Va mona nghee va ulikilwa ohole meongalo
YOMARA nosho yo ovamwainamati Marcelo naHiver ohava di mokamukunda kanini ke li moGuatemala. Yomara okwa hovela okukonakona Ombiibeli nEendombwedi, nomokweendela ko kwefimbo ovamwainamati navo ova li ve mu waimina. Ashike opa li oupyakadi. Aveshe vatatu ovapofi noihava dulu okulesha eendada doshipofi. Onghee oo ha konakona navo Ombiibeli ohe va leshe outendo nosho yo eevelishe mOmbiibeli daasho tava kundafana.
Osha li yo shidjuu kuvo okuya kokwoongala. Kava li tava dulu okweenda kuvo vene olweendo lominute 40 okuya kOlupale lOuhamba olo li li popepi navo. Ashike ovamwatate meongalo ova li va ninga elongekido, opo va kale have va twala kokwoongala. Eshi va hovela okuyandja oipopiwa yovanafikola pokwoongala kwomokati koshivike, ovamwatate ova li have va kwafele va koneke oipopiwa yavo momutwe.
MuMei 2019, okwoongala okwa li kwa hovela okukala haku ningilwa momukunda wavo. Pefimbo opo, ovalihomboli vamwe, ovo ve li ovakokolindjila, ova li va tembukila momukunda wavo. Ova li ve shi ninga elalakano, opo ve va honge okulesha nosho yo okushanga eendada doshipofi, nokuli nonande ovalihomboli ovo kava li ve shii nghee ve na oku shi ninga. Onghee ova li va ya kongulumambo nokukufa omambo eendada doshipofi, opo ve lihonge nghee ve na okuhonga vamwe va dule oku a longifa.
Marcelo ta yandje etyekosha pokwoongala
Moule weemwedi dinini, ovamwainafana ovo vatatu ova li va hovela okulesha eendada doshipofi, naasho osha li she va kwafela, opo va ninge exumokomesho lopamhepo la wedwa po. a Paife Yomara, Marcelo naHiver ova ninga ovakokolindjila vondjikilile. Marcelo oku li omuyakuliongalo. Ohava kala ve lipyakidila neenghono mokulongela Jehova momukokomoko woshivike ashishe. Ouladi wavo owa nwefa mo ovo ve va dingilila.
Ovamwainafana ovo vatatu ova pandula neenghono eyambidido lopahole leongalo. Yomara okwa ti: “Oshikando shetu shotete, eshi twa shakena nEendombwedi, ode tu ulikila ohole yashili yopaKriste.” Marcelo okwa weda ko ta ti: “Otu na ookaume va denga mbada meongalo letu, notu li oshitukulwa shoumwainafana womounyuni aushe, oo wa hangana nou holafane.” Yomara novamwainamati ova teelela nodjuulufi oku ka mona nghee Jehova ta ka ninga edu oparadisa. — Eps. 37:10, 11; Jes. 35:5.
a Okambo ke na oshipalanyole Learn to Read Braille oka nuninwa okukwafela ovapofi nosho yo ovo ihava mono ko nawa ve lihonge nghee ve na okulesha nokushanga eendada doshipofi.
Otashi dulika yo u hafele oikundafanwa ei
NGHEE OMAYAMBIDIDO ENI TAA LONGIFWA
Eendada odo da lundulula onghalamwenyo yovanhu
Ihatu nyanyangida ashike oishangomwa meendada doshipofi ndele ohatu hongo yo vamwe okulesha eendada doshipofi.
