Omuudifi 1:1-18
1 Eendjovo domuudifi,* omonamati waDavid, ohamba yomuJerusalem.
2 Omuudifi okwa ti kutya, “Oyongaho elela!”“Oyongaho elela! Oinima aishe oyongaho!”
3 Omunhu ota mono shike moilonga yaye aishe youdiinini,Oyo ha longo koshi yetango?
4 Epupi otali xulu po, notape uya epupi limwe,Ndele edu otali kala po* fiyo alushe.
5 Etango otali piti,* notali ka ningina;Opo nee otali endelele okushuna, opo li ka pite vali.
6 Omhepo ohai pepe ya finda kolukadi, yo tai ke lidenga kolundume tai ende ko ongonga;Ohai pepe tai lidingonoka; omhepo osho hai kala tai ningi ngaho medingonoko layo.
7 Omakungulukilo aeshe ohaa tondokele mefuta, ashike efuta ihali yada.
Omeva ohaa shuna vali konhele oko haa di taa kunguluka.
8 Oinima aishe oilolola;Kape na nokuli oo ta dulu okupopya kombinga yayo.
Eisho ihali kuta okutala;Nomatwi ihaa yada okupwilikina.
9 Ngaashi sha kala osho tashi kala,Naasho sha ningwa otashi ka ningwa vali;Koshi yetango kaku na sha shipe.
10 Mbela ope na tuu umwe ta dulu okutya, “Tala oshinima eshi, oshipe”?
Osha kala po nale okudja pefimbo lonale;Osha kala po nale, ofimbo twaha li po.
11 Kape na oo ta ka dimbuluka ovanhu ovo va li ko nale;Kape na oo ta ka dimbuluka ovo tave ke uya;Itava ka dimbulukiwa kwaavo tave ke uya lwanima.
12 Ame, omuudifi, onda kala ohamba yOvaisrael, muJerusalem.
13 Onda li nda tokola okulongifa ounongo wange, opo ndi lihonge kombinga yakeshe osho sha longwa koshi yeulu. Onda konakona oilonga idjuu oyo Kalunga a pa ovanhu, oyo hai va kaleke ve lipyakidila.
14 Onda tala oilonga aishe hai longwa koshi yetango,Nonda mona kutya aishe oyongaho; ngaashi ashike okutaataa omhepo.
15 Osho sha endama itashi dulu okuyukililifwa,Naasho sha kambela po itashi dulu okuvalulwa.
16 Opo nee onde lipopila momutima wange nda ti: “Tala, onda likola ounongo muhapu ndi dule keshe umwe, oo a tetekela nge muJerusalem, nomutima wange owa mona ounongo neshiivo lihapu.”
17 Onda li nda tokola okushiiva ounongo noupwidi nosho yo oulai, ndele oinima oyo nayo oi li okutaataa omhepo.
18 Osheshi ounongo muhapu otau eta oudjuu muhapu,Onghee keshe oo ta hapupalifa eshiivo ota hapupalifa ouyahame.
