Ngeenge owa hala okushiiva omunhu wonhumba, oshinima shotete osho tashi dulika u mu pule oshosho kutya, “Edina loye olye?” Ngeno ou pule Kalunga epulo olo, mbela ngeno ota ka nyamukula ngahelipi?

“Aame Omwene [“Jehova,” NW], olo edina lange.” — Jesaja 42:8.

Edina olo ola fimana kuKalunga ye mwene. Kape na oo a luka Kalunga edina olo, oye mwene e li i luka. Jehova okwa popya a ti: “Olo edina lange fiyo alushe nalo Ame handi ifanwa kepupi fiyo okepupi.” (Exodus 3:15) MOmbiibeli, edina laKalunga ola holoka mo lwoikando ihapu li dulife omadinafimaneko aye, ngaashi Omunaenghono adishe, Tate, Omwene ile Kalunga, nola holoka mo yo lwoikando ihapu li dulife omadina amwe, ngaashi Abraham, Moses, David ile Jesus. Natango, oshi li ehalo laJehova opo edina laye li shiivike. Ombiibeli oya ti: ‘Vo va kale, ve shi koneka, nokutya Oove ou to ifanwa Omwene [“Jehova,” NW], Ove auke u li po Omukombadambada medu alishe.’ — Epsalme 83:18.

Edina olo ola fimana kuJesus. Meilikano olo hali ifanwa Tate Yetu ile Eilikano lOmwene wetu, Jesus okwa honga ovashikuli vaye va kale tava ilikana tava ti: “Edina loye nali yapulwe.” (Mateus 6:9) Jesus naye okwa li a ilikana kuKalunga a ti: “Tate, fimanekifa edina loye.” (Johannes 12:28) Okwa li a pitifa komesho okufimanekifa edina laKalunga monghalamwenyo yaye, naasho oshe mu ningifa a ilikane ta ti: “Ame nde va shiivifa edina loye, ndele ohandi ke li shiivifa natango.” — Johannes 17:26.

Edina olo ola fimana kwaavo ve shii Kalunga. Oshiwana shaKalunga shonale osha li shi udite ko kutya eameno nexupifo lasho oi na ekwatafano nedina laKalunga le likalekelwa. “Edina lOmwene [“Jehova,” NW] olo oshungongulu ya pama. Omuyuki ta hondama mo ndele ta amenwa.” (Omayeletumbulo 18:10) “Keshe tuu ou ta ifana edina lOmwene, ye ota ka xupifwa.” (Joel 2:32) Ombiibeli oya ulika kutya edina laKalunga otali ka yoolola ko ovo have mu longele. “Osheshi oiwana aishe tai kala nokweenda, keshe shimwe, medina laKalunga kasho,  ndelenee fye ohatu ka kala nokweenda medina lOmwene Kalunga ketu alushe fiyo alushe.” — Mika 4:5; Oilonga 15:14.

Edina olo le likalekelwa otali holola Kalunga. Ovahongwanhu vahapu ova fika pexulifodiladilo kutya edina laJehova otali ti “Oha ningifa.” Jehova Kalunga okwa holola eityo ledina laye eshi e lipopya ye mwene meendjovo odo a lombwela Moses kutya: “Aame tuu Ame, [ile tu tye “ohandi ka ninga osho nda hala okukala,” NW].” (Exodus 3:14) Edina laKalunga otali tu lombwele shihapu shihe fi ashike kutya ye Omushiti woinima aishe. Edina laye otali ulike okudula kwaye okuningifa ye mwene nosho yo eshito laye li ninge keshe osho sha pumbiwa opo a wanife po elalakano laye. Nonande omadinafimaneko otaa holola ondodo yaKalunga nosho yo eenghonopangelo daye, edina laye aeke, Jehova, ola kalela po oinima aishe kutya oye lyelye, naashishe osho ta dulu okuningifa.

Edina laKalunga otali ulike kutya oku na ko nasha nafye. Eityo ledina laye otali ulike kutya oku na ko nasha noishitwa yaye, mwa kwatelwa ovanhu. Shikwao vali, eshi Kalunga a shiivifa edina laye, otashi ulike kutya okwa hala tu mu shiive. Shihokwifa, okwe tu shiivifila edina laye nokuli nofimbo inatu hovela okulipula kombinga yalo. Osha yela kutya okwa hala tu mu tale ko e li Omunhu wolela oo hatu dulu okweehena popepi naye, ponhele yokudiladila kutya itatu dulu oku mu shiiva. — Epsalme 73:28.

Okulongifa edina laKalunga otashi ulike kutya otu na ohokwe muye. Oku shi faneka, otashi dulika u pule umwe oo wa hala a ninge kaume koye a kale ta tumbula edina loye. Oto ka kala u udite ngahelipi ngeenge omunhu oo okwa anye filufilu okulongifa edina loye? Mokweendela ko kwefimbo otashi dulika u ke lipule ngeenge omunhu oo okwa hala ngoo shili okukala kaume koye kopofingo. Osho osha faafana naKalunga. Jehova okwa lombwela ovanhu edina laye, nokwe va ladipika va kale tave li longifa. Ngeenge otwa kala hatu li longifa, ohatu ka ulikila Jehova kutya otwa hala okweehena popepi naye. Nomolwaasho oku wete nokuli ovo hava “fimaneke edina laye.” — Malakia 3:16.

Onghatu yotete ya fimana yokushiiva Kalunga, okulihonga kombinga yedina laye. Ashike hapo tu na okuxulila opo. Otwa pumbwa okushiiva shihapu kombinga ya mwene wedina olo. Otu na okulihonga osho e hole.