Ohatu nyanyangida nokutandavelifa Eembibeli noishangomwa omamiliyona oshali omudo keshe. Ohatu tungu nokuwapeka Omalupale Ouhamba nosho yo oitaimbelewa. Ohatu file oshisho Ovabetel novatumwa omayovi, nohatu yandje omakwafo opaulumomhumbwe pomafimbo oiponga. Nomolwaasho, otashi dulika nee u lipule kutya ohatu hange peni oimaliwa opo tu dule okuninga oinima aishe oyo.

Ihatu futifa ovanhu omudo, oshitimulongo noihatu umbu ongalo. Nonande oilonga yetu yokuudifa ohai pula oshimaliwa shihapu, ihatu ehela oimaliwa. Omido efele lwaapo da pita, oshifo oshitivali shOshungonangelo yOshiingilisha osha li sha popya sha ti kutya fye otwa itavela kutya Jehova oye omukwafi wetu, onghee “itatu ka ehela nokupula ovanhu omakwafo,” nomolwaasho, ehangano letu ihali shi ningi nandenande. — Mateus 10:8.

Oilonga yetu ohai yambididwa nomayambidido ehalo liwa. Ovanhu vahapu ohava pandula oilonga yetu yokuhonga ovanhu Ombibeli nohave i yambidida pashimaliwa. Tu li Eendombwedi, ohatu longifa nehalo liwa efimbo letu, eenghono detu, oimaliwa noiniwe yetu opo tu wanife po ehalo laKalunga kombada yedu alishe. (1 Omafimbo 29:9) MOlupale lOuhamba ohamu kala oukefa omo hamu tulwa omayambidido kwaavo va hala okuyambidida. Peemhito dihapu, ovo hava yandje omayambidido ove na oyuuyemo inini, ngaashi ashike omufiyekadi ohepele oo a li a tula moshikefa shomayambidido shomotembeli ouhaulapa vavali aveke, nokwa li a popilwa mouwa kuJesus. (Lukas 21:1-4) Onghee hano, keshe umwe ota dulu okukala ha “tuvikile sha” opo a yandje “ngaashi omutima waye tau mu lombwele.” — 1 Ovakorinto 16:2; 2 Ovakorinto 9:7.

Otwa tomhwa kutya Jehova ota ka twikila okulinyengifa omitima daaveshe ovo va hala oku ‘mu fimaneka neliko lavo’ mokuyambidida oilonga yOuhamba opo ehalo laye li wanifwe po.— Omayeletumbulo 3:9.

• Eyooloko lilipi li li pokati kEendombwedi daJehova nomalongelokalunga makwao?

• Omayambidido oo haa yandjwa nehalo liwa ohaa longifwa ngahelipi?