Diladila nee ngeno kombada yedu kaku na etango! Etango ohali yandje eenghono komiti opo di dule okutula ko omafo, eengala, oiimati, eembudukufwa nosho yo eenhanga. Ohali kwafele yo omiti di fipe mo omeva medu a yuka komafo nosho yo okupitifa mo omeva oo molupe lomukumeva.

Odula oi li oshali ya dja kuKalunga oyo hai shi ningifa tashi shiiva opo edu li tu pe oikulya. Kalunga oha lokifa odula okudja meulu nokwe tu pa eloolo, e tu kutifa noikulya nokwa yadifa omitima detu nehafo.

Omaukwaneumbo mahapu oha kala e na oshisho shokupalula omaukwaneumbo avo noikulya nosho yo oku a pa oikutu. Didilika osho Omishangwa da ti: “Taleni nokukonenena eedila dokeulu; ihadi kunu, ihadi teya noihadi tuvikile momaanda, ndele Xo yeni womeulu ohe di palula. Mbela inamu fimana unene mu di dule?” — Mateus 6:25, 26

“Lihongeni keengala domoixwa nghee hadi kulu . . . ; ndele ohandi mu lombwele, nokuli naSalomo moshinge shaye ashishe ka djalele ngaashi imwe yomudo. Ngeenge Kalunga oha dike oimeno yomoixwa . . . , mbela ite ke mu dika, nye ovo mu na eitavelo linini?” — Mateus 6:28-30

Ngeenge Kalunga oha dulu oku tu pa oikulya nosho yo oikutu, mbela itatu dulu okukala nelineekelo kutya ote ke tu wanifila po eemhumbwe detu dakeshe fiku? Ngeenge otwa pitifa komesho ehalo laKalunga, ota ka nangeka noupuna eenghendabala detu opo tu dule okulikola oikulya momapya etu, ile e tu kwafele tu mone oilonga oyo tai ke tu kwafela tu dule okulanda osho twa pumbwa. — Mateus 6:32, 33

Oshoshili kutya, otu na omatomheno mahapu okukala tu hole Kalunga ngeenge hatu konakona etango, odula, oudila nosho yo eengala. Oshitukulwa tashi shikula ko otashi ka kundafana nghee Omushiti wetu a popile nale novanhu.