OMAFIMBO opo a di ko, moshifokundaneki shedina The Chosun Ilbo, shokuKorea, omwa li mwa pita oshipalanyole shihokwifa. Osha li shi na epulo tali ti: “‘Shim Cheong omunamutima muwa, oo a li ehe shii sha kombinga yaJesus, mbela okwa ya koheli?’”

Oshipalanyole osha li tashi pendula ohokwe molwaashi Shim Cheong omukainhu omunahole oo e li membo lOvakorea lomahepu oo a li a yamba po omwenyo waye opo a yambidide xe oo a li omupofi. Oule womido, okwa kala ha pandulwa neenghono. Kakele kaasho, Shim Cheong, okwa ka talika ko moKorea e li okakadona oko ke li oshihopaenenwa shiwa shoudiinini.

Kovanhu vahapu, ediladilo olo kutya omunhu ota ka handukilwa momundilo woheli molwaashi ashike ina shashwa osho otashi monika shihe li pauyuki noshi nyemateka. Kakele kaasho, ehokololo ola li la ningwa nale manga etumwalaka li na sha naKristus inali udifwa momukunda wavo.

Oshitukulwa osha li sha kwatela mo omapulapulo nomuwiliki welongelokalunga. Okwa li a pulwa ngeenge oonakufya aveshe ovo va fya inava mona omhito yokulihonga kombinga yaJesus ova handukilwa momundilo woheli. Okwa ti: “Katu shi shii. Ohatu diladila ashike kutya Kalunga oku na okukala a ninga po elongekido li na sha novanhu va tya ngaho.”

Embo o-The New Catholic Encyclopedia ola ti: “Eshasho ola fimana opo omunhu a ka xupifwe. Ngaashi Kristus eshi popya, omunhu ngeenge ina dalululwa komeva nokOmhepo iyapuki, ita dulu okuya mOuhamba waKalunga. (Jn 3.5)” Omolwetomheno olo, vamwe ova itavela kutya ovo va fya inava shashwa ova ekelwa momundilo woheli ile tava mono oixuna monghedi yonhumba konima yefyo.

Kakele kaasho, vahapu okwa li ve shi tala ko kutya eitavelo la tya ngaho kali li pandunge. Ovanhu omamiliyona ova fya inava shiiva Ombibeli. Mbela navo otava ka xwikwa momundilo waalushe? Ombibeli otai ti ngahelipi shi na sha naasho?

Ombibeli oya ulika sha yela kutya Kalunga ita ka handukila ovanhu ovo va li ko nale vehe shii oiteelelwa yaye. MOilonga 17:30, Ombibeli otai ti: “Kalunga okwe lididimikila omafimbo enya [okuhashiiva].” Ombibeli oi na eteelelo lilipi li na sha noonakufya ovo va fya inava mona omhito yokulihonga kombinga yaKalunga?

Enyamukulo otali hangwa meendjovo odo Jesus a lombwela umwe womovakolokoshi oo a fya pamwe naye. Omulumenhu okwa lombwela Jesus a ti: ‘Dimbulukwe nge, ngeenge wa fiki mOuhamba woye.’ Jesus okwa li a nyamukula ngahelipi? ‘Oshili handi ku lombwele, onena tuu eli oto ka kala pamwe naame moParadisa.’ — Lukas 23:39-43.

Mbela Jesus okwa li a udanekela omulumenhu oo kutya ota ka ya meulu? Ahowe. Omulumenhu oo kali a “dalululwa” momeva nokomhepo, oyo ya li oshiteelelwa shokuya mOuhamba womeulu. (Johannes 3:3-6) Ponhele yaasho, okwa li e mu udanekela kutya ota ka kala moParadisa. Molwaashi omulumenhu oo okwa li Omujuda, okwa li e udite ko nawa Oparadisa kombada yedu, oshikunino shaEden, ngaashi sha popiwa membo lotete lOmbibeli. (Genesis 2:8) Eudaneko laJesus ola li le mu shilipaleka eteelelo lenyumuko eshi Oparadisa tai ka etululwa kombada yedu.

Ombibeli oya udaneka kutya “otaku ka kala enyumuko lovayuki nolovalunde.” (Oilonga 24:15) “Ovalunde” ovo tava tongwa, ovovo inava wanifa po omifikamhango daKalunga douyuki molwaashi ova fya inava shiiva ehalo laye. Jesus ota ka nyumuna omukolokoshi oo a li ta popi naye nosho yo ovanhu omamiliyona ile tashi dulika omabiliyona ovo va fya inava shiiva sha. Opo nee, otava ka hongwa oiteelelwa yaKalunga mOparadisa kombada yedu noku ka pewa omhito yokuulika kutya ove hole shili Kalunga mokudulika koipango yaye.

Eshi ovalunde tava ka nyumunwa, mbela otava ka pangulwa she likolelela koilonga yavo yomonakudiwa? Ahowe. Ombibeli mOvaroma 6:7 otai ti: “Osheshi ou a fya, oye okwa manguluka moulunde.” Ovalunde ovo ova mona ondjabi yavo youlunde eshi va fya. Onghee hano, otava ka pangulwa she likolelela kwaasho tava ka ninga konima yenyumuko ndele hakwaasho va longa manga inava shiiva sha eshi va li momwenyo. Ongahelipi tava ka mona ouwa?

Konima yenyumuko, ovalunde otava ka pewa omhito yokulihonga eemhango daKalunga, odo tadi ka hololwa eshi omutonywashangwa wopafaneko tau ka penunwa. Opo nee tava ka tokolwa “pailonga yavo,” sha hala okutya, kutya nee ova dulika komhango yaKalunga ile hasho. (Ehololo 20:12, 13) Osho itashi ka kala oshikando oshitivali kovalunde vahapu ovo, ndele omhito yavo yotete yokumona omwenyo waalushe kombada yedu mokulihonga nokudulika kehalo laKalunga.

Ehongo eli lopaMbibeli ola kwafela vahapu va kale ve na eitavelo muKalunga. Yeong Sug okwa li oumwe womuvo. Okwa li a putuka eli Omukatolika elela. Oilyo youkwaneumbo wavo oya li ovapristeli. Molwaashi okwa li a hala okuninga omulikaleli okwa li a ya konhele oko hava kala. Lwanima, okwa li a fiya po onhele oyo molwaashi okwa li a udifwa nai kwaasho a mona sha ningwa mo. Shimwe vali, kali ta dulu okutambula ko ehongo lomundilo woheli molwaashi okwa li e udite kutya okuhepeka ovanhu momundilo woheli kashi li pauyuki ile pahole.

Opo nee, Ondombwedi yaJehova imwe oya li ya ulikila Yeong Sug eendjovo mOmbibeli tadi ti: “Osheshi ovanamwenyo ve shi shii nokutya, ve nokufya. Ndelenee noonakufya inava shiiva nande sha, ndele vo ve he nondjabi vali.” (Omuudifi 9:5) Ondombwedi oya li yo ye mu kwafela a mone kutya ooxekulululwa itava pi momundilo woheli. Ponhele yaasho, ova fya, va teelela enyumuko.

Eshi Yeong Sug a shiiva kutya ovanhu vahapu inava uda oshili yOmbibeli, okwa li a tula moilonga eendjovo daJesus odo di li muMateus 24:14, odo ta di ti: “Ndele evangeli eli louhamba otali udifilwa ounyuni aushe li ningile oiwana aishe ondombwedi, opo nee taku uya exulilo.” Paife oha kufa ombinga mokuudifa onghundana iwa nosho yo okulombwela vamwe eteelelo likumwifi lopaMbibeli.

“Kalunga iha tale omunhu kombada,” Ombibeli otai ti, “ndele moshiwana keshe, keshe ou he mu tila ndee ta diinine ouyuki, ote mu wapalele.” (Oilonga 10:34, 35) Oo oo ouyuki wa wanenena oo atusheni twa teelela kuKalunga, oo e “hole ouyuki.” — Epsalme 33:5.