Embo lOvaroma 15:1-33
15 Ovo twa pama meitavelo otu na okukwafela ovo va nghundipala, ndele katu na okuliwapalela fye vene.
2 Keshe umwe na ningile mukwao ouwa opo e mu pameke.
3 Kristus naye ine liwapalela ye mwene, ngaashi ashike pa shangwa taku ti: “Naame onda shekwa ngaashi yo nanye mwa shekwa.”
4 Osheshi oinima aishe oyo ya shangwa nale, oya shangwa omolwehongo letu opo tu kale tu na eteelelo hali di melididimiko nomokuhekelekwa kOmishangwa.
5 Kalunga ou ha hekeleke noha kwafele ovanhu ve lididimike, ne mu kwafele mu kale hamu diladila ngaashi Kristus Jesus
6 opo mu hambelele Kalunga, Xe yOmwene wetu Jesus Kristus mu li moukumwe.
7 Tambulafaneni ngaashi Kristus e mu tambula ko, opo Kalunga a fimanekwe.
8 Ohandi mu lombwele oshili kutya Kristus okwa ninga omuyakuli waava va pita etanda, opo a koleke omaudaneko aKalunga oo a udanekela ooxekulululwa,
9 noiwana opo i tange Kalunga omolwonghenda yaye. Omishangwa oda ti: “Onghee ohandi ke ku shiivifa mokati koiwana nohandi ka tanga edina loye.”
10 Opa shangwa vali taku ti: “Oiwana nye, hafeni pamwe noshiwana shaye.”
11 Opa shangwa yo taku ti: “Oiwana nye amushe, tangeni Jehova, novanhu aveshe nave mu tange.”
12 Jesaja okwa ti vali: “Moludalo laIsai otamu ka dja oo ta ka pangela oiwana; noiwana otai ka kala i na eteelelo omolwaye.”
13 Ndele molwaashi omwe lineekela muKalunga ou ha yandje eteelelo, ne mu pe ehafo nombili opo mu kale mu na eteelelo la twa kekwafo lomhepo iyapuki.
14 Onda tomhwa filufilu shi na sha nanye ovamwatate, molwaashi paife otamu dulu okulonga ouwa, omu na eshiivo notamu dulu okupukululafana.*
15 Onghee onde mu shangela oinima ya yela ndi mu dimbulukife omolwefilonghenda laKalunga.
16 Kalunga okwa fila nge onghenda opo ndi ninge omupiya waKristus Jesus nondi udifile oiwana aishe onghundana iwa, noshilonga eshi oshiyapuki. Ohandi longo oshilonga eshi opo ovanhu vomoiwana oyo va yelifwe komhepo iyapuki nova ninge eyambo la hokiwa kuKalunga.
17 Onda hafa molwaashi ondi li omuhongwa waKristus Jesus, nohandi longo oilonga yaKalunga.
18 Itandi popi kombinga yoilonga oyo nda longa kwaame mwene, ndele ohandi popi shi na sha naayo nda longa kekwafo laKristus, opo ovanhu vomoiwana imwe va dulike kuye.
19 Onda kwafelwa komhepo iyapuki yaKalunga opo ndi dule okulonga oikumwifilonga nomadidiliko nokuudifa nawanawa onghundana iwa kombinga yaKristus muJerusalem fiyo omoshitukulwa shaIlliriko.
20 Kungaho, onda li nda tokola ndiha udifile moitukulwa omo mwa udifilwa nale onghundana iwa kombinga yaKristus, opo ndiha tungile kekanghameno laumwe;
21 ngaashi pa shangwa taku ti: “Ovo inava shiivifilwa sha kombinga yaye otave ke mu shiiva, naava inava uda sha otave ke mu uda.”
22 Osho osho sha kala yo tashi imbi nge lwoikando ndihe uye kunye.
23 Ndele paife oitukulwa aishe onde i udifila, nonda kala nda halelela okuuya kunye oule womido.*
24 Onghee onda hala oku mu talela po eshi handi i kuSpania, opo tu hafeleni pamwe oule wokafimbo, nye mu findikile nge ondjilakati.
25 Ndele paife ondi li pokuya kuJerusalem ndi ka yakule ovayapuki.
26 Ovamwatate vomuMakedonia nomuAkaia ova yandja oinima yavo nehalo liwa opo va yambidide ovayapuki vomuJerusalem ovo ve na omhumbwe.
27 Ove shi ninga nehafo, ashike ova li yo ve udite kutya ove na oshinakuwanifwa shoku shi ninga. Molwaashi ovayapuki ovo ova pa ovanhu vomoiwana imwe oinima iwa ya dja kuKalunga, ovanhu ovo ove na yo oshinakuwanifwa shoku va kwafela meemhumbwe davo dopalutu.
28 Ngeenge onde va twaalele oikwafa ei, ohandi ka pita punye eshi handi i kuSpania.
29 Ndele ondi shi shii kutya eshi handi uya kunye, ohandi uya nomanangeko noupuna mahapu a dja kuKristus.
30 Ashike ohandi mu ladipike ovamwatate omolwOmwene wetu Jesus Kristus nomolwohole, mu ilikanene nge kuKalunga mwa mana mo,
31 opo ndi xupifwe mokati kovalunde ava ve li muJudea, novayapuki ovo ve li muJerusalem opo va dule okutambula ko oikwafa yange,
32 ame ndi uye yo kunye nehafo pahalo laKalunga notu hafeleni pamwe.
33 Kalunga oo ha yandje ombili na kale pamwe nanye amushe. Amen.
