1, 2. (a) “Oshali [yaKalunga] ihe fi kutumbulwa” oya kwatela mo shike? (b) Omapulo elipi hatu ka kundafana moshitukulwa eshi?

JEHOVA okwe tu ulikila ohole monghedi ya denga mbada eshi a tuma Omona waye Jesus kombada yedu. (Johannes 3:16; 1 Johannes 4:9, 10) Omuyapostoli Paulus okwa ti osho ‘oshali ihe fi kutumbulwa.’ (2 Ovakorinto 9:15) Omolwashike Paulus a longifa outumbulilo oo?

² Paulus okwa li e shi shii kutya omaudaneko aKalunga aeshe otaa ka wanifwa po omolweyambo laJesus. (Lesha 2 Ovakorinto 1:20.) Osho osha hala kutya “oshali [yaKalunga] i he fi kutumbulwa” oya kwatela mo eyambo laJesus, omauwa aeshe oo Kalunga he tu ningile nosho yo ohole i na oudiinini oyo he tu ulikile. Oshali ya tya ngaho itai dulu naanaa okuyelifwa monghedi oyo hatu dulu okuuda ko filufilu. Oi na oku tu ningifa tu kale tu udite ngahelipi? Ongahelipi tai dulu oku tu kwafela eshi hatu lilongekidile Edimbuluko lefyo laKristus olo tali ka kala ko mEtitatu 23 Marsa 2016?

3, 4. (a) Oho kala u udite ngahelipi ngeenge umwe e ku pa omaano? (b) Ongahelipi omaano a denga mbada taa dulu okulundulula okukalamwenyo kwoye?

³ Ngeenge umwe e tu pa omaano, ohatu kala twa hafa neenghono. Ashike omaano amwe ohaa kala taa ti sha ile a denga mbada neenghono, taa dulu nokuli okulundulula onghalamwenyo yetu. Pashihopaenenwa, natu tye nee ngeno owa longa omunyonena wonhumba, nowa tokolelwa efyo. Ndele opo ngoo u li po, ope uya omunhu uhe mu shii ta ti oye na dipawe ponhele yoye. Oto ka udila ngahelipi oshinima sha tya ngaho?

⁴ Oshinima sha tya ngaho shopahole otashi ke ku linyengifa u ninge omalunduluko mokukalamwenyo kwoye. Nopehe na omalimbililo, otashi ke ku linyengifa yo u kale ho yandje, u hole ovanhu nou dimine po ovo va ungaunga naave nai. Mokukalamwenyo kwoye akushe, oto ka kala wa hala okuulika kutya owa pandula neenghono omolweliyambo olo la ningwa po.

5. Ongahelipi oshali yaKalunga yekulilo ya denga mbada i dule eeshali dimwe vali?

⁵ Oshali yekulilo oi dule kokule oyo ya popiwa moshihopaenenwa osho twa kundafana metetekelo. (1 Petrus 3:18) Diladila kutya atusheni otwa fyuulula oulunde kuAdam, nondjabi youlunde oyo efyo. (Ovaroma 5:12) Ohole oyo ye linyengifa Jehova a tume Jesus kombada yedu “opo a lole efyo ponhele yaaveshe.” (Ovaheberi 2:9) Ashike eyambo laJesus otali ka ninga shihapu. Otali ka hanauna po efyo fiyo alushe. (Jesaja 25:7, 8; 1 Ovakorinto 15:22, 26) Aveshe ovo va itavela muJesus otava ka kala nombili nova hafa fiyo alushe, ve li eehamba pamwe naKristus meulu ile ovapangelwa vOuhamba waKalunga kombada yedu. (Ovaroma 6:23; Ehololo 5:9, 10) Omanangekonoupuna amwe elipi a kwatelwa moshali oyo Kalunga e tu pa?

6. (a) Omanangekonoupuna oshali yaKalunga elipi wa teelela nodjuulufi? (b) Oshali yaKalunga otai tu linyengifa tu ninge oinima itatu ilipi?

⁶ Oshali yaKalunga oya kwatela mo eduparadisa, okuvelula ovanaudu nokunyumuna ovafi. (Jesaja 33:24; 35:5, 6; Johannes 5:28, 29) Otu hole Jehova nOmona waye ‘omolwoshali ihe fi kutumbulwa’ oyo ve tu pa. Mbela oshali oyo otai tu linyengifa tu ninge po shike? Otai tu linyengifa (1) tu hopaenene Kristus Jesus, (2) tu kale tu hole ovamwatate nosho yo (3) tu dimine po vakwetu tashi di komutima.

7, 8. Otu na okukala tu uditile ngahelipi ohole yaKristus, noina oku tu linyengifa tu ninge shike?

⁷ Tete, otu na okulinyengifwa tu kale nonghalamwenyo oyo tai fimanekifa Jesus. Omuyapostoli Paulus okwa ti: “Ohole yaKristus tai tu fininike.” (Lesha 2 Ovakorinto 5:14, 15.) Paulus okwa li e shi shii kutya ngeenge otwa tambula ko ohole inene yaJesus, otai ke tu fininika ile i tu linyengife tu kale tu hole Jesus noku mu fimanekifa. Nopehe na omalimbililo, ngeenge otwa kala tu na eudeko lomoule li na sha naasho Kalunga e tu ningila, ohole yaye otai ke tu linyengifa tu kale nonghedi yokukalamwenyo oyo tai ulike kutya otwa fimaneka Jesus. Ongahelipi hatu dulu okuninga ngaho?

⁸ Ohole yokuhola Jehova otai ke tu linyengifa tu hopaenene Jesus, hatu landula eenghatu daye filufilu. (1 Petrus 2:21; 1 Johannes 2:6) Ngeenge hatu dulika kuKalunga naKristus, kungaho ohatu ulike kutya otu va hole. Jesus okwa ti: “Ou e noipango yange ndee te i diinine, oye tuu ou e hole nge; ndele ou e hole nge, ota kala e holike kuTate,  naame yo ondi mu hole, ndele handi mu lihololele.” — Johannes 14:21; 1 Johannes 5:3.

9. Enwefemo lilipi twa taalela?

⁹ Otashi ka kala shiwa pefimbo lEdimbuluko okudilonga kunghee hatu longifa okukalamwenyo kwetu. Lipula kutya: ‘Omoinima ilipi nda hovela nale okuhopaenena Jesus? Omoinima ilipi nda pumbwa okuxwepopala?’ Osha fimana okulipula omapulo oo molwaashi ounyuni otau dulu oku tu nwefa mo. (Ovaroma 12:2) Ngeenge inatu lungama, otashi dulika tu hopaenene eenghedi dovanhu vomounyuni ngaashi ovahongwanhu, ovanhu ovo va tumbala nomanyakwa momaudano. (Ovakolossi 2:8; 1 Johannes 2:15-17) Ongahelipi mbela hatu dulu okukondjifa enwefemo olo?

10. Omapulo elipi tu na okulipula pefimbo lEdimbuluko, nomanyamukulo komapulo oo otae ke tu linyengifa tu ninge shike? (Tala efano pehovelo loshitukulwa.)

¹⁰ Otashi ka kala shiwa pefimbo lEdimbuluko tu kufe efimbo tu tale nawa oikutu oyo hatu djala, eemuvi odo hatu tale, eemusika odo hatu pwilikine, osho shi li meekompiuta detu, keengodi detu dopeke ile koutablet vetu. Onghee hano, lipula kutya: ‘Ngeno Jesus opo a li ndele ta tale komidjalo dange, mbela ohandi ka kala nda fya ohoni?’ (Lesha 1 Timoteus 2:9, 10.) ‘Mbela omidjalo dange otadi ulike ngoo kutya ame omushikuli waKristus? Mbela Jesus ota ka hala ngoo okutala eemuvi dange? Ota ka hala ngoo okupwilikina keemusika odo handi pwilikine? Ngeenge Jesus okwa pula nge a longife ko kongodi ile kokatablet kange, mbela ohandi ka kala nda fya ohoni omolwoinima oyo i li mo? Mbela otashi ka kala shidjuu oku mu yelifila kutya omolwashike handi tyapula omaudano eevidio?’ Ohole yetu yokuhola Jehova oi na oku tu linyengifa tu ekeleshi keshe osho itashi wapalele Ovakriste, kashi na nee mbudi kutya otashi tu pula shike. (Oilonga 19:19, 20) Eshi twe liyapulila Jehova, otwa ana kutya ohatu ka longifa okukalamwenyo kwetu okufimanekifa Kristus. Onghee hano, inatu pumbwa okukala tu na oinima oyo tai shi ningifa shidjuu tu hopaenene Jesus. — Mateus 5:29, 30; Ovafilippi 4:8.

11. (a) Ohole yokuhola Jehova naJesus ohai tu linyengifa ngahelipi moilonga yokuudifa? (b) Ongahelipi ohole tai tu linyengifa tu kwafele vakwetu meongalo?

¹¹ Ohole yokuhola Jesus ohai tu linyengifa tu udife notu honge ovanhu nouladi. (Mateus 28:19, 20; Lukas 4:43) Mbela ito dulu okuliunganeka nawa pefimbo lEdimbuluko opo u kufe oukwafelikokolindjila nokulonga eevili 30 ile 50? Omulumenhu umwe womido 84 oo a filwa omukulukadi waye okwa li ta diladila kutya ita dulu okukokola ondjila omolwoukulupe nosho yo okuhenoukolele. Ashike ovakokolindjila vomoshitukulwa shavo ova li va hala oku mu kwafela. Ova li have mu kwafele noyeendifo yavo noku mu twala koshitukulwa oko ta dulu okuudifila. Oshidjemo, omumwatate oo okwa li a dula okuhanga elalakano laye lokulonga eevili 30. Mbela ito dulu okukwafela umwe meongalo opo a dule okukufa oukwafelikokolindjila muMarsa naAprili? Oshoshili kutya hakeshe umwe ta dulu okukokola ondjila, ashike ohatu dulu okulongifa efimbo neenghono detu opo tu longe shihapu moilonga yaJehova. Ngeenge otwa ningi ngaho, ohatu ka ulika kutya otwe linyengifwa kohole yaJesus, ngaashi Paulus a popya. Ohole yaKalunga otai tu linyengifa vali tu ninge shike?

12. Ohole yaKalunga yoku tu hola ohai tu linyengifa tu ninge shike?

¹² Oshitivali, ohole yaKalunga yoku tu hola oi na oku tu linyengifa tu kale tu hole ovamwatate. Omuyapostoli Johannes okwa  shanga ta ti: “Ovaholike, Kalunga eshi a kala e tu hole ngaha, hano nafye yo otu nokukala tu holafane.” (1 Johannes 4:7-11) Eshi twa shiiva kutya Kalunga oku tu hole, nafye otu na okukala tu hole ovamwatate. (1 Johannes 3:16) Ongahelipi hatu dulu okuulika kutya otu va hole?

13. Oshihopaenenwa shilipi Jesus a tula po shi na sha nokuhola vakwetu?

¹³ Oshihopaenenwa shaJesus otashi ulike nghee tu na okukala tu hole ovanhu vakwetu. Eshi a li kombada yedu, okwa li ha kwafele ovanhu, unene tuu ovo va li ovalininipiki. Okwa li a velula ovanaudu, oingudu, ovapofi, ovafitamatwi novafitandaka. (Mateus 11:4, 5) Mepingafano novawiliki vomalongelokalunga, Jesus okwa li ha hafele okuhonga ovanhu ovo va li va hala okushiiva kombinga yaKalunga. (Johannes 7:49) Okwa li e hole ovanhu ovo ovalininipiki nokwa li ha longo noudiinini opo e va kwafele. — Mateus 20:28

14. Oshike to dulu okuninga po u ulikile ovamwaxo ohole?

¹⁴ Efimbo lEdimbuluko efimbo yo liwa lokudiladila kunghee hatu dulu okukwafela ovamwatate novamwameme meongalo, unene tuu ovanamido. Mbela ito dulu oku ke va talela po? Mbela ito dulu oku va twaalela okulya, oku va kwafela noilonga yonhumba momaumbo avo, oku va twaalela nosheendifo shoye kokwoongala ile oku va shiva mu ka longe pamwe moilonga yokuudifa? (Lesha Lukas 14:12-14.) Ohole yaKalunga yoku tu hola nai ku linyengife u kale u hole ovamwaxo.

15. Oshike tu na okudimbuluka?

¹⁵ Oshititatu, ohole yaJehova yoku tu hola ohai tu linyengifa tu dimine po ovamwatate. Atusheni otwa fyuulula oulunde nefyo kuAdam, hano kape na ou ta dulu okutya, “Inandi pumbwa ekuliloyambo.” Nokuli novapiya vaJehova ovadiinini ova pumbwa ekuliloyambo. Keshe umwe womufye okwa diminwa po omatimba mahapu. Omolwashike sha fimana okudimbuluka oshinima osho? Enyamukulo ohatu li hange mulimwe lomomafaneko aJesus.

16, 17. (a) Oshike hatu lihongo mefaneko laJesus li na sha nohamba novapiya vayo? (b) Eshi wa dilonga kefaneko laJesus, owa tokola toko okuninga shike?

¹⁶ Jesus okwa yandja efaneko lohamba oyo ya dimina po omupiya wayo oo a li e mu lila oikolo yeendenari 60 000 000. Ashike lwanima, omupiya oo ka li a hala okudimina po omupiya mukwao oo a li e mu lila oikolo inini i fike peendenari 100. Onghenda yohamba okwa li i na okulinyengifa omupiya oo a dimine po omupiya mukwao. Ohamba oyo oya li ya handuka neenghono eshi ya uda omupiya oo ya dimina po kutya ina hala okudimina po mukwao oikolo inini oyo e mu lila. Oya ti: “Omupiya oove mwii, oikolo yoye aishe onde i ku kufila po, eshi wa ilikana nge; naave yo ngeno wa li u nokufila onghenda omupiya mukweni, ngaashi ame nde ku fila onghenda.” (Mateus 18:23-35) Ngaashi ohamba oyo, Jehova  okwe tu dimina po oikolo ihapu. Ohole nonghenda yaJehova oi na oku tu linyengifa tu ninge shike?

¹⁷ Eshi hatu lilongekidile Edimbuluko, otashi dulika twa pumbwa okulipula kutya: ‘Mbela onda ningwa nai komumwatate? Mbela oshidjuu kwaame oku mu dimina po?’ Ngeenge osho, eli olo efimbo liwa lokuhopaenena Jehova, oo ‘ha dimi po omatimba.’ (Nehemia 9:17; Epsalme 86:5) Ngeenge otwa pandula onghenda yaJehova inene, ohatu ka ungaunga navakwetu nonghenda noku va dimina po tashi di komutima. Ngeenge katu hole ovamwatate noihatu va dimine po, inatu teelela Jehova a kale e tu hole noku tu dimina po. (Mateus 6:14, 15) Ngeenge otwa dimine po vakwetu, itashi ti kutya inave tu udifa nai shili, ashike okuninga ngaho otaku ke tu kwafela tu kale twa hafa monghalamwenyo.

18. Ohole yaKalunga yoku tu hola oya kwafela ngahelipi omumwameme umwe e lididimikile okuhawanenena kwamukwao?

¹⁸ Oshidjuu okulididimikila okuhawanenena kwovamwatate. (Lesha Ovaefeso 4:32; Ovakolossi 3:13, 14.) Omumwameme umwe oo a li a ninga ngaho oLily. ^[1] (Tala eshangelo pexulilo loshitukulwa.) Okwa li a kwafela omufiyekadi wedina Carol. Pashihopaenenwa, okwa li he mu twala keshe opo a hala notuwa yaye, he ke mu landela ko koipumbiwa yomeumbo nohe mu ningile oinima vali imwe ihapu. Nonande Lily okwa li ha ningi eenghendabala adishe odo, Carol okwa kala alushe he mu kembaula, nomafimbo amwe kasha li shipu oku mu kwafela. Ashike Lily okwa kala ha yandje unene elitulemo komaukwatya mawa aCarol nokwa kala te mu kwafele oule womido donhumba fiyo osheshi a ka ehamenena ndele ta fi. Nonande Lily okwa li a mona shidjuu okukwafela Carol, okwa ti: “Onda teelela nodjuulufi eshi Carol ta ka nyumuka. Onda hala oku ke mu shiiva nawa eshi a wanenena.” Osha yela kutya ohole yaKalunga yoku tu hola otai dulu oku tu linyengifa tu lididimikile ovamwatate nokuteelela efimbo opo eshi okuhawanenena itaku ka kala po vali.

19. “Oshali [yaKalunga] ihe fi kutumbulwa” tai ku linyengifa u ninge shike?

¹⁹ Jehova okwe tu pa shili “oshali yaye i he fi kutumbulwa.” Natu ulike alushe kutya otwe i pandula. Efimbo lEdimbuluko oli li omhito ito i pewa luvali yokudilonga kwaashishe osho Jehova naJesus ve tu ningila. Ohole yavo nai tu linyengife tu hopaenene Jesus filufilu, tu kale tu hole ovamwatate notu kale hatu va dimine po tashi di komutima.