Onda dalelwa nonda putukila mokamukunda kaRoma, oshitukulwa osho sha li shi na ovakwanaluhepo. Onghalamwenyo oya li idjuu. Meme nghi mu shii nokanda li ndi na ekwatafano liwa natate. Onda kala handi lihongo nghee ndi na okuxupa meenghalo didjuu.

Eshi nda ka wanifa eedula 10, onda li nda hovela okukala handi vake. Eshi nda wanifa eedula 12, onda li nda dja mo meumbo oshikando shotete, nda ninga oshondolo. Tate okwa kala ha ile nge keembelewa dopolifi lwoikando nokutwala nge keumbo. Onda kala handi tanguna novanhu lwoikando, nda li ndi hole elongifo leenghono nonda handukila keshe umwe. Eshi nda wanifa eedula 14, onda dja mo meumbo nda ililila. Onda li nda hovela okunwa oingangamifi nokukala momapandavanda. Molwaashi kanda li ndi na apa handi nangala, onda li handi teya eehauto nokunangala mo fiyo okeengulasha. Okudja opo ohandi kongo opo pe na omeva opo ndi likoshe.

Onda li nda pyokoka mokuvaka, kutya nee okuvakula ko oundjato ile okuteya omaumbo makula namanini keenguloshi. Onda li nda nyateka edina lange nokonima yefimbo lixupi onda ya mongudu yovanamapove ovakolokoshi, nonde lihanga handi teya eembaanga. Molwaashi onda li ndi na onyati, onda li nda ninga diva oshilyo sha fimana mongudu. Onda li handi ende alushe nondjebo yange; nonda li nokuli handi nangala nayo i li koshi yoshiwilo. Elongifo leenghono, oingangamifi, okuvaka, omatukano noluhaelo oya li ya ninga onghedi yange yokukalamwenyo. Opolifi oya li hai kala nge luhapu mokashoko. Onda kwatwa po lwoikando, noule womido onda kala handi ningi nda i modolongo, nda di mo.

Pomhito imwe eshi nda mangululwa modolongo, onda li nda tokola ndi ka talele po meme mumwaina wameme. Kanda li ndi shii kutya ye nounona vaye vavali ova ninga Eendombwedi daJehova. Ova li va shiva nge kokwoongala kwEendombwedi. Onda li nda tokola okuya omolwokatalekonawa. Eshi twa fika pOlupale lOuhamba, onda li nde va lombwela kutya ohandi kala omutumba popepi nomuvelo opo ndi tale ovo tave uya mo naavo tava di mo. Ashike onda li nda homata.

 Okwoongala oko okwa li kwa lundulula onghalamwenyo yange. Ohandi dimbuluka eshi nda li handi diladila kutya pamwe ondi li mounyuni umwe u lili. Eendombwedi oda li da popifa nge nohamu, noukaume notadi limemesha. Natango onda fa ashike ndi wete momadiladilo ange nghee nda li ndi shi liwetele momesho Eendombwedi kutya odinalukeno nodinashili. Onghalo oyo oya li ya yooloka ko filufilu kwaai nda li nda ikilila.

Onda li nda hovela okukonakona Ombibeli nEendombwedi. Apa ngoo pe fike okulihonga Ombibeli, opo ngoo pa li pe fike okumona kutya onda pumbwa okulundulula filufilu onghedi yange yokukalamwenyo. Onda li nda shikula omayele oo e li mOmayeletumbulo 13:20: “Kala nokweenda novanongo, opo nee naave yo u ninge omunongo. Ndelenee ou ha endafana novashima, ota ka laipala.” Onda li nda mona kutya onda pumbwa okukala kokule nongudu yovanamapove. Kasha li shipu okuninga ngaho, ashike kekwafo laJehova, onda li nda pondola.

Onda li yo nda kendabala ndi kale nda koshoka palutu. Osha li sha pula nge eenghendabala dihapu okweefa po okushila omakaya nokulongifa oingangamifi. Onda li nda kulula ko eexwiki dange odo da li dile, nda dula ko outenda vomomatwi nonda efa po okutukana. Osho osha li oshikando shotete monghalamwenyo okupangela eenghatu dange.

Kanda li handi hafele okulesha nokukonakona, nomolwaasho, osha li eshongo okuyandja elitulemo eshi handi konakona Ombibeli. Ndele eshi nda ninga eenghendabala, onda endela ko kanini nakanini okukala ndi hole Jehova, noshinima shonhumba meni lange osha li sha hovela okulunduluka. Eliudo lange ola li la hovela okuvela nge ombedi. Oikando ihapu onda li handi kwatwa komaliudo mai e na sha naame mwene, nda limbililwa ngeenge Jehova oku na ngoo fiku na dimine nge po omolwowii aushe oo nda longa. Peemhito da tya ngaho, onda li handi hekelekwa neenghono kokulesha kombinga yanghee Jehova a li a dimina po ohamba David eshi ya li ya nyona omanyono a kwata moiti. — 2 Samuel 11:1–12:13.

Eshongo limwe vali ola li li na sha nokulombwela vamwe kombinga yeitavelo lange moukalele weumbo neumbo. (Mateus 28:19, 20) Onda li handi kala nda tila kutya pamwe ohandi ka shakena naumwe oo nda li nda udifa nai ile nda longela omunyonena washa monakudiwa. Ndele mokweendela ko kwefimbo, onda li nda dula okufinda oumbada. Onda li nda hovela okuhafela okukwafela vamwe ve lihonge kombinga yaTate yetu womeulu mukumwifi, oo e yadi ekufilo.

Okulihonga kombinga yaJehova okwa xupifa omwenyo wange. Omaume ange onale mahapu okwa fya ile e li modolongo, ashike ame ondi na onghalamwenyo tai mbilipaleke shili neteelelo li na sha nonakwiiwa. Onde lihonga okukala omulininipiki nomuduliki nokupangela omahandu ange mai. Oshidjemo, ohandi hafele ekwatafano liwa novanhu vakwetu. Onda hafa yo eshi nda hombola omukulukadi muwa, Carmen. Fye naye ohatu hafele neenghono okukwafela ovanhu ve lihonge Ombibeli.

Paife ohandi longo oilonga i li pauyuki, omafimbo amwe oya kwatela mo eembaanga, ashike ponhele yoku di teya, ohandi di wapaleke.