• Okwa hoololwa kuKalunga. “Aame tuu ou nda nangeka ohamba yange . . . , ndele handi ku pe ovapaani va ninge efyuululo loye, nominghulo dedu odoye.” — Epsalme 2:6, 8.

• Okwa dja mepata lohamba David. “Okaana ke tu dalelwa, Omona omumati e tu yandjelwa . . . Epangelo laye tali ningi linene, nombili itai xulu po okolukalwapangelo laDavid nomouhamba waye.” — Jesaja 9:6, 7.

• Okwa dalelwa muBetlehem. “Oove Betlehem . . . , mwoove tamu ka dja ou, ta ka ninga Omupangeli . . . Ye ota ka kala munene fiyo okominghulo dedu.” — Mika 5:2, 4.

• Okwa li a tondika kovanhu nokudipawa. “Ye omudinwa ndele Ye otwe mu tala a fa oshinima shongaho. . . . Okwa tuwa molwomatauluko etu, nokwa nyanyaulwa molwowii wetu.” — Jesaja 53:3, 5.

• Okwa nyumunwa nokutumbalekwa. “Omwenyo wange Ove ito u efele moshovafi nomuyapuki woye ito mu efa a mone eolelo. . . . Ouwapalinyenye ou li meke lokolulyo loye fiyo alushe.” — Epsalme 16:10, 11.

Mondjokonona aishe yovanhu, Jesus Kristus oye ashike a ningilwa oinima oyo nokwa wana okuninga Omupangeli. Omweengeli umwe okwa li a lombwela nokuli Maria, ina yaJesus, a ti: “Kalunga ote ke mu pa olukalwapangelo laxe David . . . nOuhamba waye itau ka xula po.” — Lukas 1:31-33.

Jesus ka li a ninga omupangeli eshi a li kombada yedu. Ponhele yaasho, ota ka pangela ovanhu okudja meulu e li Ohamba yOuhamba waKalunga. Oshike tashi ufa kutya oku li Omupangeli a denga mbada? Natu ka taleni komaukwatya oo a li e na eshi a li kombada yedu.

•   Jesus okwa li e na ko nasha novanhu. Okwa li ha kwafele ovalumenhu novakainhu, ovanyasha novakulunhu, kashi na nee mbudi kutya ova dja momaputuko elipi ile ovomufika ulipi moulikumwe wovanhu. (Mateus 9:36; Markus 10:16) Eshi Jesus a li a pulwa komunashilundu kutya, “Ngeenge owa hala, oto dulu okuvelula nge,” okwa li e mu kenukila noku mu velula. — Markus 1:40-42.

• Jesus okwa honga nghee hatu dulu okuhafifa Jehova. Okwa ti: “Itamu dulu okulongela Kalunga pamwe nemona.” Okwa li a ladipika ovanhu va kale tava ungaunga navakwao nawa. Natango, okwa ulika kutya Kalunga oku na ohokwe mwaasho hatu diladila nanghee tu udite. Opo tu hafife Jehova otu na okupangela omitima detu. (Mateus 5:28; 6:24; 7:12) Jesus okwa ti yo opo tu kale twa hafa shili, otu na okushiiva osho Kalunga a hala tu ninge noku shi longa. — Lukas 11:28.

• Jesus okwa honga kutya ohole oshike. Oilonga nosho yo eendjovo daye oya li ya kuma ovanhu lela komitima. “Eengudu dovanhu oda li da kuminwa ehongo laye, osheshi okwa li e va honga ngaashi ou e na eenghonopangelo.” (Mateus 7:28, 29) Okwa li yo e va honga, a ti: “Holeni ovatondi veni.” Okwa li a ilikanena yo ovo va li va kufa ombinga medipao laye, eshi a ti: “Tate, va dimina po osheshi kave shii eshi tava ningi.” — Mateus 5:44; Lukas 23:34.

Jesus oye a wana lela okukala Omupangeli wounyuni molwaashi oku na eenghono nomunanghenda. Ndele ota ka hovela okupangela naini?