Elipangelo ola kwatela mo oikala yomunhu

• yokuteelela

• yokupangela omahalo

• yokumanifa oilonga, nonande ku i hole

• yokupitifa ouwa wavamwe komesho

Ounona ovo ve na elipangelo otava dulu okuhenuka eshongo, nonande otashi dulika meyeleko va mone mo ouwa wopakafimbo. Mepingafano naasho, ounona ovo vehe na elipangelo otashi dulika va kale

• ovahandunhu

• va polimana

• hava shili omakaya, ile va longife nai oikolwifa, ile oingangamifi

• hava ningi omatokolo ehe li pandunge, sha hala kutya hava li oikulya oyo ihe na oitungifi

Olaporta imwe oya popya kutya ovakulunhu, ovo va kala ve na elipangelo okudja kounona, ihava kala ve na oukolele tau nyangwaanyangwa, oupyakadi wopashimaliwa nohava dulika keemhango. Olaporta oyo oya ningifa omuprofesa Angela Duckworth wokOuniversiti yaPennsylvania a fike pexulifodiladilo, eshi a ti: “Kape na osho tashi dulu ‘okuyelekwa’ nelipangelo.”

Lihonga okutya ahowe, ndele to kala metwokumwe nasho.

EFINAMHANGO LOPAMBIIBELI: “Eendjovo deni ‘Heeno,’ nadi kale heeno, nosho yo ‘Ahowe,’ nai kale ahowe.” — Mateus 5:37.

Ounona otashi dulika va yeleke elipangelo lovadali mokupopya, ile mokuninga oshinima shonhumba shii, tashi dulika nokuli mokati kovanhu. Ngeenge omudali okwe ka ningile osho ka hala, nena ohaka mono kutya onghedi oyo ohai pondola, notaka twikile ashike okukala haka ningi ngaho.

Ngeenge omudali okwa ti ahowe, ndele ta kala metwokumwe nasho, okaana ohake lihongo oshilihongomwa sha fimana monghalamwenyo kutya haalushe hatu pewa osho twa hala. Omundokotola David Walsh okwa shanga, a ti: “Oushili oyoo kutya, ovanhu ovo ve lihonga okukala nelipangelo ohava kala va hafa. Kashi li pahole okutekula ounona vetu ehena oku tu lye, tava diladila kutya otava dulu alushe okupewa ashishe osho va hala.” *

Ngeenge iho pe okaana koye ashishe osho taka pula, otashi ke ka kwafela ka kale nelipangelo monakwiiwa. Pashihopaenenwa, ngeenge a yelekwa a longife oingangamifi, a ye momilele ofimbo ina ya mohombo, ile a ninge oinima imwe oyo tai dulu oku mu etela oshiponga, ile vamwe.

Kwafela ounona voye va ude ko osho tashi dulu okuningwa po, ngeenge ove li humbata nawa, ile nai.

EFINAMHANGO LOPAMBIIBELI: “Keshe osho omunhu ta kunu osho ta ka teya.” — Ovagalati 6:7.

Okaana koye oka pumbwa okuuda ko kutya keshe osho taka ningi oshi na oilanduliko nosho yo kutya okuhakala nelipangelo ohaku etifa oidjemo ii. Pashihopaenenwa, ngeenge omonamati woye oha handuka diva, ovanhu otava ka kendabala okukala kokule naye. Shikwao vali, ngeenge okwa kulike oikala yokulipangela ngeenge a hanyenwa, ile ha teelele nelididimiko ponhele yokupiyaaneka, ovanhu otava ka kala ve mu hole. Kwafela omona woye a ude ko kutya onghalamwenyo yaye otai ka kala i li xwepo, ngeenge okwa kulike elipangelo.

Honga omona woye a shiive oinima oyo ya fimanenena.

EFINAMHANGO LOPAMBIIBELI: ‘Shiiveni oinima oyo ya fimanenena.’ — Ovafilippi 1:10.

Elipangelo kali fi ashike okulikelela okuhaninga osho shii. Ola kwatela mo okuninga osho sha pumbiwa, nokuli noinima oyo tashi dulika tuhe hole. Osha fimana kokaana koye okulihonga okutokola kutya oinima ilipi ya fimanenena nokuyandja tete elitulemo kuyo. Pashihopaenenwa, oku na tete okuninga oifiilwalonga yaye yofikola, opo nee ta ka danauka nawa.

Kala oshihopaenenwa shiwa.

EFINAMHANGO LOPAMBIIBELI: “Onde mu tulila po oshihopaenenwa mu ninge ngaashi naanaa nde mu ningila.” — Johannes 13:15.

Okaana koye otaka ka mona nghee ho linyenge, ngeenge pa ningwa oshinima osho she ku udifa nai. Ulika okupitila moshihopaenenwa shoye kutya elipangelo ohali eta oidjemo iwa. Pashihopaenenwa, ngeenge okaana koye oka ningi oshinima shii, mbela oho ka tangunine, ile oho kala wa ngungumana?