Levitikus 19:1-37
-
Eemhango da yoolokafana di na sha nouyapuki (1-37)
19 Jehova okwa popya vali naMoses, ta ti:
2 “Popya nongudu aishe yOvaisrael u i lombwele kutya, ‘Omu na okukala ovayapuki, molwaashi ame Jehova, Kalunga keni, omuyapuki.
3 “‘Keshe umwe womunye oku na okufimaneka* ina naxe, nomu na okudiinina omashabata ange, aame Jehova, Kalunga keni.
4 Inamu longela ookalunga vehe na ekwafo lasha, ile mu liningile ookalunga va hambulwa moivela. Aame Jehova, Kalunga keni.
5 “‘Ngeenge tamu yambele Jehova omayambo oukumwe, omu na oku a yandja monghedi ya yuka, opo e a tambule ko.
6 Oku na okuliwa mefiku olo a yambwa nomefiku la shikula. Ashike osho sha xupa po fiyo omefiku etitatu, oshi na okuxwikwa po momundilo.
7 Ngeenge oshitukulwa shimwe shomayambo oo osha liwa mefiku etitatu, oshi li oshinima shitondifa osho itashi tambulwa ko nandenande.
8 Ou te i li ota ka handukilwa omolwenyono laye, molwaashi okwa nyateka oshinima shiyapuki shaJehova, nomunhu* oo oku na okudimwa* mo moshiwana shavo.
9 “‘Ngeenge tamu teya momapya eni, inamu teya tamu mane ko filufilu kominghulo domapya eni noinamu pupudulula po oyo ya fyaala po eshi tamu teya.
10 Natango, ino ongela oiimati oyo ya fyaala moshikunino shoye shomandjebele, ile u toole omandjebele oo e lihanena moshikunino shoye shomandjebele. Ou na oku i fiila po eehepele* novanailongo. Aame Jehova, Kalunga keni.
11 “‘Inamu vaka, inamu kengelela noinamu ungaunga navakweni noulingilingi.
12 Inamu ana oipupulu medina lange, molwaashi otamu nyateke edina laKalunga keni. Aame Jehova.
13 Ino kengelela mukweni noino nyeka. Ino anyena ondjabi yomunailonga oufiku aushe fiyo ongula.
14 “‘Ino tuka* ombolo, ile u tule endangalati komesho yomupofi, nou na okutila Kalunga koye. Aame Jehova.
15 “‘Inamu tokola shihe li pauyuki. Inamu kala mu na onhondo nohepele, ile mu popile nawa oshipuna. Tokoleni ovanhu vakweni pauyuki.
16 “‘Ino enda to tandaveleke oipupulu mokati kovanhu vakweni. Ino ninga sha osho tashi tula omwenyo* wamukweni moshiponga.* Aame Jehova.
17 “‘Ino tonda omumwaxo momutima woye. Ou na okuninga ngaashi to dulu u pukulule mukweni, opo uha kale u na etimba pamwe naye.
18 “‘Ino handukila noino kwatela onghone ovanhu vakweni; kala u hole ovanhu vakweni ngaashi u lihole mwene. Aame Jehova.
19 “‘Omu na okudiinina eenghedimhango dange: Ino ningifa oinamwenyo yopovanhu yomaludi opavali a yoolokafana i londafane. Ino kuna eembuto dopavali da yoolokafana mepya loye, noino djala oshikutu sha tungwa neengodi domaludi avali.
20 “‘Ngeenge omulumenhu okwa nangala nomukainhu, ndele omukainhu oo omupiya womulumenhu umwe e lili, ashike omukainhu ina kulilwa, ile ina mangululwa, ove na okuhandukilwa. Ndele kave na okudipawa, molwaashi omukainhu oo ka li a mangululwa natango.
21 Omulumenhu oo oku na okweeta elivelombediyambo laye kuJehova, koshivelo shetwali lokwoongalela, odi yondume yelivelombediyambo.
22 Omupristeri ote ke mu kosholifa odi yondume yelivelombediyambo koshipala shaJehova omolwenyono olo a nyona, nota ka diminwa po enyono olo a nyona.
23 “‘Ngeenge mwe uya medu olo handi mu pe, ndele tamu twike omiti doiimati, itamu dulu oku i lya oule weedula nhatu dopehovelo. Omu na okutala ko oiimati yado inai koshoka, noinamu pitikwa oku i lya.* Kai na okuliwa nandenande.
24 Ndele momudo omutine, oiimati yado aishe otai ka kala iyapuki notamu ke i yandja kuJehova nehafo.
25 Opo nee momudo omutitano, otamu dulu okulya oiimati yomuti oo noku i tala ko i li oshitukulwa shoilikolomwa yeni. Aame Jehova, Kalunga keni.
26 “‘Inamu lya sha shi na ohonde.
“‘Inamu tala momukonda, ile mu longife oumhulile.
27 “‘Ino likulula* omadjamutwe oye, noino kulula eendjedi doye momunghulo.
28 “‘Inamu litetaula komalutu eni omolwomunhu* oo a fya, noinamu lininga omadidiliko eetatu.* Aame Jehova.
29 “‘Ino fifa ohoni omonakadona woye moku mu ninga ombwada, opo moshilongo muha kale oumbwada nosho yo eenghedi da xutuka.
30 “‘Omu na okudiinina omashabata ange, nomu na okufimaneka* filufilu onhele yange iyapuki. Aame Jehova.
31 “‘Ino konga ekwafo keemhepo, noino kwatafana novaxunganeki vonakwiiwa, opo uha u kale ino koshoka omolwavo. Aame Jehova, Kalunga koye.
32 “‘Fimaneka eenghwakutoka nokukala ho tila ovakulunhu; kala ho tila Kalunga koye. Aame Jehova.
33 “‘Ngeenge omunailongo oha di mokati keni medu leni, inamu ungaunga naye nai.
34 Omunailongo oo ha di punye na kale ngaashi omukalimo mokati keni, nomu na okukala mu mu hole ngaashi mu lihole nye vene, osheshi nanye omwa li ovanailongo medu laEgipiti. Aame Jehova, Kalunga keni.
35 “‘Inamu kala ovanaipupulu ngeenge tamu yeleke oule, ile ondjudo, ile oshinano.
36 Omu na okulongifa oiyelekifo i li paushili, oiyelekifo yondjudo i li paushili, oiyelekifo yoinima ikukutu i li paushili,* noiyelekifo yoikunguluki i li paushili.* Aame Jehova, Kalunga keni, oo e mu kufa mo medu laEgipiti.
37 Onghee omu na okudiinina eenghedimhango dange adishe nomatokolo ange aeshe, nomu na oku a shikula. Aame Jehova.’”
Eshangelo lopedu
^ Eln., “okutila.”
^ Ile “nomwenyo.”
^ Ile “okudipawa.”
^ Ile “ovafininikwa.”
^ Ile “ula nai.”
^ Eln., “ohonde.”
^ Ile tashi dulika, “Ino kala ashike wa fikama wa mwena ngeenge omwenyo wamukweni u li moshiponga.”
^ Eln., “inau pita etanda.”
^ Ile “teta.”
^ Ile “omolwomwenyo.” Oshitya shOshiheberi ne′phesh apa otashi ulike komunhu oo a fya.
^ Ile “omadidilikofano komalutu.”
^ Ile “okukala netilofimaneko.” Eln., “okutila.”
^ Eln., “oefa i li paushili.” Tala Oshiwedelwako B14.
^ Eln., “ohin i li paushili.” Tala Oshiwedelwako B14.
