Kalunga okwa shita omalutu etu monghedi ikumwifi eshi haa dulu okulivelula kuo vene. Johns Hopkins, oo ha longo noinima yopaunamiti, okwa ti: “Ngeenge olutu li na oukolele la tetwa, la kwelunyunwa ile la tuwa, ohali dulu okulivelula kutya nee oshipute osha kula ile oshinini.” Olutu ohali endelele okwookifa ohonde, omifipa ohadi tamunuka mo, sho oshipute tashi ende tashi veluka neenhumba ohadi ende tadi i kumwe.

DILADILA KWAASHI: Ngeenge Omushiti okwa shita omalutu etu haa dulu okulivelula, mbela osho itashi tu kwafele tu kale tu na elineekelo momaudaneko aye kutya ote ke tu velula pamaliudo? Omupsalme okwa ti: “Oha twamifa ava ve nomutima wa tekauka, ndele ta mange oipute yavo tai yehama.” (Epsalme 147:3) Ngeenge oto mono oixuna pamaliudo omolweenghalo domonakudiwa ile odo u li mudo paife, ongahelipi to dulu okukala noushili kutya Jehova ota ka manga oipute yoye paife nosho yo monakwiiwa?

Kalunga okwa udaneka a ti: “Ino tila, osheshi Ame ondi li pamwe naave. Ino [kala] wa limbililwa, osheshi Aame Kalunga koye. Ame ohandi ku pameke ndele handi ku kwafa yo.” (Jesaja 41:10) Omunhu oo e shii kutya Jehova oku na ko nasha naye oha kala e na ombili yopamadiladilo nohashi mu pameke a dule okuungaunga nomapataneko e lili noku lili. Omuyapostoli Paulus okwa popya kombinga yomaliudo kutya oku li ‘ombili yaKalunga ei i dule eendunge adishe.’ Okwa weda ko vali a ti: “Aishe ohandi i dulu omolwaKristus, ou ta pameke nge.” — Ovafilippi 4:4-7, 9, 13.

Omishangwa otadi dulu oku tu kwafela tu pameke eitavelo letu momaudaneko aJehova omonakwiiwa. Pashihopaenenwa, Ehololo 21:4, 5 ole tu lombwela osho Kalunga ta ka ninga nonokutya omolwashike tu na okulineekela mwaasho ta ka ninga:

• ‘Ota ka feta po omahodi momesho’ ovanhu. Jehova ota ka xulifa po okumona oixuna akushe nosho yo oisho, nonande otashi monika sha fa itashi shiiva kuvamwe.

• “Nomukalimutumba kolukalwapangelo” lomeulu, Ohamba Inaenghono meshito alishe, otai ka longifa eenghonopangelo opo i xulife po okumona oixuna noku tu pa ekwafo olo twa pumbwa.

• Jehova okwa popya kutya omaudaneko aye ‘oshili noku shii okulineekelwa.’ Ota ka wanifa po omaudaneko aye metwokumwe neityo ledina laye.

“‘Ota feta po omahodi momesho avo, nefyo itali kala po vali ile oluhodi ile okulila ile ouyehame itau kala po vali, osheshi eshi shotete osha xula po.’ Nomukalimutumba kolukalwapangelo ta ti: ‘Tala, aishe ohandi i shitukifa i ninge ipe.’ Ndele okwa lombwela nge: ‘Shanga, osheshi eendjovo edi odo doshili nodi shii okulineekelwa.’” — Ehololo 21:4, 5.

Eshito lovenevene nosho yo Ombiibeli otai holola omaukwatya aTate yetu womeulu. Eshito otali tu linyengifa tu ninge ookaume kaKalunga, nOmbiibeli otai tu kwafele tu ehene popepi naye eshi ya ti: “Eheneni kuKalunga, opo nee Ye ta ehene kunye.” (Jakob 4:8) Oilonga 17:27 oya ti: ‘Ina kala kokule nafye nande umwe.’

Eshi ngoo to ende to shiiva Kalunga, osho ngoo to ka kala wa tomhwa kutya ‘ote ku file oshisho.’ (1 Petrus 5:7) Omauwa elipi haa di mokukala twe lineekela muJehova?

Natu ka taleni koshimoniwa shaToru wokoJapan. Nonande okwa tekulwa kuina Omukriste, okwa li a waimina ongudu yovalongi vominyonena ile tu tye eemafiya. Okwa ti: “Onda kala ndi shii kutya Kalunga okutonde nge, nonda kala ndi udite kutya eshi ovanhu ovo vo popepi naame tava fi, unene tuu ookaume kange, oshi li ehandukilo la dja kuKalunga.” Osho osha ningifa Toru aha kale vali ehe na “ouxwenge nosho yo omaxwilili.” Toru okwa popya kombinga yelalakano olo a li a hala okuhanga eshi a ti: “Onda li nda hala okufya fimbo nda li omunyasha konima eshi nda dipaa umwe oo a li a fimana e dule nge, naasho otashi ka ningifa edina lange li kale la tumbala.”

Ashike nande ongaho, konima eshi Toru a konakona Ombiibeli pamwe nomukulukadi waye, Hannah,  okwa li a ninga omalunduluko manene, ndele ta lundulula etaleko laye. Hannah okwa ti: “Onda mona filufilu kutya omushamane wange okwa ninga omalunduluko.” Toru okwa ti: “Onda mona kutya Kalunga oku na ko nasha nakeshe umwe womufye. Ina hala nande oumwe womufye a fye, nokwa halelela okudimina po ovo ve livela ombedi shili omolwomanyono avo. Oha pwilikine koinima oyo hatu mu lombwele noha kala e i udite ko e dulife keshe umwe. Jehova ota ka xulifa po omaupyakadi, okumona oixuna nosho yo ouyahame aushe monakwiiwa i li popepi. Nokuli nopaife ohe tu kwafele meenghedi di lili noku lili inatu shi teelela. Jehova oku tu hole nohe tu kwafele ngeenge tu li “mediniko.”” — Epsalme 136:23.

Ngaashi twa mona moshimoniwa shaToru, okukala tu shii kutya Kalunga ota dulu nota ka xulifa po omaupyakadi aeshe noku feta po omahodi aaveshe, itashi tu kwafele ashike tu kale neteelelo la twa, ndele otashi tu kwafele tu kale nonghalamwenyo i li xwepo paife. Nonande ohatu mono oixuna mounyuni ou, ohatu dulu okumona ouwa mefiloshisho laKalunga lopahole.