1. Oshike hashi uya momadiladilo oye, ngeenge to diladila kombinga yaJehova?

 MBELA owe lipulile ngoo nale kutya Jehova okwa tya ngahelipi? Ngeenge to popi naye meilikano, oshike hashi uya momadiladilo oye? Nonande Jehova iha monika, Ombiibeli oye mu popya meenghedi da yoolokafana. Jehova okwa ifanwa “etango noshikelelifo” nosho yo “omundilo oo hau lungwinifa filufilu.” (Eps. 84:11; Heb. 12:29) Omushangi umwe wOmbiibeli okwe mu faafanifa nemanya lasafir, oshivela tashi vema nosho yo outa wodula wa twa. (Hes. 1:​26-28) Omayelifo amwe oo e na sha naJehova ohae tu kumwifa, ile tashi dulika nokuli e tu tilife.

2. Oshike tashi dulu okwiimba vamwe va ehene popepi naJehova?

² Molwaashi ihatu dulu okumona Jehova, otashi dulika tu mone shidjuu okwiitavela kutya oku tu hole. Vamwe ohava diladila kutya Jehova ke na fiku a kale e va hole omolweenghalo odo va pita mudo. Otashi dulika inava ulikilwa ohole kooxe. Jehova oku udite ko omaliudo a tya ngaho, nanghee e va kuma. Opo e tu kwafele, Jehova okwe tu hololela omaukwatya aye a denga mbada okupitila mEendjovo daye.

3. Omolwashike tu na okuyandja elitulemo filufilu kohole yaJehova?

³ Oshitya shimwe osho sha popya nawa Jehova ohole. (1 Joh. 4:8) Jehova oye ohole. Ohole ohai nwefa mo keshe osho ta ningi. Kalunga oha ulike ohole nehalo liwa, nohole yaye inai ngabekelwa ashike ovo ve mu hole, ndele ohe i ulikile nokuli naavo vehe mu hole. (Mat. 5:​44, 45) Moshitukulwa eshi, ohatu ka yandja elitulemo filufilu kuJehova nosho yo kohole yaye. Shi fike ngoo opo hatu lihongo shihapu kombinga yaKalunga, opo ngoo tapa ka kala tu mu hole.

 JEHOVA OKU TU HOLE NEENGHONO

4. Ohole yaJehova yoku tu hola ohai ku ningifa u kale u udite ngahelipi? (Tala yo efano.)

⁴ “Jehova omunalukeno.” (Jak. 5:11) MOmbiibeli Jehova okwe liyelekanifa nomudalakadi omunahole. (Jes. 66:​12, 13) Diladila komudalakadi oo ha file oshisho pahole okaana kaye. Ohe ka tula komatundji te ka danaukifa noha popi nako newi litalala notali hekeleke. Ngeenge taka kwena, ile ke li mouyehame, oha shilipaleke kutya okwe ka pa osho ka pumbwa. Ngeenge tu li mouyehame, ohatu dulu okukala tu na oushili kutya Jehova oku tu hole. Omupsalme okwa ti: “Ngeenge ndi noshisho shoudjuu meni lange omahekeleko oye oo a hekeleka omwenyo wange.” — Eps. 94:19.

5. Ohole yaJehova i na oudiinini oye ku kuma ngahelipi?

⁵ Jehova omudiinini. (Eps. 103:8) Iha efa po okukala e tu hole, ngeenge twa ninga sha sha puka. Ovaisrael ova li va udifa nai Jehova lwoikando ihapu. Ashike eshi va li ve livela ombedi nokweefa po okulonga osho shii, okwa li e va shilipaleka kutya oku va hole nohole i na oudiinini. Okwe va lombwela, a ti: “Ove [ou] nondilo momesho ange, nomufimanekwa, shaashi ondi ku hole.” (Jes. 43:​4, 5) Ohole yaKalunga inai lunduluka. Ohatu dulu okulineekela alushe kutya oku tu hole. Nonande otwa ninga omapuko a kwata moiti, Jehova ihe tu ekeleshi. Ngeenge otwe livele ombedi noku a lukila kuJehova, ohatu ka mona kutya oku tu hole natango. Okwa udaneka kutya “puye ope nedimepo lomatimba mahapu.” (Jes. 55:7) Ombiibeli oya popya kutya Jehova ohe tu pe “ehekeleko” okupitila mediminepo. — Oli. 3:19.

6. Sakaria 2:8 ote tu hongo shike kombinga yaJehova?

⁶ Lesha Sakaria 2:8. Molwaashi Jehova oku tu hole, oha udu ko omaliudo etu nokwa halelela oku tu amena. Oha udu nai, ngeenge tu udite nai. Oshidjemo, ote ke tu nyamukula ngeenge otwa ilikana hatu ti: “Diinine nge ngaashi omuni yeisho loye.” (Eps. 17:8) Eisho oli li oshitukulwa sholutu osho shi na ondilo noshi na ouxwenge. Onghee ngeenge Jehova te tu yelekanifa nomuni yeisho laye, okwa fa ta ti: ‘Ngeenge umwe okwe mu ehameke, oshiwana shange, okwa ehameka oshinima osho shi na ondilo kwaame.’

7. Omolwashike twa pumbwa okupameka elineekelo letu kutya Jehova oku tu hole?

⁷ Jehova okwa hala tu kale twa tomhwa kutya oku tu hole paumwene. Ashike oku shii kutya omolweenghalo odo twa pita mudo, otashi dulika tu kale twa limbililwa ngeenge oku tu hole ngoo. Ile otashi dulika tu kale twa taalela  eenghalo paife, odo tadi yeleke elineekelo letu kutya Jehova oku tu hole. Oshike tashi dulu okupameka elineekelo letu? Lihonga nghee Jehova a ulika kutya oku hole Jesus, ovavaekwa nosho yo atusheni.

NGHEE JEHOVA HA ULIKE OHOLE YAYE

8. Omolwashike Jesus a li a tomhwa kutya Xe oku mu hole?

⁸ Jehova nosho yo Omona waye omuholike ova kala pamwe efimbo lile ve dule omunhu keshe. Momukokomoko womido dihapu, odo va kala pamwe meulu, ova kulika ekwatafano lopofingo nosho yo ohole yomoule yokuholafana. Jehova okwa ulika monghedi ya yela kutya oku hole Jesus, ngaashi hatu shi lesha muMateus 17:5. Jehova okwa li ashike ta dulu okutya, ‘Ou oye ou nde mu hokwa.’ Ndele molwaashi okwa hala tu shiive kutya oku hole Jesus shi fike peni, okwa ti: “Ou Omona wange omuholike.” Jehova okwa li e uditile Jesus etumba, unene tuu molwaashi okwa li poku ka yandja po omwenyo waye. (Ef. 1:7) Jesus okwa li yo e shii kutya Xe oku mu hole. Jehova okwa li e hole Jesus neenghono, na Jesus okwa li e na oushili kutya Xe oku mu hole. Okwa kala ha popi lwoikando kutya Xe oku mu hole. — Joh. 3:35; 10:17; 17:24.

9. Outumbulilo ulipi tau ulike kutya Jehova oku hole ovavaekwa? Shi yelifa. (Ovaroma 5:5)

⁹ Jehova okwa ulika yo kutya oku hole ovavaekwa. (Lesha Ovaroma 5:5.) Didilika outumbulilo oo wa longifwa “yadifwa,” ile tililwa. Emboitya limwe lOmbiibeli ole u yelifa kutya “omulonga tau kunguluka.” Olo kali fi tuu efano la twa olo tali divilike ohole inene yaJehova yokuhola ovavaekwa! Ovavaekwa ove shi shii kutya ove “holike kuKalunga.” (Jud. 1) Omuyapostoli Johannes okwa holola omaliudo avo, eshi a shanga, a ti: “Diladileni kohole inene oyo Tate e tu ulikila eshi e tu pa oufembanghenda wokwiifanwa ovana vaye.” (1 Joh. 3:1) Mbela ohole yaJehova oya ngabekelwa ashike ovavaekwa? Hasho, Jehova okwa ulika kutya oku tu hole atusheni.

10. Jehova okwe tu ulikila ohole monghedi ya denga mbada ilipi?

¹⁰ Jehova okwa ulika ohole monghedi ya denga mbada ilipi? Osheshi a yandja ekulilo. Eshi a ninga ngaho, okwa ulika ohole e dule keshe umwe. (Joh. 3:16; Rom. 5:8) Jehova okwa yandja Omona waye e na ondilo, e mu efa a file ovanhu aveshe, opo tu diminwe po omatimba etu notu ninge ookaume kaYe. (1 Joh. 4:10) Ngeenge otwa kala hatu dilonga kofuto oyo Jehova naJesus va yandja, ohatu ka uda ko nghee ve hole keshe umwe womufye. (Gal. 2:20) Ekulilo inali yandjwa ashike, opo ouyuki waJehova u wanifwe po. Oli li oshali yopahole. Jehova okwa ulika kutya oku tu hole, eshi a yamba po Jesus, oo e na ondilo kuye. Okwa efa Omona waye a mone oixuna nokufya ponhele yetu.

11. Oshike hatu lihongo muJeremia 31:3?

¹¹ Ngaashi twe shi mona, Jehova iha kala ashike e udite kutya oku tu hole, ndele okwe tu lombwela yo kutya oku tu hole shi fike peni. (Lesha Jeremia 31:3.) Jehova okwe tu nanena kuye, molwaashi oku tu hole. (Yelekanifa Deuteronomion 7:​7, 8.) Kape na oshinima, ile omunhu ta dulu okwiimba Jehova aha kale e tu hole. (Rom. 8:​38, 39) Ohole oyo oye ku ningifa u kale u udite ngahelipi? Lesha Epsalme 23 u mone nghee David a li e udite omolwohole oyo Jehova e mu ulikila nosho yo kutya oye ku ningifa u kale u udite ngahelipi.

OHOLE YAJEHOVA OYE KU NINGIFA U KALE U UDITE NGAHELIPI?

12. Oto dulu okungonga ngahelipi Epsalme 23?

¹² Lesha Epsalme 23:​1-6. MEpsalme 23, David okwa ulika elineekelo laye kutya Jehova oku mu hole noku na ko nasha naye. David, omushangi wepsalme eli, okwa popya kombinga yekwatafano lopofingo, olo li li pokati kaye naJehova, oo a ifana Omufita waye. David okwa li e udite a  amenwa, eshi a pitika Jehova e mu wilike nokwa li e lineekela muye filufilu. David okwa li e shii kutya Jehova ote ke mu ulikila ohole efiku keshe. Oshike she mu kwafela a kale e na elineekelo la kola?

13. Omolwashike David a li e na oushili kutya Jehova ote mu file oshisho?

¹³ “Ihandi pumbwa sha.” David okwa li a filwa oshisho, molwaashi Jehova okwa kala alushe he mu pe osho a pumbwa. David okwa li e shii kutya Jehova okaume kaye nokwe mu hokwa. Nomolwaasho a li e na oushili kutya kashi na nee mbudi kutya oshike sha li tashi ke mu ningilwa monakwiiwa, Jehova ota twikile okuwanifa po eemhumbwe daye adishe. Molwaashi David okwa li e lineekela kutya Jehova oku mu hole note mu file oshisho, oshe mu kwafela aha kale e na omalipulo, ndele ponhele yaasho, oshe mu etela ehafo nokwa kala a wanenwa. — Eps. 16:11.

14. Jehova ohe tu file ngahelipi oshisho pahole?

¹⁴ Jehova ohe tu file oshisho pahole, unene tuu ngeenge hatu ningilwa oinima ii monghalamwenyo yetu. Claire, a oo a kala ta longele kObetel oule womido di dulife po 20, okwa li e udite ehe na ekwafo, eshi ovaneumbo lavo va li va taalela omaupyakadi a shikulafana. Xe okwa li a dengwa kombada, umwe womovamwainakadona okwa li a kondwa novaneumbo lavo ova li va taalela oupyakadi wopashimaliwa nova li va kanifa eumbo lavo. Ongahelipi Jehova a ulika kutya ote va file oshisho pahole? Claire okwa ti: “Jehova okwa shilipaleka alushe kutya otu na osho twa pumbwa efiku keshe. Onghee omafimbo mahapu, Jehova okwa li nokuli he tu pe shi dulife pwaasho twa pumbwa. Ohandi diladila luhapu kunghee Jehova e tu kwafela noihandi dimbwa ohole yaye. Okudimbuluka oinima ya tya ngaho,  ohaku kwafele nge ndi twikile okulongela Jehova nehafo, ngeenge nda taalela vali omayeleko amwe.”

15. Omolwashike David a li e udite a hekelekwa? (Tala yo efano.)

¹⁵ “Ota hekeleke omwenyo wange.” Omafimbo amwe, David okwa li ha kala e udite a wililwa po komaupyakadi nokomayeleko aeshe oo a li a taalela. (Eps. 18:​4-6) Ashike ohole yaJehova nosho yo efiloshisho laye ola li le mu hekeleka. Jehova okwa li a twala kaume kaye, oo a li a loloka, ‘komatunda omwiidi mutalala’ nosho yo ‘komeva a ka tulumukwe.’ Oshidjemo, David okwa li a pamekwa nokwa li a dula okutwikila okulongela Jehova nehafo. — Eps. 18:​28-32.

16. Ohole yaJehova oye ku hekeleka ngahelipi?

¹⁶ Sha faafana kunena, ‘omolwouwanghenda wOmwene fye inatu kombwa po sheke,’ ngeenge twa taalela omaupyakadi monghalamwenyo nongeenge hatu kondjo neenghalo donhumba. (Omaimb.kemo. 3:22; Kol. 1:11) Natu ka taleni koshihopaenenwa shaRachel. Okwa li a uda nai unene, eshi omushamane waye e mu fiya po nokwa fiya po yo Jehova pefimbo lomukifi wekomba o-COVID-19. Jehova okwe mu ningila shike? Okwa ti: “Jehova okwa shilipaleka kutya onda ulikilwa ohole. Okwa pa nge ookaume ovo hava kala efimbo naame, hava etele nge oikulya, hava tumine nge omatumwalaka opahole nosho yo omishangwa. Ohava hafifa nge yo nokudimbulukifa nge kutya Jehova ota twikile okufila nge oshisho. Ohandi pandula alushe Jehova, eshi a pa nge oukwaneumbo wa kula nou na ohole.”

17. Omolwashike David a li ‘ina tila owii’?

¹⁷ ‘Itandi tila owii, osheshi Ove ou li pwaame.’ Onghalamwenyo yaDavid oya li hai kala moshiponga nokwa li e na ovatondi vahapu ovanaenghono. Ashike ohole yaJehova oye mu ningifa a kale e udite a amenwa. David okwa li e wete kutya Jehova okwa kala pamwe naye monghalo keshe, naasho osha li she mu hekeleka. Onghee okwa imba, a ti: ‘Jehova okwa xupifa nge metilo alishe.’ (Eps. 34:4) Nonande omafimbo amwe David okwa li ha kala a tila neenghono, okwa li a dula okufinda oumbada, molwaashi okwa li e shii kutya Jehova oku mu hole.

18. Ongahelipi eshilipaleko lohole yaJehova tali ku pameke, ngeenge wa tila?

¹⁸ Ongahelipi okukala tu shii kutya Jehova oku tu hole tashi tu pameke, ngeenge twa taalela eenghalo ditilifa? Omukokolindjila wedina Susi okwa hokolola nghee ye nomushamane waye va li ve udite, eshi omonamati wavo e lidipaa. Okwa ti: “Ngeenge wa ningilwa oshinima shinyikifa  oluhodi monghalamwenyo yoye, ohashi ku kumu neenghono noho kala wa tila kutya pamwe oto ka ningilwa oinima ihapu ii. Ashike ohole yaJehova oye tu ningifa tu kale tu udite twa amenwa.” Rachel, oo a tumbulwa metetekelo, okwa ti: “Onguloshi imwe, onda li nda nyika oluhodi unene, nda li handi lipula nonda tila. Onghee onda li nda ilikana kuJehova mokule. Okudja opo, onda li ndi udite nda hekelekwa nonda ngungumana, ngaashi ashike omudalakadi ha hekeleke okahanana kaye, opo nee onda li nda kofa. Nghi na efiku ndi dimbwe efiku olo.” Omukulunhuongalo umwe wedina Tasos okwa kala modolongo oule womido nhee, eshi a dika eenyala medu aha ye moukwaita. Okwa mona ngahelipi kutya Jehova oku mu hole note mu file oshisho? Okwa ti: “Jehova okwa pa nge oinima ihapu i dule osho nda pumbwa. Osho osha pameka elineekelo lange kutya ohandi dulu oku mu lineekela filufilu. Shikwao vali, Jehova okwa kwafela nge okupitila momhepo yaye ndi kale nda hafa, nonande ondi li monhele oyo ipolimaneka. Osho osha kwafela nge ndi mone kutya ngeenge onda kala nde lineekela Jehova, ohandi ka mona kutya oku hole nge. Onghee onda li nda hovela oku mu longela, ndi li omukokolindjila wondjikilile, ofimbo ndi li modolongo.”

EHENA POPEPI NAKALUNGA OMUNAHOLE

19. (a) Ongahelipi okushiiva kutya Jehova oku tu hole, haku kumu osho hatu popi momailikano etu? (b) Eendjovo di na sha nohole yaJehova dilipi de ku kuma paumwene? (Tala oshimhungu “ Eendjovo odo de tu kwafela tu kale tu udite kutya Jehova oku tu hole.”)

¹⁹ Oimoniwa aishe oyo twa kundafana otai ulike kutya Jehova, “Kalunga kohole,” oku li pamwe nafye. (2 Kor. 13:11) Oku na ohokwe mukeshe umwe womufye paumwene. Otwa tomhwa kutya otwa “dingililwa konghenda [yaye].” (Eps. 32:10) Ngeenge otwa kala hatu dilonga kunghee he tu ulikile ohole, ohatu ka mona kutya ote tu file oshisho shi fike peni nohatu ka ehena popepi naye. Ohatu dulu okwiilikana kuye twa manguluka, hatu mu lombwela kutya otwa pumbwa ohole yaye shi fike peni. Ohatu dulu oku mu lombwela oinima aishe oyo hatu lipula nayo, molwaashi otu na elineekelo kutya oku tu udite ko nokwa halelela oku tu kwafela. — Eps. 145:​18, 19.

20. Ongahelipi ohole yaJehova yoku tu hola hai tu ehenifa popepi naye?

²⁰ Ngaashi ashike hatu ehene pomundilo ngeenge kwa talala, ohatu nanenwa kuJehova omolwohole yaye. Nonande ohole yaJehova oi na eenghono, oi na yo olukeno. Onghee kala wa hafa, molwaashi Jehova oku ku hole. Opo nee omolwohole yaye, atusheni ohatu dulu okutya: “Ondi hole Omwene.” — Eps. 116:1.