Omapsalme 50:1-23
Eimbilo laAsaf.
50 Jehova,* Kalunga kookalunga, okwa popya;Okwa ongela ovanhu vokombada yedu,Okudja kepito letango fiyo okeningino lalo.*
2 Kalunga okwa minikila okudja muSion, oshilando sha wapala unene.
3 Kalunga ketu ote uya, noita dulu okukala a mwena.
Komesho yaye oku na omundilo tau lungwinifa,Noshikungulu shinene oshe mu dingilila.
4 Ota ifana eulu nedu,Opo a tokole ovanhu vaye, ta ti:
5 “Ongaleni pwaame, ovadiinini vange,Ovo tamu ningi ehangano naame okupitila meyambo.”
6 Eulu otali hepaulula ouyuki waye,Osheshi Kalunga mwene oye Omutokoli. (Sela)
7 “Pwilikineni, ovanhu vange, nohandi ka popya;Israel, ohandi ka yandja oumbangi, oo u li omhinge naave.
Aame Kalunga, Kalunga koye.
8 Itandi ku pukulula omolwomayambo oye,Ile molwomaxwikiloyambo oye aeshe, oo haa etwa alushe koshipala shange.
9 Inandi pumbwa okukufa ongobe yomhedi meumbo loye,Ile oikombo* koyuunda yoye.
10 Osheshi oinamwenyo yomoixwa oyange,Nokuli noinamwenyo, oyo i li kombada yeemhunda omayovi.
11 Ondi shii eedila adishe dokeemhunda;Oinamwenyo yomoixwa, oyo itai dulu okuvalulwa, oyange.
12 Ngeno onda li nda fya ondjala, ngeno itandi ku lombwele,Osheshi edu liwa noinima aishe oyo i li ko, oyange.
13 Mbela ohandi ka lya ombelela yeengobe deemhediNokunwa ohonde yoikombo?
14 Yandja omapandulo onga omayambo oye kuKalunga,Nokuwanifa po omaudaneko oye, oo wa udanekela Omukombadambada;
15 Ifane nge pefimbo loudjuu.
Ohandi ke ku xupifa, noto ka fimanekifa nge.”
16 Ashike Kalunga ota ka lombwela omukolokoshi ta ti:
“Olyelye e ku pa oufemba wokuhokolola omaufomhango ange,Ile u popye kombinga yehangano lange?
17 Osheshi ou tonde outekuduliko,*Noho pilamene eendjovo dange.*
18 Ngeenge owa mono ombudi, oho i hokwa,*Noho kala pamwe novahaeli.
19 Oho tandavelifa osho shii nokanya koye,Noukengeleledi owa kanyatela kelaka loye.
20 Oho kala omutumba nokupopila mowii omumwanyoko;Oho holola omapuko* omonamati wanyoko.
21 Eshi wa ninga oinima ei, onda kala nda mwena,Onghee owa diladila kutya ohandi ka kala nde ku fa.
Ashike paife ohandi ku pukulula,Nohandi ke ku tamaneka moihokolola.
22 Ovo hamu dimbwa Kalunga, alikana, diladileni kombinga yaashi,Opo ndihe mu nyanyaule moinhimbu nopehe na oo te mu xupifa.
23 Oo ha yandje omapandulo onga eyambo laye ota fimanekifa nge,Naao ha landula elila louyuki,Ohandi mu ningifa a mone exupifo laKalunga.”
Eshangelo lopedu
^ Ile “Omunaenghono, Kalunga, Jehova.”
^ Ile “Okudja koushilo fiyo okouninginino.”
^ Eln., “oikombo yoindume.”
^ Ile “elombwelo.”
^ Eln., “kupulashi eendjovo dange konima yoye.”
^ Ile tashi dulika, “oho i waimine.”
^ Ile “Oho shade.”
