Exodus 37:1-29
37 Besaleel okwa li a ninga Oshikefa moiti yomwoonde. Oule washo womukokomoko omaludimbo* avali netata, ounene washo oludimbo limwe netata, noule washo wopombada oludimbo limwe netata.
2 Okwa li e shi vaeka noshingoli elela meni nokombada nokwe shi tula* omwooyo woshingoli we shi dingilila.
3 Konima yaasho, okwa li e shi ningila oikongo ine yoshingoli, pombada yomaulu asho ane, oikongo ivali okombinga imwe noikongo ikwao ivali okombinga ikwao.
4 Opo nee okwa li a ninga eepala moiti yomwoonde, ndele te di vaeke noshingoli.
5 Okwa li a tula eepala odo moikongo oyo i li momunghulo wOshikefa opo di dule okuhumbatifa Oshikefa.
6 Okwa li yo a ninga oshituviko moshingoli elela. Oule washo womukokomoko omaludimbo avali netata, nounene washo oludimbo limwe netata.
7 Opo nee okwa ninga ovakerubi vavali moshingoli sha hambulwa, nokwe va tula keembinga mbali doshituviko.
8 Omukerubi umwe okwa li kombinga imwe, nomukerubi mukwao okwa li kombinga ikwao. Okwa tula ovakerubi keembinga mbali doshituviko.
9 Ovakerubi vavali ova li va xwaananeka omavava avo mombada, va tuvikila oshituviko nomavava avo. Ova li va taalelafana nova taalelifa oipala yavo moshituviko.
10 Okwa li a ninga oshitaafula moiti yomwoonde. Oule washo womukokomoko omaludimbo avali, nounene washo oludimbo limwe, noule washo wopombada oludimbo limwe netata.
11 Okwe shi vaeka noshingoli elela, ndele te shi tula* omwooyo woshingoli we shi dingilila.
12 Okwa li e shi ningila omungenge we shi dingilila wounene u fike pomutamo weke,* noku shi tula* omwooyo woshingoli wa dingilila omungenge.
13 Natango, okwa li e shi ningila oikongo ine yoshingoli, ndele te i tula meehuke nhee omo mwa patelwa omaulu ane.
14 Oikongo, oyo oya li popepi nomungenge, i li oikwatifo yeepala odo da longifwa okuhumbata oshitaafula.
15 Okwa ninga yo eepala moiti yomwoonde dokuhumbatifa oshitaafula, ndele te di vaeke noshingoli.
16 Konima yaasho, okwa ninga moshingoli elela oilongifo yoposhitaafula, ouyaxa vasho, oukopi vasho, oiyaxa yasho nomakopi asho omo tamu kala tamu tilwa oikunwayambo.
17 Okwa ninga oshikwatelwalamba moshingoli elela. Oshikwatelwalamba okwa li e shi hambula. Oshitako shasho, efina lasho, omakopi asho, oikwatelo yasho neenhemo dasho, oya li oshitukulwa shimwe.
18 Mefina lasho omwa li mwa dja oitai ihamano, oitai itatu yoshikwatelwalamba okombinga imwe, noitai itatu okombinga ikwao.
19 Koshitai keshe shomoitai itatu okwa li omakopi atatu e li molupe leengala do-almond, pamwe noikwatelo nosho yo eenhemo, ya shikulafana. Koshitai keshe shomoitai ikwao itatu okwa li omakopi atatu e li molupe leengala do-almond, pamwe noikwatelo nosho yo eenhemo, ya shikulafana. Oitai oyo ihamano osho ya li ya dja mo ngaho mefina loshikwatelwalamba.
20 Mefina loshikwatelwalamba omwa li omakopi ane e li molupe leengala do-almond, pamwe noikwatelo nosho yo eenhemo, ya shikulafana.
21 Koshi yoitai ivali yotete, oyo ya dja mefina, okwa li oshikwatelo, noshikwatelo shikwao okoshi yoitai ivali ya shikula ko, noshikwatelo shikwao okoshi yoitai ivali ya shikula ko, osheshi mefina loshikwatelwalamba omwa dja oitai ihamano.
22 Oikwatelo noitai nosho yo oshikwatelwalamba ashishe osha li oshitukulwa shimwe shoshingoli elela, sha hambulwa.
23 Okwe shi ningila eelamba heyali noidimifo* nosho yo oikwatelwa yasho yomundilo yoshingoli elela.
24 Okwa li e shi ninga pamwe noilongifo yasho aishe moshitalenti* shoshingoli elela.
25 Opo nee okwa li a ninga oaltari yomatwimino moiti yomwoonde. Oya li i na eehuke nhee di fike pamwe, oule womukokomoko wayo oludimbo limwe, ounene wayo oludimbo limwe, noule wayo wopombada omaludimbo avali. Eembinga dayo oda li oshitukulwa shayo.
26 Okwe i vaeka noshingoli elela kombada yayo, oitukulwa yayo aishe neembinga dayo, nokwe i ningila* omwooyo woshingoli we i dingilila.
27 Okwe i ningila yo oikongo ivali yoshingoli pedu lomwooyo wayo, keembinga mbali da taalelafana, opo i kwate eepala odo da longifwa oku i humbata.
28 Konima yaasho, okwa ninga eepala moiti yomwoonde, ndele te di vaeke noshingoli.
29 Okwa ninga yo omaadi mayapuki okuvaeka noitwimifo yedimba liwa ya lumbakanifwa noukeka.*
Eshangelo lopedu
^ Oludimbo limwe oli fike peesendimeta 44,5. Tala Oshiwedelwako B14.
^ Ile “mela.”
^ Ile “mele.”
^ Eesendimeta 7,4 lwaapo. Tala Oshiwedelwako B14.
^ Ile “mela.”
^ Ile “noikwatifo.”
^ Oshitalenti shimwe oshi fike peekilograma 34,2. Tala Oshiwedelwako B14.
^ Ile “mela.”
^ Ile “ya fa ya longekidwa konghulungu yokuninga omaadi.”
