KATHERINE okwa kulila mOilongo ya Hangana nokwa ninginifwa e li Ondombwedi yaJehova eshi e na omido 16. Okwa li a lenga oukalele waye, ashike ovanhu vomoshitukulwa shavo kave na lela ohokwe metumwalaka lOuhamba. Okwa ti: “Ohandi lesha oimoniwa i na sha novanhu ovo va ilikana Kalunga a tume omunhu e va kwafele ve mu shiive. Ohandi kala nda hala ngeno okuhanga omunhu a tya ngaho, ndele oye ngoo ihandi mono oo.”

Eshi Katherine a kala nokuudifila moshitukulwa omo oule womido, okwa ka kala a hala okuya koshitukulwa oko ku na ovanhu vahapu ve na ohokwe metumwalaka lOuhamba. Ashike okwa li te lipula nongeenge ote ke shi pondola ngoo. Monghalamwenyo yaye okwa kala ashike kokule noukwaneumbo wavo lumwe, oule woivike ivali, ndele efiku keshe okwa li ha kala a djuulukwa keumbo neenghono. Ashike okwe ke shi pondola molwaashi okwa li a halelela okukwafela ovo tava kongo Jehova. Konima eshi a dilonga keenhele donhumba oko ta dulu okutembukila, okwa li a shangela koshitaimbelewa shaGuam nokwa li a pewa ouyelele oo a pumbwa. MuJuli 2007, eshi Katherine e na omido 26, okwa li a tembukila koSaipan, okanhunhu ke li pEfuta la Mwena, eekilometa 10 000 okudja keumbo lavo. Mbela oshe ke mu endela ngahelipi?

Diva ashike eshi Katherine a tembukila keongalo lipe, okwa li a shakena nomukainhu umwe womido 40 nasha wedina Doris, oo a li a tambula ko ekonakonombibeli. Konima eshi va konakona omatukulwa atatu okehovelo mOmbibeli otai hongo, Katherine okwa ka diladila okuninga po omalunduluko. Okwa ti: “Doris omukonakoni muwa, nokanda li ndi wete ndi na owino woku mu kwafela. Shidalelwe ndi kale nomukonakoni ta ningi exumokomesho, nomolwaasho nda li ndi udite kutya Doris okwa pumbwa okukonakona nomumwameme a pyokoka nowepupi laye.” Katherine okwa li a pula Jehova meilikano e mu kwafele a hoolole omumwameme ta wapalele oo ta dulu okulineekelela omukonakonimbibeli waye. Opo nee okwa li a tokola a lombwele Doris kombinga yelunduluko olo.

Katherine okwa ti: “Fimbo inandi eta po oshikundafanwa osho, Doris okwa lombwela nge kutya okwa hala okukundafana naame kombinga youpyakadi wonhumba. Eshi nda pwilikina kuye, onde mu lombwela nghee Jehova a kwafela nge ndi ungaunge nonghalo ya faafana. Doris okwa li a pandula nge.” Opo nee okwa li a lombwela nge ta ti: “Jehova okwe ku longifa u kwafele nge. Fiku we uya keumbo letu oshikando shotete, onda li handi lesha Ombibeli oule weevili. Onda li handi  kwena, handi pula Kalunga a tumine nge omunhu a kwafele nge ndi ude ko Ombibeli. Opo nee owa li wa konghola pomuvelo wange. Jehova okwa li a nyamukula eilikano lange.” Katherine okwa li ta kwena eshi ta hokolola ehokololo olo tali kumu omutima. Okwa ti: “Eendjovo daDoris oda li enyamukulo keilikano lange. Jehova okwa li a ulikila nge kutya ohandi dulu okutwikila okukonakona naDoris.”

Doris okwa ka ninginifwa mo 2010, nopaife oku na ovakonakonimbibeli vaye. Katherine okwa ti: “Onda hafa neenghono eshi nda kwafela omunhu oo a halelela okuninga omupiya waJehova molwaashi osho nda kala nda halelela.” Kunena, Katherine ota hafele okulonga e li omukokolindjila e likalekelwa kokanhunhu ke li pEfuta la Mwena moKosrae.

Ovamwatate novamwameme ve dulife pefele va dja kondje yoilongo (ve li pomido 19 fiyo 79) ova ka longa apa pe na omhumbwe inene yovaudifi moMicronesia. Omaliudo ovamwatate ovo valadi okwa hokololwa nawa kuErica, oo a tembukila koGuam mo 2006 eshi e na omido 19. Okwa ti: “Oshihafifa okukokola ondjila moshitukulwa omo ovanhu ve na enota loshili. Onda hafa neenghono eshi Jehova a kwafela nge ndi ye moshilonga osho. Oyo oyo onghedi ya denga mbada yokukalamwenyo.” Paife Erica ota hafele okulonga e li omukokolindjila e likalekelwa moEbeye kounhunhu vaMarshall. Ashike okulonga kondje yoshilongo oshi na yo omashongo. Natu ka kundafaneni atatu omuo nokutala kutya ongahelipi ovo va tembukila koMicronesia va ungaunga nao.

Onghedi yokukalamwenyo. Konima eshi Simon oo a li e na omido 22 a fika kokanhunhu kaPalau mo 2007, okwa li a mona kutya ota dulu ashike okumona oumaliwa vaninini ve dulike kokule kwaasho a li ha mono moshilongo shavo moEngland. Okwa ti: “Onde lihonga okuhalanda keshe osho nda hala. Paife ohandi hoolola noukeka kutya oikulya ilipi ndi na okulanda, nohandi kongo apa pe na ombilixa. Ngeenge oshinima shange shimwe osha teka, ohandi ka konga shikulu osho sha teka nokukonga oo ta kwafele nge e shi pangele.” Okukala nonghalamwenyo yanafangwa okwe mu kuma ngahelipi? Simon okwa ti: “Okwa kwafela nge ndi lihonge kutya oshike sha pumbiwa lela monghalamwenyo nonghee handi dulu okuxupa nakanini. Onda kala ndi wete nghee eke laJehova tali yambidida nokufila nge oshisho lwoikando. Omido heyali odo nda kala handi longo oku, inandi hepa sha shokulya ile onhele yokunangala.” Doshili, Jehova oha yambidida ovo ve na onghalamwenyo yanafangwa omolwokukonga tete Ouhamba. — Mat. 6:32, 33.

Odjuulufi yokeumbo. Erica okwa ti: “Molwaashi onda ika vambuletu neenghono, onda li handi diladila kutya odjuulufi otai ka piyaaneka oukalele wange.” Okwa li e lilongekidila ngahelipi oshinima osho? Okwa ti: “Fimbo inandi tembuka, onda li nda lesha oitukulwa mOshungonangelo i na sha nongeenge wa djuulukwa keumbo. Osho osha longekida omutima wange opo ndi dule okuungaunga neshongo olo. Moshitukulwa shimwe omwa popiwa omudalakadi ta shilipaleke okamonakadona kutya, ‘Jehova ote ku file oshisho nawa e dule nge.’ Eshilipaleko olo ola pameka nge neenghono.” Hannah nomushamane waye Patrick, otava longele Jehova  kounhunhu vaMarshall moMajuro. Hannah oha kondjifa odjuulufi yokeumbo mokuyandja elitulemo laye kovamwatate novamwameme vomeongalo omo ve li. Okwa ti: “Ohandi pandula Jehova alushe eshi tu na oumwainafana womounyuni aushe molwaashi navo oukwaneumbo wetu. Ngeno opa li pehe na ekwafo lavo lopahole, ngeno inandi dula oku ka longa oko ku na omhumbwe inene yovaudifi.”

Okupanga oukaume. Simon okwa ti: “Eshi ngoo to fiki moshilongo shimwe, hanga oinima aishe oi li shimwe shi lili. Omafimbo amwe ohandi kala nda djuuluka okuninga omashendjo novanhu ovo twe liika navo.” Erica okwa ti: “Eshi opo nda i ko, onda li handi kala ndi wete nda fa handi pitililwa po, ashike osho osha kwafela nge ndi dimbuluke kutya oshike sha eta nge konhele oku. Inandi tembuka omolwouwa wopaumwene, ndele omolwokulongela Jehova shihapu.” Okwa weda ko vali a ti: “Lwanima onda ka panga oukaume muwa, oo nda lenga neenghono.” Simon okwa ninga eenghendabala e lihonge elaka lOshipalauan, olo le mu kwafela a ‘mbwalangadjele’ ovamwaxe vomeongalo omo e li. (2 Kor. 6:13) Eenghendabala daye dokulihonga elaka ode mu ningifa a kale e holike kovamwaxe. Onghee hano, ngeenge ovamwatate ovo ve uya monhele yonhumba tava longo pamwe novamwatate vomoshitukulwa, aveshe ohava mono ondjabi yokuhafela oukaume wopofingo meongalo. Ovo have liyambe nehalo liwa va ka longe opo pe na omhumbwe inene yovaudifi ohava mono ondjabi imwe vali ilipi?

Omuyapostoli Paulus okwa ti: ‘Ou ta kunu nepuniko, ota teya yo nepuniko.’ (2 Kor. 9:6) Efinamhango olo la popiwa momushangwa oo ola yukifwa kwaavo tava tamununa mo oukalele wavo. Mbela oiimati ilipi ovo va ka longa moMicronesia tava ‘teya nepuniko’?

MoMicronesia omu na eemhito dihapu dokuhovela omakonakonombibeli nosho yo okumona nghee ovo tave lihongo nokutula moilonga oshili yomEendjovo daKalunga tava ningi exumokomesho. Patrick naHannah ova li yo va udifila koAngaur, okanhunhu kanini ke na ashike ovakalimo 320. Lwanima eshi va kala oko oule weemwedi mbali, ova li va shakeneka omudalakadi oo ta tekula ovana oye aeke. Diva okwa li a tambula ko ekonakonombibeli nokuulika kutya oku hole oshili mokuninga omalunduluko manene monghalamwenyo yaye. Hannah okwa ti: “Konima yekonakono keshe eshi hatu di ko keumbo laye twa londa eembashikela, ohatu litale ndele hatu popile oshita hatu ti: ‘Tangi Jehova.’” Hannah okwa weda ko ta ti: “Otu shi shii kutya Jehova okwa li ta dulu okunanena omukainhu ou kuye monghedi yonhumba ile yongadi, ndele molwaashi otwe ya okulongela oko ku na omhumbwe inene yovaudifi, otwa li twa dula okumona nokukwafela umwe oo a fa odi opo a shiive Jehova. Oshimoniwa osho osho unene sha li enangekonoupuna la fimana monghalamwenyo yetu aishe.” Ngaashi Erica a ti, “ngeenge owa kwafele umwe a shiive Jehova, oho mono ehafo itali yelekwa nasha.”

Moilongo ihapu omu na omhumbwe inene yovaudifi vOuhamba. Mbela ito dulu okuninga umwe womwaavo tava tembukile oko ku na omhumbwe inene? Pula Jehova meilikano a pameke ehalo loye lokutamununa mo oukalele woye. Kundafana oshinima sha tya ngaho novakulunhuongalo, nomupashukilishikandjo ile ovo ve na oufembanghenda wokulonga koilongo oko ku na omhumbwe inene yovaudifi. Ngeenge owa mono kutya owe lilongekida, shangela koshitaimbelewa osho tashi pashukile oshitukulwa oko wa hala okuya nokupula ouyelele muhapu. * Otashi dulika naave to dulu okuwaimina ovamwatate novamwameme omayovi ovanyasha novakulunhu, ovalihomboli naavo inava hombola ile inava hombolwa, ovo ve liyamba va longe nehalo liwa nokumakela ehafo ‘lokuteya nepuniko.’