Embo laMateus 23:1-39
23 Opo nee Jesus okwa popya neengudu dovanhu novahongwa vaye, ta ti:
2 “Ovanongo vomishangwa nOvafarisai ove litula pondodo yaMoses.
3 Onghee hano, ashishe osho tave mu lombwele, shi ningeni noku shi diinina, ndele inamu hopaenena oilonga yavo, osheshi ohava popi ashike, ndele ihava longo osho hava popi.
4 Ohava mange omitengi didjuu noku di tula komapepe ovanhu, ndele vo vene inava hala oku di kuma nande onomunwe wavo.
5 Oilonga aishe hava longo ohave i longo opo ve limonikife kovanhu; ohava nenepeke oundjato voshipa ve na omishangwa ovo hava djala nelalakano lokuliamena, nohava lelepeke eenyemba doikutu yavo.
6 Ove hole okukala omutumba peenhele odo da nuninwa ovaenda ovo va fimana poivilo nokukala koipundi yokomesho* meeshinagoga,
7 nove hole okupopifwa monghedi ye likalekelwa peenhele domalandifilo, nokwiifanwa Omuhongi.*
8 Ndele nye inamu ifanwa Omuhongi, osheshi omu na ashike Omuhongi umwe aeke, ndele nye amushe ovamwainafana.
9 Natango, inamu ifana nande oumwe Xo kombada yedu, osheshi omu na ashike Xo umwe aeke, oo e li meulu.
10 Inamu ifanwa yo ovawiliki, osheshi Omuwiliki weni umwe aeke, Kristus.
11 Ndele ou munene mokati keni na kale omuyakuli weni.
12 Keshe ou te linenepeke ota ka ninipikwa, nakeshe ou te lininipike ota ka nenepekwa.
13 “Woo ovanongo vomishangwa nOvafarisai, ovanaihelele nye! Osheshi omwa idilila po ovanhu oshivelo shOuhamba womeulu; molwaashi nye vene itamu i mo, notamu kelele mo ovo va hala okuya mo.
14 ——
15 “Woo ovanongo vomishangwa nOvafarisai, ovanaihelele nye! Osheshi ohamu tavakana efuta nedu opo mu likole omuhongwa umwe, ndele ngeenge mwe mu likola, ohamu mu ningi oshihakanwa shaGehenna* e mu dule.
16 “Woo ovakwatiketi ovapofi nye, ovo hamu ti, ‘Ngeenge umwe okwa ane kotembeli, ke na okuwanifa po eano olo, ndele ngeenge umwe okwa ane koshingoli shotembeli, oku na okuwanifa po eano laye.’
17 Omalai novapofi nye! Oshilipi po sha fimanenena, oshingoli ile otembeli oyo hai yapulifa oshingoli?
18 Shikwao vali, ‘Ngeenge umwe okwa ane koaltari, kape na oupyakadi nonande ina wanifa po eano laye, ndele ngeenge umwe okwa ane koshali oyo i li ko, oku na okuwanifa po eano laye.’
19 Ovapofi nye! Oshilipi po sha fimanenena, oshali ile oaltari oyo hai yapulifa oshali?
20 Onghee hano, keshe ou ta ane koaltari, ota ane kuyo nokukeshe shimwe shi li ko;
21 ndele keshe ou ta ane kotembeli, ota ane kuyo nokuKalunga ou ha kala motembeli;
22 naau ta ane keulu, ota ane kolukalwapangelo laKalunga noKwaau e li ko omutumba.
23 “Woo ovanongo vomishangwa nOvafarisai, ovanaihelele nye! Osheshi ohamu yandje oshitimulongo shomint, shodill noshokumin,* ashike ohamu efa oinenenima yOmhango ngaashi ouyuki, onghenda noudiinini. Oinima oyo oi na okuwanifwa po, naikwao kai na okweefiwa.
24 Ovakwatiketi ovapofi nye, omwe otamu i dindi mo, ndele ongamelo otamu i pona po!
25 “Woo ovanongo vomishangwa nOvafarisai, ovanaihelele nye! Osheshi ohamu kosho eholo netiti kombada, ndele meni leni omu yadi olwisho* noufukenhu.
26 Ovafarisai nye ovapofi, kosheni tete eholo netiti meni opo li kale yo la yela nokombada.
27 “Woo ovanongo vomishangwa nOvafarisai, ovanaihelele nye! Osheshi omwa fa eembila da kolongwa, odo tadi monika nawa kombada ndele meni lado omu yadi oipongolo yovafi nosho yo onyata keshe.
28 Nanye moipafi yovanhu ohamu limonikifa mwa fa ovayuki, ndele meni leni omu yadi oihelele noukolokoshi.
29 “Woo ovanongo vomishangwa nOvafarisai, ovanaihelele nye! Osheshi ohamu tungu eembila dovaprofeti, ndele tamu wapeke eembila* dovayuki,
30 ndele tamu ti, ‘Ngeno opo twa li pefimbo lootatekulululwa, ngeno inatu tilashi pamwe navo ohonde yovaprofeti.’
31 Onghee omwa dimina kutya nye ovana vovadipai vovaprofeti.
32 Hano manifeni oilonga oyo ya li ya hovelwa kooxokulululwa.
33 “Omayoka noludalo lomayoka omauta nye, ongahelipi tamu dulu okuya onhapo etokolo laGehenna?*
34 Onghee hano, ohandi mu tumine ovaprofeti, ovanaendunge novahongi. Ndele vamwe vomuvo otamu ke va dipaa noku va valela komiti, navamwe vomuvo otamu ke va dengela meeshinagoga deni noku va hepeka moshilando noshilando,
35 opo ohonde aishe yovayuki oyo ya tika kombada yedu i kale kombada yeni, okudja ngoo kohonde yomuyuki Abel fiyo okohonde yaSakaria omona waBarakia, oo mwe mu dipaela pokati kouyapuki noaltari.
36 Oshili ohandi mu lombwele, oinima aishe oyo otai ke uya kombada yepupi eli.
37 “Jerusalem, Jerusalem, ovaprofeti owe va dipaa, naavo wa tuminwa owe va denga nomamanya fiyo va fya. Olungapi nda kala nda hala okwoongela ovamwoye ngaashi oxuxwa tai ongele ouxuxwena vayo koshi yomavava ayo, ashike ino shi hala?
38 Taleni, eumbo leni otamu li fiilwa ongaho.
39 Osheshi ohandi mu lombwele, itamu ka mona nge vali nandenande okudja paife fiyo osheshi tamu ka tya, ‘Na nangekwe noupuna ou te uya medina laJehova!’”
Eshangelo lopedu
^ Ile “iwa.”
^ Ile “Rabbi.” Tala omafatululo oitya.
^ Tala omafatululo oitya.
^ Omint, odill nokumin oumeno vanini hava kunwa moikunino nohava longifwa okunyenyepeka oikulya.
^ Ile “oumbudi.”
^ Ile “eembiladimbuluko.”
^ Tala omafatululo oitya.
