Anthony: Wa lele po, Tim. Onda hafa eshi twa shakena vali.

Tim: Naame onda hafa eshi nde ku mona.

Anthony: Onde ku etela oifo ipe Oshungonangelo no-Awake! Onde lineekela oto ka hafela filufilu oitukulwa oyo i li moifo ei.

Tim: Tangi unene. Onda hafa nokuli eshi we uya nena molwaashi ope na oshinima shonhumba nda hala ndi ku pule.

Anthony: Okombinga yashike?

Tim: Efiku limwe onda li handi popi nomunailonga mukwetu. Onde mu lombwela kombinga yoishangomwa oyo wa pele nge nanghee i hokwifa. Ashike okwa ti inandi i lesha molwaashi Eendombwedi daJehova inadi itavela muJesus. Mbela osho oshoshili? Onde mu lombwela kutya ohandi uya ndi ku pule eshi to uya okutalela nge po.

Anthony: Onda hafa unene eshi wa pula nge. Owa ninga nawa nokuli eshi wa pula odikilila umwe womEendombwedi daJehova ponhele yokupula umwe e lili. Kakele kaasho, kape na onghedi imwe iwa to dulu okumona osho omunhu a itavela ponhele yoku mu pula yemwene.

Tim: Naame osho nda diladila ngaho.

Anthony: Oshili oyo yo kutya, Eendombwedi daJehova oda itavela filufilu muJesus. Otwa itavela yo kutya osha fimana okukala neitavelo tali longo muJesus opo tu ka xupifwe.

Tim: Naame osho nda diladila, ndele eshi omunailonga mukwetu a ti inamu itavela muJesus, osha li sha limbililika nge. Ondi wete kutya inatu kundafana naanaa nale kombinga yoshinima osho.

Anthony: Nandi ku ulikile eevelishe dimwe mOmbibeli odo tadi divilike kutya osha fimana okukala neitavelo tali longo muJesus. Eendombwedi daJehova luhapu ohadi longifa eevelishe odo eshi tadi udifile ovanhu.

Tim: Eewa.

Anthony: Oshiwa okuhovela neendjovo daJesus mwene odo tadi hangwa muJohannes 14:6. Eendjovo odo odi li oshitukulwa sheenghundafana daJesus odo a li a ninga naumwe womovayapostoli vaye. Otadi ti: “Jesus okwe mu nyamukula: Aame ondjila noshili nomwenyo; kape na ou te uya kuTate, ngenge hamuame ta pitile.” Okutala kovelishe oyo, onghedi imwe aike ilipi hatu dulu okuuya kuTate?

Tim: Okupitila muJesus.

Anthony: Osho naanaa. Eendombwedi daJehova osho naanaa da itavela ngaho filufilu. Nandi ku pule: Ngeenge tashi uya kombinga yoiteelelwa yaKalunga oyo u shi, ngeenge omunhu ta ilikana, omailikano aye oku na okupitila medina lalyelye?

Tim: Omedina laJesus.

Anthony: Ou li mondjila. Nomolwaasho omailikano aeshe oo handi ilikana handi ti medina laJesus. Eendombwedi daJehova adishe osho naanaa hadi ilikana ngaho.

Tim: Hambaa.

Anthony: Ohatu dulu vali okutala omushangwa u li muJohannes 3:16. Ovelishe yOmbibeli oyo oya fimanenena nomolwaasho ya ifanwa Evangeli linini. Ngeno ngeenge owa kufa ashishe osho sha shangwa shi na sha nonghalamwenyo yaJesus yokombada yedu nosho yo oukalele waye, noku shi popya pauxupi omushangwa oo otau wanifa po ediladilo alishe. Pamwe oto dulu okuulesha.

 Tim: Eewa. Otau ti: “Osheshi osho Kalunga a kala e hole ounyuni, Oye a yandja Omona waye Ewifa, opo keshe ou te mu itavele a ha kane, ndelenee a kale e nomwenyo waalushe.”

Anthony: Tangi unene. Ovelishe oyo mbela ou i shii nale?

Tim: Heeno, Ohandi i udu lwoikando, naluhapu ohandi i mono ya shangwa komadidiliko nokoipelende yokutulika omafano.

Anthony: Ovelishe oyo oi shiivike keshe pamwe. I tala noukeka nokudidilika osho Jesus a ti. Okwa ti ohole yaKalunga oye shi ningifa tashi shiiva opo ovanhu va dule oku ka hafela omwenyo waalushe. Ndele ongeenge ashike twa ningi shike?

Tim: Ongeenge tu na eitavelo.

Anthony: Osho naanaa. Oku shi popya kondadalunde, otu na okwiitavela mOmona ewifa aeke, Jesus Kristus. Onghee hano, okwiitavela muJesus okwa yeululila ovanhu ondjila oyo tai twala komwenyo waalushe, naasho osha yelifwa nawa pepandja 2 loshifo eshi nde ku etela. Shi na sha nelalakano lOshungonangelo, oya ti kutya mokati koinima ikwao, oshifo eshi “ohashi ladipike ovanhu va kale ve na eitavelo muJesus Kristus, oo e tu fila opo tu dule oku ka mona omwenyo waalushe nota pangele paife e li Ohamba yOuhamba waKalunga.”

Tim: Oshili nawa. Oifo yeni nayo mboli otai ulike kutya Eendombwedi daJehova oda itavela muJesus.

Anthony: Osho naanaa.

Tim: Ndele omolwashike ovanhu hava ti inamu itavela muJesus?

Anthony: Ope na omatomheno mahapu kutya omolwashike ovanhu hava ti ngaho. Peemhito dimwe, ovanhu ohava ti ngaho molwaashi hava udu ovanhu tave shi popi. Ile tashi dulika va hongwa eudeko la puka la tya ngaho kovawiliki vomalongelokalunga avo.

Tim: Ame ohandi diladila kutya kashiimba ovanhu ohava ti inamu itavela muJesus molwaashi ohamu liifana Eendombwedi daJehova, ndele haEendombwedi daJesus.

Anthony: Osho otashi dulu yo okukala etomheno limwe.

Tim: Omolwashike hamu popi unene kombinga yaJehova?

Anthony: Shimwe vali, otwa itavela kutya osha fimana okulongifa edina laKalunga, Jehova, ngaashi Omona waye, Jesus a li a ninga. Tala osho Jesus a popya eshi a li ta ilikana kuXe. Otashi hangwa muJohannes 17:26. Mbela oto dulu okulesha ovelishe oyo?

Tim: Heeno. “Ndelenee Ame nde va shiivifa edina loye, ndele ohandi ke li shiivifa natango, opo ohole ei wa kala u hole nge nayo, i kale muvo naame ndi kale muvo.”

Anthony: Tangi unene. Didilika kutya Jesus okwa ti okwa shiivifa edina laKalunga. Mbela ou shii kutya omolwashike a ningila ngaho?

Tim: Hmm. Kandi na naanaa oushili.

Anthony: Eewa, ohatu dulu okutala vali komushangwa mukwao oo tau tu pe ouyelele mwaasho. Omushangwa oo Oilonga 2:21. Otau ti: “keshe tuu ou ta ifana edina lOmwene ota ka xupifwa.” Paife ondi wete oto ka dimina kutya ngeenge okwiifana edina laJehova oshi li oshiteelelwa shoku ka xupifwa, nopehe na omalimbililo, Jesus okwa li e shii oshiteelelwa osho.

Tim: Osho naanaa.

Anthony: Onghee hano, okuxupifwa kwovahongwa vaJesus oku li etomheno limwe kutya omolwashike sha fimana kuye opo va shiive nokulongifa edina laKalunga. Naalo olo etomheno limwe la fimana kutya omolwashike hatu popi kombinga yaJehova unene. Otwa itavela kutya osha fimana okushiivifa edina laKalunga nokukwafela ovanhu va ifane edina olo.

Tim: Nonande ovanhu kave shii edina laKalunga ile ihave li longifa odikilila, ove shii kutya otava popi kombinga yalyelye, ngeenge tava popi Kalunga.

Anthony: Otashi dulika shi kale shoshili. Nonande ongaho eshi Kalunga e tu lombwela edina laye, okwe shi ningifa shipu kufye opo tu dule okweehena popepi naye.

Tim: Osho osha hala okutya ngahelipi?

Anthony: Shi diladila monghedi ei: Inatu pumbwa okushiiva edina laMoses. Ndele ohatu dulu oku mu  shiiva e li omulumenhu oo a tukula Efuta Litilyana pokati ile omulumenhu oo a pewa Oipango Omulongo. Sha faafana, omolwashike tu na okushiiva edina laNoa? Ohatu dulu okumu shiiva e li omulumenhu oo a tunga ongulu yomomeva nokwa xupifa oukwaneumbo waye noinamwenyo. Nokuli, naJesus Kristus, otashi dulika ashike ngeno a shiivika e li omunhu oo a dja meulu nokwa fila omatimba etu. Hasho mbela?

Tim: Osho naanaa.

Anthony: Ashike Kalunga okwa shilipaleka kutya otwa shiiva omadina oohandimwe ovo. Okushiiva omadina avo okwa ningifa omahokololo avo a kale taa tisha filufilu kufye. Nonande inatu mona komudidi Moses, Noa ile Jesus, okushiiva ashike omadina avo okwa ningifa ovalumenhu ovo va kale volela kufye.

Tim: Inandi shi diladila nale monghedi oyo, ashike otashi ti sha lela!

Anthony: Naalo olo etomheno likwao vali kutya omolwashike Eendombwedi daJehova hadi longifa unene edina laKalunga. Otwa hala okukwafela ovanhu va pameke eitavelo lavo muJehova Kalunga nokukale omunhu wolela kuvo oo tava dulu okweehena popepi naye. Pefimbo opo tuu opo, ohatu divilike neenghono onghandangala oyo Jesus ta dana i na sha nokuxupifwa kwetu. Ohatu dulu okulesha omushangwa vali umwe oo tau yelifa nawa shi na sha naasho.

Tim: Eewa.

Anthony: Pehovelo otwa lesha Johannes 14:6. Dimbuluka kutya Jesus okwa ti: “Aame ondjila noshili nomwenyo.” Natu tale vali keevelishe dimwe odo da tetekela nokudidilika eendjovo daye odo tadi hangwa muJohannes 14:1. Oto dulu mbela okulesha osho Jesus a popya moshitukulwa shaxuuninwa shovelishe oyo?

Tim: Heeno. Otai ti: “Itaveleni Kalunga nye mu itavele nge yo.”

Anthony: Tangi unene. Mbela osho osha hala kutya ngeenge otwa itavela muJesus itatu dulu okukala twa itavela muJehova?

Tim: Ahowe. Jesus okwa ti aveshe otwe va pumbwa.

Anthony: Ou li mondjila. Ondi shi shii kutya oto ka dimina kutya inashi wana okupopya ashike kutya otu na eitavelo muKalunga nomuJesus. Onghalamwenyo yetu oi na okukala monghedi oyo tai ulike kutya otu na eitavelo shili.

Tim: Heeno, osho lela.

Anthony: Ndele ongahelipi omunhu ta dulu okuulika kutya okwa itavela shili muKalunga nomuJesus? Pamwe ohatu dulu okukundafana epulo olo moshikando tashi uya. *

Tim: Oshi li nawa.