MOLWAASHI otu li mounyuni u na omaupyakadi mahapu, otu na okulonga noudiinini opo tu mone ombili. Nonande ohatu kala tu na ombili, luhapu ohatu kendabala oku i kaleka po. Eendjovo daKalunga oda popya shike osho tashi dulu oku tu kwafela tu mone ombili yashili notai kalelele? Nongahelipi hatu dulu okukwafela vakwetu va ninge sha faafana?

Opo tu hafele ombili yashili, otu na okukala tu udite twa amenwa. Otwa pumbwa yo okupanga oukaume wopofingo navamwe. Osho sha fimanenena twa pumbwa okuninga opo tu mone ombili yashili, otu na okupanga oukaume wopofingo naKalunga. Ongahelipi hatu dulu okuninga ngaho?

Ngeenge ohatu dulika koipango nokomafinamhango ouyuki aJehova, ohatu ulike kutya otwe mu lineekela nosho yo kutya otwa hala okupanga ombili naye. (Jer. 17:7, 8; Jak. 2:22, 23) Oshidjemo, ota ka ehena popepi nafye note ke tu nangeka noupuna nombili yokomutima. Jesaja 32:17 okwa ti: “Ndele oshilonga shouyuki osho ombili neliko louyuki etulumuko, nokulimwenenena nomokulineekela fiyo alushe.” Ohatu dulu okumona ombili yashili mokukala hatu dulika kuJehova tashi di komutima. — Jes. 48:18, 19.

Omhepo iyapuki, oyo i li oshali ya denga mbada ya dja kuTate yetu womeulu, ohai tu kwafele yo tu kale tu na ombili tai kalelele. — Oil. 9:31.

Omuyapostoli Paulus okwa tumbula ombili i li oukwatya utitatu ‘woiimati yomhepo.’ (Gal. 5:22) Molwaashi ombili yashili ohai etifwa komhepo yaKalunga, otu na okukala hatu wilikwa komhepo iyapuki opo tu kale tu na ombili yashili. Natu ka konakoneni eenghedi mbali omo omhepo yaKalunga tai dulu oku tu kwafela tu mone ombili.

Shotete, okulesha Eendjovo daKalunga da nwefwa mo pandjikilile ohaku tu kwafele tu kale  tu na ombili. (Eps. 1:2, 3) Ngeenge hatu dilonga ketumwalaka lOmbiibeli, omhepo yaKalunga ohai tu kwafele tu ude ko nghee Jehova ha tale ko oinima. Pashihopaenenwa, ohatu mono nghee ha kala e na ombili alushe nonokutya omolwashike ombili ya fimana kuye. Ohatu ka mona ombili inene monghalamwenyo yetu ngeenge otwa tula moilonga oilihongomwa oyo hatu lihonga mEendjovo daKalunga. — Omayel. 3:1, 2.

Oshitivali, otu na okwiilikana Kalunga e tu pe omhepo yaye. (Luk. 11:13) Jehova okwa udaneka kutya ngeenge ohatu kongo ekwafo laye, ‘ombili yaye ei i dule eendunge adishe, otai ka amena omitima detu nomadiladilo etu muKristus Jesus.’ (Fil. 4:6, 7) Ngeenge ohatu ilikana twe lineekela omhepo yaJehova, Jehova ote ke tu pa ombili yokomutima oyo hai kala ashike i niwe kwaavo ve na ekwatafano la kola naye. — Rom. 15:13.

Ongahelipi vamwe va li va tula moilonga omayele opamishangwa, nokuninga omalunduluko manene oo e va kwafela va kale ve na ombili tai kalelele naJehova nosho yo novanhu vakwao?

Vamwe ovo ve li momaongalo opaKriste kunena ova li nale ‘ovahandunhu’ ashike paife ohava ungaunga navakwao nonghenda nosho yo nombili nove na omhepo youkaume. * (Omayel. 29:22) Didilika nghee osho sha li sha ningilwa shili ovaudifi vavali vOuhamba ovo va li va kwafelwa va finde ehandu, nova pange ombili navamwe.

Oikala ii yaDavid oya li ya nwefa mo okupopya kwaye. Ofimbo ine liyapulila Kalunga, okwa li ha ungaunga navakwao nonyanya, noha longifa omalaka mai moukwaneumbo wavo. Mokweendela ko kwefimbo, okwa li a mona kutya okwa pumbwa okuninga omalunduluko nokukala omunambili. Ongahelipi a li a mona ombili? Okwa ti: “Onda li nda hovela okutula moilonga omafinamhango Ombiibeli monghalamwenyo yange, naasho osha li sha kwafela nge ndi fimaneke oilyo youkwaneumbo wetu.”

Onakudiwa yaRachel oya li ya nwefa mo elihumbato laye. Okwa ti: “Nopaife ohandi mono shidjuu okweefa po ehandu, molwaashi onda  kulila moukwaneumbo uhe na ombili.” Oshike sha li she mu kwafela a kale e na ombili? Okwa ti: “Okwiilikana nde lineekela muJehova.”

David naRachel ova tula po oihopaenenwa ivali yoiimati yombili oyo hai etifwa kokutula moilonga omafinamhango opamishangwa a nwefwa mo, nokukala twe lineekela kutya omhepo yaKalunga otai tu kwafele. Nonande otu li mounyuni u yadi outondwe, ohatu dulu okukala tu na ombili yokomutima oyo hai tu kwafele tu kale moukumwe momaukwaneumbo etu nosho yo nOvakriste vakwetu. Jehova ote tu ladipike tu kale “nombili novanhu aveshe.” (Rom. 12:18) Mbela osho otashi shiiva ngoo, nomauwa elipi haa di meenghendabala detu dokupanga ombili navamwe?

Ohatu shivi ovanhu va mone ouwa metumwalaka lombili olo hatu udifa moukalele li na sha nOuhamba waKalunga. (Jes. 9:6, 7; Mat. 24:14) Shitunhula, vahapu ohava pwilikine nawa. Oshidjemo, ihava kala vali va wililwa po kepolimano ile kehandu omolwoinima oyo hava mono tai ningwa. Ponhele yaasho, paife ove na eteelelo la twa li na sha nonakwiiwa nohali ve linyengifa va ‘konge ombili’ noku i kaleka po. — Eps. 34:14.

Haaveshe hava hafele okupwilikina etumwalaka letu, unene tuu petalelepo lotete. (Joh. 3:19) Ashike nande ongaho, omhepo yaKalunga ohai tu kwafele tu va udifile onghundana iwa tu na ombili nosho yo monghedi yefimaneko. Kungaho, ohatu landula ewiliko laJesus li na sha noukalele olo li li muMateus 10:11-13, omo e tu pa omayele a ti: “Ndele ngeenge tamu i meumbo, likundeni nombili. Ndele eumbo olo ngeenge la wana, ombili yeni nai kale mo; ndele ngeenge inali wana, ombili yeni nai shune kunye.” Ohatu dulu okukala nombili yetu nosho yo okukwafela ovanhu monakwiiwa, ngeenge ohatu tula moilonga omayele aJesus.

Ohatu hapupalifa yo ombili ngeenge hatu popi novanambelewa vepangelo monghedi yefimaneko mwa kwatelwa ovo tashi dulika hava pataneke oilonga yetu. Pashihopaenenwa, moshilongo shimwe muAfrika epangelo ola li le tu kelela tu tunge Omalupale Ouhamba. Molwaashi otwa li twa hala okukandula po omukundu oo nombili, omumwatate umwe oo a li nale omutumwa moshilongo osho shaAfrika okwa li a tumwa a ye komukalelipo woshilongo shavo moLondon, shomuEngland. Okwa li ta ka lombwela omukalelipo oo oilonga yombili yEendombwedi daJehova moshilongo omo. Mbela etalelepo olo ola li la enda ngahelipi?

Okwa ti: “Eshi nda fika mombelewa, onda li nda mona kutya omunhu oo ha yakula ovanhu owomuhoko welaka olo nda li nde lihonga eshi nda tala omidjalo daye. Onda li nde mu popifa melaka laye. Okwa li a kumwa nokwa li a pula nge kutya, ‘Owa endela shike?’ Onda li nde mu lombwela nengungumano kutya onda hala okumona omukalelipo woshilongo osho. Okwa li a dengela omukalelipo oo, nokwa li e uya ndele ta popifa nge melaka lomoshitukulwa. Konima yaasho, okwa li a pwilikina nawa eshi nda li handi mu yelifile oilonga yombili yEendombwedi.”

Eyelifo lomumwatate oo ola li la kwafela omukalelipo oo aha kale vali e na eudeko la puka, nokuhakaleke vali oilonga yetu. Lwanima, epangelo moshilongo osho shaAfrika ola li la kufa po eendjidikila di na sha nokutunga. Ovamwatate kava li tuu va hafela oshidjemo osho shiwa! Okuungaunga navamwe nefimaneko ohaku etifa omauwa mahapu mwa kwatelwa ombili.

Kunena, oshiwana shaJehova ohashi hafele oparadisa yopamhepo oyo iyadi ombili. Oto ka weda ko kombili oyo eshi to kulike oukwatya woiimati yomhepo monghalamwenyo yoye. Osho sha fimanenena unene oshosho kutya oto ka kala wa hokiwa kuJehova noto ka mona ombili ihapu notai kalelele mounyuni mupe waKalunga. — 2 Pet. 3:13, 14.