Eshi nda dalwa, ovadali vange ova li ve na ofaalama inini komukunda moGalicia, kouningininolukadi laSpain. Otwa dalwa vahetatu, ame omutine. Oukwaneumbo wetu owa li wa hafa. Pefimbo opo moSpain, luhapu kamwe komounona moukwaneumbo oka li haka i koseminari, ile komuhandjo wongeleka. Vatatu moukwaneumbo wetu otwa li twa tokola okuninga ngaho.

Eshi nda li ndi na eedula 13, onda li nda waimina omukulu wange wokakadona komuhandjo wongeleka koMadrid. Konhele oko okwa li ku na oudja. Ovanhu kava li ve na omhepo youkaume, ndele okwa li ashike eemhango, okwiilikana nokulandula eemhango sha kwata moiti. Ongula inene, otwa li hatu ongala mongeleka tu ka dilonge, naluhapu kanda li handi dilonga kusha. Lwanima, otwa li hatu imbi omaimbilo ongeleka noku ka lya oshililo, mOshilatin. Kanda li ndi udite ko oinima oyo, nonda li ndi wete Kalunga a fa e li kokule naame. Onda li ndi udite owike neenghono. Nokuli nongeenge nda li nda shakena nomukulu wange, otwa li ashike hatu ti: “Maria omuyapuki na fimanekwe.” Oosestela ova li ashike have tu pe etatavili tu popye konima yokulya. Osho osha li sha yooloka ko koukwaneumbo wetu oo wa li hau kala wa hafa. Onda li ndi udite nde likalela nokwa li handi lili luhapu.

Nonande kanda li ndi udite nda ehena popepi naKalunga, onda li nda ninga eano nokuninga sestela eshi nda li ndi na omido 17. Ashike nande ongaho, onda li ashike nda ninga osho nda li nda teelelika ndi ninge, ndele onda li yo ndi na omalimbililo ngeenge Kalunga okwa hoolola nge ngoo ndi ninge ngaho. Oosestela ova li hava ti kutya ngeenge omunhu oku na omalimbililo a tya ngaho ota ka ya moheli. Ashike natango onda li ashike ndi na omalimbililo. Onda li ndi shii kutya Jesus Kristus ka li e likalela, ndele ponhele yaasho, okwa li e lipyakidila nokuhonga nokukwafela ovanhu. (Mateus 4:23-25) Eshi nda wanifa omido 20, onda li nda mona kutya kandi na etomheno la yela lokukala osestela. Shikumwifi, sestela oo womukulunhu okwa li a lombwela nge kutya ngeenge ondi na omalimbililo okukala osestela, nandi ye diva ngaashi tashi dulika. Onda li ndi wete kutya okwa li a tila ndi nwefe mo vamwe. Onghee onda li nda fiya po omuhandjo wongeleka.

Eshi nda shuna keumbo, ovadali vange ova li ve udite ko onghalo yange. Ashike eshi nda shuna keumbo kanda li ndi na oilonga, onghee onda tembukila kOndowishi oko kwa li ku na ondenge yange imwe. Okwa li a waimina ongudu yOukomonisi yovanhu ovo va dja koSpain. Onda li ndi udite ouumbo eshi nda li mokati kovanhu ovo tava kondjele oufemba wovanailonga nosho yo oufikepamwe wovakainhu. Onghee onda li nda waimina ongudu oyo yOukomonisi, nolwanima onda li nda hombolwa koshilyo shimwe shomongudu oyo. Onda li ndi wete handi ningi oshinima shi na oshilonga, mokukala handi yandje oishangomwa yOukomonisi nokukufa ombinga moikonga yomahololomadiladilo.

Ashike nande ongaho, onda li nda teka omukumo. Onda li ndi wete ongudu yOukomonisi tai dopa okuwanifa opo osho hai udaneke. Omalimbililo oo okwa li a wilila nge po mo 1971 eshi ovanyasha vamwe vomongudu yetu va xwika po eembelewa dokukalela po oshilongo daSpain moFrankfurt. Ova li va ninga ngaho opo va kondjife epangelo lokuhenouyuki moSpain. Ashike onda li ndi shii kutya kai fi onghedi iwa okuulika ehandu.

Eshi nda mona okaana kange koshiveli, onda lombwela omushamane wange kutya itandi i vali koyoongalele yOukomonisi. Onda li ndi udite ouwike molwaashi kape na nande umwe womookaume kange vonale a li e uya okutalela nge po nokahanana kange. Onda li nde lipula kutya elalakano longhalamwenyo olashike naanaa. Mbela otashi kwafa sha ngoo okuninga eenghendabala dokuxwepopaleka oshiwana?

Mo 1976, Eendombwedi mbali dOvaspania oda li de uya peumbo letu noku tu pa oshishangomwa shimwe shopaMbiibeli, nonda li nde shi tambula. Petalelepo lado litivali, onda li nda hovela oku di pula omapulo kombinga yokumona oixuna, okatongo nosho yo okuhenouyuki. Onda li nda kumwa eshi da li tadi longifa Ombiibeli mokunyamukula omapulo ange aeshe, nonda li nda tambula ko ekonakonombiibeli.

Pehovelo, onda li ashike handi hafele okumona eshiivo. Ashike oinima oya ka lunduluka eshi ame nomushamane wange twa hovela okukala hatu i kokwoongala kOlupale lOuhamba lEendombwedi daJehova. Pefimbo opo, otwa hangwa tu na ounona vavali. Eendombwedi oda li hadi tu pitula noku tu kwafela nounona eshi tu li pokwoongala. Onda li nda hovela okukala ndi hole Eendombwedi.

Ndele nande ongaho, onda li ndi na omalimbililo e nasha lelongelokalunga. Onda li nda tokola oku ka taalela po ovapambele vange koSpain. Tate mumwaina watate, oo e li omufita, okwa li ta kendabala okushololifa nge opo ndi efe po okukonakona Ombiibeli. Ashike Eendombwedi domoshitukulwa oda li da nyamukula omapulo ange tadi longifa Ombiibeli, ngaashi ashike Eendombwedi dikwao koGermany. Onghee onda li nda hovela vali okukonakona Ombiibeli eshi nda shuna koGermany. Nonande omushamane wange okwa li a efa po okukonakona Ombiibeli, onda li nda twikila vali nekonakono lange lOmbiibeli. Mo 1978, onda li nda ninginifwa ndi li umwe womEendombwedi daJehova.

Oshili yOmbiibeli oya pa nge elalakano la yela newiliko monghalamwenyo yange. Pashihopaenenwa, 1 Petrus 3:1-4 ota ladipike ovakainhu va ‘dulike’ kovashamane ‘nefimaneko neenghono’ nokukala “nomwenyo muwa,” ‘oukwatya oo Kalunga a tala ko wa fimanenena.’ Omafinamhango oo okwa kwafela nge ndi kala omukulukadi nomudalakadi e na omaukwatya mawa.

Paife opa pita omido 35 ndi li Ondombwedi yaJehova. Onda hafa okulongela Jehova ndi li oshitukulwa shoumwainafana womounyuni aushe wovamwatate novamwameme ovo tava longele Kalunga, nonda hafa yo eshi ounona vange vane navo tava ningi sha faafana.