Kalunga oha popi nafye atushe okupitila mOmbiibeli Iyapuki. Otwa pumbwa oku i konakona nawa, opo tu shiive Omushangi wayo. (Johannes 17:3; 2 Timoteus 3:16) Jehova Kalunga okwa holola elalakano laye li na sha novanhu nosho yo eduumbo lavo okupitila mOmbiibeli. — Genesis 3:15; Ehololo 21:3, 4.

Kape na vali embo limwe la lundulula eenghalamwenyo dovanhu ngaashi Ombiibeli. Ombiibeli ohai tu kwafele tu hopaenene omaukwatya aJehova, ngaashi ohole, onghenda nolukeno. Ohai kwafele ovanhu va kale ve na eteelelo, nove lididimike nokuli nongeenge tava piti meenghalo didjuu neenghono. Ohai nyaneke pomutenya oiningwanima younyuni ou, oyo ihe li metwokumwe nehalo laKalunga. — Epsalme 119:105; Ovaheberi 4:12; 1 Johannes 2:15-17.

Pehovelo Ombiibeli oya li ya shangwa mOshiheberi, mOshiaramia nomOshigreka, noya tolokwa ye lixwa po, ile oitukulwa yayo momalaka 3 000 lwaapo. Oya tolokwa momalaka mahapu, noya andjakanekwa i dulife omambo aeshe mondjokonona. Osho osho shi na okukala ngaho. Ombiibeli oya xunganeka ya ti: “Ndele onghundana ei iwa yOuhamba [etumwalaka la fimanenena olo li li mOmbiibeli] otai ka udifilwa ounyuni aushe opo ovanhu vomoiwana aishe ve i ude, opo nee exulilo tali uya.” — Mateus 24:14.

Molwaashi otu shii kutya etumwalaka lOmbiibeli ola fimana, Ombiibeli ei otwe i toloka noukeka. Otu shii kutya otu na oshinakuwanifwa sha kwata moiti shoku i toloka paushili. Ombiibeli ei oya tolokwa okudja mOmbiibeli yOshiingilisha yEtoloko lounyuni mupe lOmishangwa Diyapuki, oyo ya pitile tete omido di dulife po 60 da pita. Elalakano letu haku toloka ashike Ombiibeli monghedi i li paushili, ndele oku i toloka ya yela noipu okuleshwa. Oitukulwa yOiwedelwako ngaashi “Omafinamhango e na sha nokutoloka Ombiibeli,” “Oinima oyo i li metoloko eli,” nosho yo “Nghee Ombiibeli ya fika kufye,” oya kundafana omafinamhango oo a longifwa eshi kwa tolokwa Ombiibeli ei.

Ovo ve hole Jehova Kalunga nohave mu longele, ova hala etoloko lEendjovo daKalunga li li paushili nolipu okuuda ko. (1 Timoteus 2:4) Onghee Ombiibeli ei oya tolokwa mOshikwanyama nosho yo momalaka mahapu. Omuleshi omuholike, otu na elineekelo nohatu ilikana kutya, oto ka mona ouwa mOmishangwa Diyapuki, eshi to kendabala ‘okukonga Kalunga fiyo to mu mono.’ — Oilonga 17:27.