Job 38:1-41
38 Opo nee Jehova okwa nyamukula Job okudja moshikungulu shomhepo, a ti:
2 “Olyelye ou ta pengifa omayele ange,Nota popi ehe na eshiivo?
3 Alikana, nyatipala ngaashi omulumenhu;Ohandi ke ku pula, noto ka lombwela nge.
4 Owa li peni, eshi nda shita edu?
Lombwele nge, ngeenge oto diladila kutya ou udite ko.
5 Olyelye a tula po eemeta dalo, ngeenge ou shi shii,Ile olyelye a longifa ongodi e li mete?
6 Eengudi dalo oda tenhekwa kushike,Ile olyelye a tula po ekanghameno lalo,
7 Eshi eenyofi dongula da hafela pamwe,Novanamati aveshe vaKalunga* va hovela okuhambelela newi lopombada?
8 Nolyelye a kangheka efuta liha pite poivelo yalo,Eshi la ndwafuka mo moshidalelo,
9 Eshi nde li dika noilemo,Noku li tonyena* momilaulu fokofoko,
10 Eshi nde li tulila po ongaba,Nokutula oihakifo nomivelo dalo ponhele,
11 Nonda ti, ‘Oto dulu okuuya fiyo opapa, ndele ino koyelela po;Apa opo tapa xulile omakufikufi oye manene’?
12 Mbela owa wilikile ngoo nale* ongula,Ile owa ningifa eluwa li shiive onhele yalo,
13 Li ye kominghulo dedu,Nokutukumuna ko ovakolokoshi kulo?
14 Ohali lunduluka ngaashi elova la dengwa oshihako,Neholokepo lalo ohali monika ngaashi loshikutu.
15 Ashike ovakolokoshi itava efiwa va mone ouyelele,Nokwooko kwavo oko ku na eenghono okwa teka ko.
16 Mbela owa ya koshi elela keedjo defuta,Ile owa konakona oule womeva?
17 Mbela owa hololelwa omivelo defyo,Ile owa mona omivelo domilaulu fokofoko?*
18 Mbela ou shii ounene womutamo wedu?
Lombwele nge, ngeenge ou shii oinima aishe oyo.
19 Ouyelele ohau kala kombinga ilipi?
Nonhele yomilaulu oi li peni,
20 Opo u i twale koitukulwa yayo,Nou shiive omalila, oo a finda keumbo layo?
21 Mbela ou shii oinima ei, molwaashi wa dalwa nale,Nomuvalu weedula* doye muhapu?
22 Mbela owa ile nale meemhungulilo dolumi,*Ile owa mona eemhungulilo deemhawe,
23 Oyo nda tuvikilila efimbo loudjuu,Efiku lolwoodi noloita?
24 Okombinga ilipi ouyelele* hau lihanene,Nomhepo yokoushilo ohai dilile peni, ngeenge tai pepe kombada yedu?
25 Olyelye a xupa omukangha wefundja,Nokwa ninga elila loshikungulu shi na oilemo nomingungumo,
26 A lokife odula opo ihapa kala ovanhu,Mombuwa, omo muhe na ovanhu,
27 A tutike edu, olo la kukuta nola mbuwala,Nokuningifa omwiidi u twiyuke?
28 Mbela odula oi na xe,Ile olyelye xe yomume?
29 Oikangwameva oya dja moshidalelo shalyelye,Nolyelye a dala oikangwameva yokeulu,
30 Eshi omeva a tuvikilwa a fa a tuvikilwa nemanya,Nokombada yomeva omoule kwa kukuta kwa ninga ekuma?
31 Mbela oto dulu okumanga eengodi deengudu deenyofi da-Kimah*Ile okumangulula eengodi deengudu deenyofi da-Kesil?*
32 Mbela oto dulu okuwilika ongudu yeenyofi* pefimbo layo,Ile oto dulu okuwilika ongudu yeenyofi ya-Ash* pamwe novanamati vayo?
33 Mbela ou shii eemhango, odo hadi wilike eulu,Ile oto dulu okutula eenghonopangelo dalo* kombada yedu?
34 Mbela oto dulu okuhanyena oilemo nondaka yoye,U ningife omeva efundja e ku tuvikile?
35 Mbela oto dulu okwiifana ouyelele wokashelu?
Mbela otau ke uya, ndele tau ti kwoove, ‘Aame ou.’
36 Olyelye a tula ounongo moilemo,*Ile a yandja eshiivo koinima* yomewangadjo?
37 Olyelye omunaendunge elela a valule oilemo,Ile olyelye ta dulu okutilashi omeva okeulu,
38 Eshi ondwi ihapu tai pepwa,Nomakuma edu tae likwata kumwe?
39 Mbela oto dulu okunyangela onghoshi oikulya,Ile okukutifa eenghoshi deenyasha,
40 Ofimbo de livata po momangade ado,Ile da nangela momakololo ado?
41 Olyelye ha longekidile ekola oikulya,Ngeenge oudilona valo tava pula ekwafo kuKalungaNokweelaela, molwaashi vehe na oikulya?
Eshangelo lopedu
^ Omupopyofano wOshiheberi tau ulike kovaengeli, ovanamati vaKalunga.
^ Ile “dingila.”
^ Eln., “pomafiku oye.”
^ Ile “domudidimbe wefyo.”
^ Eln., “womafiku.”
^ Ile “do-snow.”
^ Ile tashi dulika, “okashelu.”
^ Tashi dulika Ongudu yeenyofi heyali.
^ Tashi dulika Omukongo.
^ Tashi dulika Ombwa ya kula (Ombwa inene.)
^ Ile tashi dulika, “Daye.”
^ Ile tashi dulika, “momunhu.”
^ Ile tashi dulika, “momadiladilo.”
