fa inya yotete nokwa penduka ongula inene, ndele ta i komhunda yaSinai, ngaashi ashike Jehova a li e mu lombwela, nokwa kufa oipelende ivali yomamanya meke laye.
5 Opo nee Jehova okwe u ya moluudi loshilemo nokwa kala ofika puye komhunda oyo, ndele te mu hepaululile edina Jehova.
6 Jehova okwa pita po puye, ndele ta ti: “Jehova, Jehova, Kalunga omunanghenda nomunalukeno,* iha handuka diva noku na filufilu ohole i na oudiinini* nomunashili,*
7 ta ulikile ovanhu omayovi ohole i na oudiinini, ta dimi po omanyono nomatauluko nosho yo omatimba, ashike ita efa ina handukila nandenande ovo va nyona, ta handukile ovana novatekulu, epupi etitatu nepupi etine, omolwomanyono ooxe.”
8 Moses okwa twa eengolo diva pedu, ndele te linyongamene.
9 Opo nee okwa tya: “Jehova, ngeenge paife onda filwa onghenda koshipala shoye, alikana, Jehova, enda pamwe nafye u li mokati ketu, nonande fye ovanhu ovatangalali,* ndele to tu dimine po omanyono nomatimba etu, noku tu tambula ko tu li emona loye.”
10 Kalunga okwa tya: “Ohandi ningi ehangano: Ohandi ka ninga moipafi yovanhu voye aveshe oinima iwa oyo inai ningwa* nale kombada yedu alishe, ile moiwana aishe, novanhu aveshe ovo u li mokati kavo otava ka mona oilonga yaJehova, osheshi ohandi mu longele oikumwifilonga.
11 “Pwilikina kwaasho handi ku lombwele nena. Ohandi taataa mo moipafi yoye Ovaamori, Ovakaanan, Ovaheti, Ovaperesi, Ovahevi nOvajebusi.
12 Lungama uha ninge ehangano novakalimo vomedu omo to i, molwaashi otashi ka kala omwiyo mokati keni.
13 Ashike ou na okudikulula mo eealtari davo nokuhanauna po eengudimanya davo diyapuki nokutetaula po eepala davo diyapuki.*
14 Ku na okulinyongamena kukalunga umwe, osheshi Jehova* okwa hala okulongelwa oye aeke.* Oye Kalunga oo a hala okulongelwa oye aeke.
15 Lungama uha ninge ehangano novakalimo vomedu olo, molwaashi ngeenge tave linyongamene ookalunga kavo nokuyambela ookalunga kavo, umwe ote ke ku shiva noto ka lya oikulya oyo a yamba.
16 Opo nee oto ka kufa shili ovanakadona vavo vamwe va ninge vovanamati voye, novanakadona vavo otave ke linyongamena ookalunga kavo notava ka ningifa ovanamati voye ve linyongamene ookalunga kavo.
17 “Ino liningila ookalunga va hambulwa moivela.
18 “Ou na okudana Oshivilo shOmingome inadi ya Efulika. Oto ka lya omungome inau ya efulika, ngaashi ashike nde ku lombwela; ou na okuninga ngaho oule womafiku aheyali, peufwafimbo momwedi waAbib,* osheshi muEgipiti owa dile mo momwedi waAbib.
19 “Keshe omulumenhu oo a dalwa tete, ile oshimuna osho sha dalwa tete* oshange, mwa kwatelwa oimuna yeni aishe, kutya nee ongobe yondume, ile odi oyo ya dalwa tete.
20 Ondongi keshe ya dalwa tete ou na oku i pingakanifa* nodi. Nongeenge ino i pingakanifa, ou na oku i teya ofingo. Ou na okukulila ovanamati voye voiveli. Kape na ou e na okuholoka koshipala shange e li eenyala dongaho.
21 “Ou na okulonga oule womafiku ahamano, ashike mefiku etiheyali ou na okufuda po.* Nokuli nopefimbo lokulima nolokuteya ou na okufuda po.
22 “Ou na okudana Oshivilo shOivike, to yandje oiimati oyo ya pya tete pefimbo leteyo loilya yo-wheat, nosho yo Oshivilo shOkutuvikila* pexulilo lodula.
23 “Ovalumenhu vomoshiwana sheni aveshe ove na okuholoka koshipala shOmwene washili, Jehova, Kalunga kaIsrael, lutatu momudo.
24 Osheshi ohandi ka taataa po oiwana pwoove, ndele handi ka tamununa mo oshitukulwa shoye, nokape na oo ta ka kala a hala edu loye, eshi to ka ya u ka mone oshipala shaJehova, Kalunga koye, lutatu momudo.
25 “Ino yambela nge eyambo lohonde pamwe noshinima keshe sha ya efulika. Eyambo loshivilo shOpaasa kali na okutuvikilwa oufiku aushe fiyo ongula.
26 “Oiimati iwa elela, oyo ya pya tete mepya loye, ou na oku i twala keumbo laJehova, Kalunga koye.
“Ino fulukifa okakombwena momashini aina.”
27 Jehova okwa twikila okulombwela Moses, ta ti: “Ou na okushanga eendjovo edi, molwaashi ohandi ningi ehangano naave nosho yo naIsrael metwokumwe neendjovo edi.”
28 Moses okwa kala pamwe naJehova komhunda oyo oule womafiku 40, omutenya noufiku. Ka li a lya omungome noka li a nwa omeva. Kalunga okwa shanga koipelende eendjovo di na sha nehangano, Oipango Omulongo.*
29 Opo nee Moses okwa dja ko komhunda yaSinai, nokwa li e na oipelende ivali yOumbangi meke laye. Eshi Moses a dja ko komhunda e uya pedu, ka li e shi shii kutya oshipala shaye otashi vilima, eshi a kala ta popi naKalunga.
30 Eshi Aron nOvaisrael aveshe va mona Moses, ova li va mona kutya oshipala shaye otashi vilima nova li va tila okweehena popepi naye.
31 Ashike Moses okwe va ifana, onghee Aron nomalenga aeshe ongudu oyo ove uya kuye, na Moses okwa popya navo.
32 Konima yaasho, Ovaisrael aveshe ove uya popepi naye, nokwe va pa oipango aishe oyo Jehova e mu pa komhunda yaSinai.
33 Ngeenge Moses a mane okupopya navo, oha uvike oshipala shaye.
34 Ashike ngeenge Moses ta i a ka popye naJehova, ohe liuvukulula, fiyo osheshi a dja po puye. Opo nee oha i pondje, ndele ta lombwele Ovaisrael oipango oyo a pewa.
35 Ovaisrael ova li va mona kutya oshipala shaMoses otashi vilima, na Moses okwa li a uvika oshipala shaye, fiyo osheshi a ka popya naKalunga.*
Eshangelo lopedu
^ Ile “noku na olune.”
^ Ile “ouwanghenda.”
^ Ile “nomudiinini.”
^ Eln., “ve na eefingo dikukutu.”
^ Ile “shitwa.”
^ Tala Omafatululo oitya.
^ Eln., “oo edina laye Jehova.”
^ Ile “ite lididimikile sha tashi longelwa ponhele yaye.”
^ Tala Oshiwedelwako B15.
^ Eln., “keshe osho sha yeulula oshidalelo tete.”
^ Ile “kulila.”
^ Ile “okudiinina eshabata.”
^ Osho hashi ifanwa yo Oshivilo shOmatwali.
^ Eln., “Eendjovo Omulongo.”
^ Eln., “naye.”
