1, 2. (a) Josef okwa li a ningilwa okuhenouyuki kulipi? (b) Jehova okwa li a yukifa ngahelipi oinima?

 OMULUMENHU umwe omunyasha wondjelo iwa okwa li a ungaungwa naye monghedi ihe li pauyuki nandenande. Omulumenhu oo ka li a kaula nande oumwe onyanga, ndele okwa li a tulwa modolongo molwaashi ta lundilwa kutya okwa li ta hetekele okukwata umwe onghonga. Ashike osho hasho sha li oshikando shotete ta ningilwa okuhenouyuki. Omulumenhu oo okwa li Josef. Eshi Josef a li e na omido 17, okwa li a kengelelwa kovamwainamati, ovo hanga ve mu dipaa. Ova li ve mu landifa po kovanailongo a ka ninge omupika. Eshi a li moupika, okwa li a henuka okukokelwa moluhaelo komukulukadi womwene waye. Eshi omukainhu oo a li ta heke Josef ina pondola, okwa li e mu lundila, naasho osho nee sha li sha tulifa Josef modolongo. Shinyikifa oluhodi, kapa li oo a popila Josef.

² Ndele Jehova Kalunga oo e “hole ouyuki netokolo la yuka” okwa li e wete oshinima sha tya ngaho. (Epsalme 33:5) Onghee okwa li a katuka onghatu opo a yukife oinima, nohauxuuninwa Josef okwa li a mangululwa modolongo. Kakele kaasho, Josef oo a li a tulwa “modolongo” lwanima okwa li a pewa ondodo yopombada noya fimana. (Genesis 40:15; 41:41-43; Epsalme 105:17, 18) Xuuninwa, ovanhu ova li va mona kutya Josef ke na ondjo, nokwa li a longifa ondodo yaye ya tumbala mokuxumifa komesho elalakano laKalunga. — Genesis 45:5-8.

3. Omolwashike itashi kumwifa eshi atusheni hatu kala twa hala okuungaungwa nafye monghedi i li pauyuki?

³ Ehokololo la tya ngaho otali kumu omitima detu, hasho mbela? Olyelye womufye ina mona ile ina ningilwa okuhenouyuki? Doshili, atusheni ohatu kala twa halelela okuungaungwa  nafye monghedi i li pauyuki. Osho itashi kumwifa, molwaashi Jehova okwe tu shita tu na omaukwatya a fa aye, nouyuki oumwe womomaukwatya aye a tongomana. (Genesis 1:27) Opo tu shiive nawa Jehova, otwa pumbwa okuuda ko ouyuki waye. Ngeenge otwe u udu ko, ohatu ka shiiva eendjila daye dikumwifi shi dulife nale notashi ke tu linyengifa tu ehene popepi elela naye.

4. Ouyuki oshike pataleko lopanhu?

⁴ Pataleko lopanhu, luhapu ouyuki ohaku tiwa kutya oo okutula moilonga eemhango nokuhenonhondo. Embo ledina Right and Reason—Ethics in Theory and Practice ola ti kutya “ouyuki owa kwatela mo omhango, oiteelelwa, oufemba, oinakuwanifwa nohau ufa kutya ovanhu ove na okumona ondjabi oyo ve lilongela nopehe na onhondo.” Ndele ouyuki waJehova owa kwatela mo shihapu shihe fi ashike okutula moilonga ngahenya omaufomhango molwaashi u na oku shi ninga.

5, 6. (a) Eityo loitya yopehovelo oyo ya tolokwa “ouyuki” oya hala okutya shike? (b) Osha hala okutya shike eshi taku tiwa kutya Kalunga omuyuki?

⁵ Ohatu ka uda ko ashike moule nawa ouyuki waJehova ngeenge otwa konakona oitya yomelaka lopehovelo oyo ya longifwa mOmbiibeli. MOmishangwa dOshiheberi omwa longifwa oitya itatu. Oshitya shimwe osho sha tolokwa ‘ouyuki’ otashi dulu yo okutolokwa “okulonga osho sha yuka.” (Genesis 18:25) Oitya ikwao ivali nayo oya tolokwa ouyuki. MOmishangwa dopaKriste dOshigreka, oshitya osho sha tolokwa “ouyuki” otashi ti “oukwatya wokukala wa yuka.” Onghee hano, oitya aishe oyo yomelaka lopehovelo oi na eityo la faafana. — Amos 5:24.

⁶ Ndelenee, eshi Ombiibeli ya ti kutya Kalunga omuyuki, otai tu lombwele kutya oha longo osho sha yuka, he shi ningi alushe nokuhe na onhondo. (Ovaroma 2:11) Doshili, Jehova ke na efiku a longe osho inashi yuka. Omulumenhu omudiinini Elihu okwa ti: “Kalunga oku li kokule nouhenakalunga,  nOmunamapangelo aeshe [oku] li kokule nowii!” (Job 34:10) Doshili, Jehova ita dulu okulonga owii. Omolwashike mbela? Omolwomatomheno avali a fimana.

7, 8. (a) Omolwaashi Jehova ita dulu okulonga nandenande osho inashi yuka? (b) Oshike hashi linyengifa Jehova a ungaunge novanhu pauyuki?

⁷ Etomheno lotete, Jehova Omuyapuki. Ngaashi twe shi mona metukulwa 3, Jehova okwa koshoka filufilu nomuyuki. Onghee hano, ita dulu okulonga nandenande osho inashi yuka. Natu ka konakoneni kutya osho osha hala okutya shike. Ouyapuki waTate yetu womeulu otau tu pe etomheno la kola lokukala twe lineekela kutya ke na efiku a ungaunge nai novana vaye. Jesus okwa li e na elineekelo la tya ngaho. Moufiku waxuuninwa wonghalamwenyo yaye kombada yedu, okwa ilikana a ti: “Tate omuyapuki, va diininina [ovahongwa] medina loye.” (Johannes 17:11) Edinafimaneko “Tate omuyapuki,” oo wa longifwa mOmishangwa, otau dulu okuyukifwa ashike kuJehova aeke. Osho osha yeleka, molwaashi kape na xe yopanhu ta dulu okuyelekwa naJehova mouyapuki. Jesus okwa li e na elineekelo filufilu kutya ovahongwa vaye otava ka kala ve li meameno ngeenge ova kala mefiloshisho laXe, oo a koshoka filufilu noke na oulunde nande owasha. — Mateus 23:9.

⁸ Etomheno etivali, Jehova oku na ohole yokuheliholamwene. Ohole ya tya ngaho ohai mu linyengifa a ungaunge novanhu pauyuki. Ndele okuhenouyuki oku li pamaludi mahapu, mwa kwatelwa oukwamuhoko, okatongotongo nosho yo onhondo oyo hai xwaxwamekwa kolwisho nokokuliholamwene, oinima oyo tai ulike okuhenohole. Shi na sha nohole yaKalunga, Ombiibeli oye tu shilipaleka ya ti: “Omwene Oye omuyuki noku hole ouyuki.” (Epsalme 11:7) Jehova okwe lipopya ye mwene: “Ame Omwene ndi hole ouyuki.” (Jesaja 61:8) Mbela itashi hekeleke okushiiva kutya Kalunga ketu oha hafele okulonga osho sha yuka? — Jeremia 9:24.

9-11. (a) Ekwatafano lilipi li li pokati kouyuki waJehova nonghenda yaye? (b) Ouyuki nonghenda yaJehova oi liwetikile ngahelipi monghedi omo ha ungaunga novanhu ovalunde?

⁹ Ngaashi omaukwatya aJehova makwao a tongomana, ouyuki waye nao owa wanenena. Moses okwa tanga Jehova a ti: “Ye emanya; oilonga yaye oya wana ya pwa. Osheshi eendjila daye adishe [oda yuka, OB-1986]. Ye Kalunga koudiinini, ndee e he nowidi. Ye omuyuki nomunashili.” (Deuteronomion 32:3, 4) Ouyuki waJehova owa wanenena, sha hala okutya, ke na onyanya, ye iha efele ovanhu va kale tava longo owii keshe oo va hala okulonga.

¹⁰ Ouyuki waJehova owa pambafana filufilu nonghenda yaye. Epsalme 116:5 ola ti: “Omwene Oye omunanghenda nomuyuki, ndele Kalunga ketu Ye omunalukeno.” Heeno, Jehova omuyuki nomunanghenda. Omaukwatya oo avali itaa kondjifafana nandenande. Jehova iha file vamwe onghenda opo ngeno a haule ouyuki waye, sha fa ngeno kutya ouyuki waye owa kwata moiti unene. Ponhele yaasho, omaukwatya oo avali luhapu ohe a ulike oshita, nokuli nomoshiningwanima shimwe. Natu ka taleni koshihopaenenwa.

¹¹ Ovanhu aveshe ova fyuulula oulunde nova wana ngeno okupewa ondjabi youlunde, efyo. (Ovaroma 5:12) Ashike Jehova ina hokwa efyo lovalunde. Jehova ‘oKalunga oo ha dimi po omatimba, e nonghenda nolune.’ (Nehemia 9:17) Ndele molwaashi ye omuyapuki, ite ke lipwililikila okuhenouyuki. Mbela oha file onghenda ngahelipi ovanhu ovo va fyuulula oulunde? Enyamukulo otali hangwa muimwe yomeeshili di na ondilo odo tadi hangwa mEendjovo daKalunga oyo kutya: Jehova okwa ninga po elongekido lekulilo opo a xupife ovanhu. Metukulwa eti-14, ohatu ke lihonga shihapu shi na sha nelongekido olo lopahole. Elongekido olo otali ulike kutya ouyuki waJehova alushe owa tongomana nonghenda yaye oinenenene. Pakanghameno lekuliloyambo, Jehova ota dulu okufila onghenda pahole ovanhu ovo ve livela ombedi omolwomatimba  avo notava diinine omifikamhango daye douyuki da wanenena. — Ovaroma 3:21-26.

12, 13. (a) Omolwashike ouyuki waJehova tau tu ehenifa popepi naye? (b) David okwa li a fika pexulifodiladilo lilipi shi na sha nouyuki waJehova, naasho otashi tu hekeleke ngahelipi?

¹² Ouyuki waJehova kau fi oukwatya oo tau tu ningifa tu kale twa tila okweehena popepi naye. Ndele ponhele yaasho, otau tu ehenifa popepi naye. Ombiibeli oya popya nawanawa kombinga youyuki waJehova nokuulika kutya ohau endele pamwe nolukeno. Natu ka konakoneni eenghedi dimwe tadi kumu omutima di na sha nanghee Jehova ha ulike ouyuki waye.

¹³ Ouyuki waJehova wa wanenena ohau mu linyengifa a ulike kutya omudiinini kovapiya vaye. Omupsalme David okwa li a kwafelwa koshimoniwa shaye mwene a mone kutya Jehova omudiinini shili kovapiya vaye. Okupitila moshimoniwa shaye nosho yo mokukonakona eendjila daKalunga, David okwa li a fika pexulifodiladilo lilipi? Okwa ti: “Omwene oku hole ouyuki, novadiinini vaye ite va efa nande. [Ote va amene fiyo alushe, OB-1986].” (Epsalme 37:28) Eendjovo odo itadi hekeleke tuu! Kalunga ketu ke na efiku a efe ovadiinini vaye. Onghee hano, natu kaleni tu shii kutya oku li popepi nafye nohe tu file oshisho pahole. Ouyuki waye otau tu shilipaleke shi na sha naasho. — Omayeletumbulo 2:7, 8.

14. Okunakonasha kwaJehova novakwanaluhepo oku liwetikile ngahelipi mOmhango oyo a li a pa Ovaisrael?

¹⁴ Omolwouyuki waye, Kalunga oha kala e na ko nasha neemhumbwe daavo tava mono oixuna. Okunakonasha kwaJehova novakwanaluhepo oku liwetikile mOmhango oyo a li a pa Ovaisrael. Pashihopaenenwa, mOmhango omwa li mwa popiwa omalongekido e likalekelwa e na sha nokufila oshisho eefiye novafiyekadi. (Deuteronomion 24:17-21) Molwaashi Jehova okwa li e shii kutya eenghalo oda li tadi ka kala didjuu komaukwaneumbo a tya ngaho, okwa li a ninga Xe yavo Omupopili nOmwaameni, oo ta “yukifa eendjovo deefiye nodovafiyekadi.” (Deuteronomion 10:18; Epsalme 68:6) Jehova  okwa li a londwela Ovaisrael kutya ngeenge ova ungaunga nai novakainhu nosho yo nounona ovo itava dulu okulikwafa vo vene, ota ka uda omakemo avo. Okwa ti: ‘Ehandu lange otali ka xwama.’ (Exodus 22:22-24) Nonande ehandu kali fi umwe womomaukwatya aJehova a tongomana, oha handuka ngeenge ovanhu otava longo owina okuhenouyuki, unene tuu ngeenge ovo va ninga oihakanwa yokuhenouyuki kwa tya ngaho itava dulu okulikwafa vo vene. — Epsalme 103:6.

15, 16. Oumbangi udidilikwedi ulipi tau ulike kutya Jehova ke na onhondo?

¹⁵ Jehova okwe tu shilipaleka yo kutya ye “iha tale oshipala shomunhu ndee ita tambula ombubo.” (Deuteronomion 10:17) Iha nwefwa mo koinima yopamaliko ile keholokepo lokombada, ngaashi ovanhu vahapu ovo ve na eenghono ile ovo va lengwa kovanhu. Ke na onhondo nandenande. Natu ka taleni koumbangi udidilikwedi oo tau ulike kutya Jehova ke na onhondo. Omhito oyo Jehova a yandja opo vamwe va ninge ovalongeli vaye vashili nova kale neteelelo lomwenyo waalushe ine i yandja ashike kovanhu vonhumba vanini. Ponhele yaasho, “moshiwana keshe, keshe ou he mu tila ndee ta diinine ouyuki, ote mu wapalele.” (Oilonga 10:34, 35) Eteelelo olo likumwifi ola yeulukila ovanhu aveshe kashi na nee mbudi kutya ove na ondodo ya tya ngahelipi moulikumwe wovanhu, oluvala lavo ile kutya ovomoshilongo shilipi. Mbela oo kau fi ouyuki washili wa denga mbada?

¹⁶ Ope na natango onghedi imwe omo Jehova ha ulike ouyuki waye wa wanenena, oyo twa pumbwa okuyandja elitulemo kuyo nokukala twe i lenga: onghedi omo ha ungaunga novanhu ovo va nyona omifikamhango daye douyuki.

17. Yelifa kutya omolwashike okuhenouyuki oko ku li mounyuni itaku ulike kutya Jehova ke fi omuyuki.

¹⁷ Ovanhu vamwe otashi dulika ve lipule kutya: ‘Ngeenge Jehova ihe lipwililikile okuhenouyuki, omolwashike a efa ovanhu va kale tava mono oixuna shihe li pauyuki nosho  yo ominyonena odo tadi longwa mounyuni aushe kunena?’ Okuhenouyuki kwa tya ngaho itaku ulike kutya Jehova ke fi omuyuki. Okuhenouyuki kuhapu oko ku li mounyuni okwa etwa koulunde oo ovanhu va fyuulula kuAdam. Mounyuni omo ovanhu inava wanenena va hoolola eendjila davo doulunde omu yadi okuhenouyuki, ndele itaku kalelele. — Deuteronomion 32:5.

18, 19. Oshike tashi ulike kutya Jehova ite ke lididimikila fiyo alushe ovo tava nyonene owina eemhango daye dayuka?

¹⁸ Nonande Jehova oha file onghenda ovanhu ovo tava ehene popepi naye nomutima aushe, ita ka efa onghalo oyo tai shekifa edina laye liyapuki i kale po fiyo alushe. (Epsalme 74:10, 22, 23) Kalunga omuyuki iha shekwa, ita ka amena ovo tava nyonene owina koilanduliko yeenghatu davo. Jehova ‘oKalunga omunanghenda, omunanheni, nomunene mouwanghenda nomoudiinini, ita efa okuhandukila.’ (Exodus 34:6, 7) Metwokumwe neendjovo odo, peemhito dimwe Jehova okwa li a mona sha yuka okuhanauna po ovanhu ovo va li va nyonena owina eemhango daye dayuka.

¹⁹ Pashihopaenenwa, tala kunghee Kalunga a li a ungaunga nOvaisrael vopefimbo lonale. Ovaisrael ova li va dopa lwoikando okukanyatela oudiinini wavo, nokuli naashi va li mEdu lEudaneko. Nonande eendjila davo oda li da “lilifa” Jehova, ka li e va ekelashi meendelelo. (Epsalme 78:38-41) Ponhele yaasho, omolwonghenda yaye, okwa li he va pe eemhito opo va lundulule eendjila davo. Okwa ti: “Ndi he nohokwe nefyo lomuhenakalunga, ndelenee omuhenakalunga e lialuluke mondjila yaye opo a kale nomwenyo. Lialulukeni! Lialulukeni keendjila deni dii! Molwashike wa hala okufya, oove, eumbo laIsrael.” (Hesekiel 33:11) Molwaashi Jehova okwa tala ko omwenyo u na ondilo, okwa kala ta tumine Ovaisrael lwoikando ovaprofeti, ta ningile kutya pamwe tave lialuluka keendjila davo dii. Ndele luhapu ovanamitima dikukutu ovo kava li va pwilikina nokulivela ombedi. Xuuninwa, omolwedina laye liyapuki nomolweityo lalo, Jehova okwa li e va efela momake ovatondi vavo. — Nehemia 9:26-30.

20. (a) Onghedi omo Jehova a li a ungaunga nOvaisrael otai tu hongo shike kombinga yaye? (b) Omolwashike sha yeleka okuyelekanifa onghoshi nokukala po kwaKalunga nosho yo olukalwapangelo laye?

 ²⁰ Onghedi omo Jehova a li a ungaunga nOvaisrael otai tu hongo shihapu kombinga yaye. Otwe lihonga kutya Jehova oku wete okuhenouyuki akushe nohaku mu kumu neenghono komutima. (Omayeletumbulo 15:3) Otashi hekeleke yo okushiiva kutya oha file ovanhu onghenda, ngeenge ope na etomheno loku shi ninga. Kakele kaasho, otwe lihonga kutya ouyuki waye ihau mu ningifa nandenande a yukife oinima meendelelo. Molwaashi Jehova omulididimiki, ovanhu vamwe ova fika pexulifodiladilo la puka kutya ke na efiku a ka handukile ovakolokoshi. Ndele osho kashi fi shoshili, molwaashi onghedi omo Kalunga a li a ungaunga nOvaisrael otai tu hongo kutya elididimiko laye oli na ongaba. Jehova oha katuka pauyuki te shi ningi nouladi. Mepingafano novanhu ovo luhapu hava dopa okuulika ouyuki, Jehova oku na ouladi alushe wokupopila osho sha yuka. Onghee hano, osha yeleka eshi shimwe shomoishitwa oyo ya dingilila olukalwapangelo laKalunga shi na oshipala shonghoshi oyo tai faneke oukwatya wokuwanifa po nouladi ouyuki. a (Hesekiel 1:10;  Ehololo 4:7) Ohatu dulu okukala tu na oushili kutya ota ka wanifa po eudaneko laye lokuxulifa po okuhenouyuki kombada yedu. Doshili, onghedi yaye yokutokola otai dulu okungongwa ngaashi tashi landula: Oha ulike oudiinini opo sha pumbiwa nonghenda opo tashi shiiva. — 2 Petrus 3:9.

21. Eshi hatu dilonga shi na sha nanghee Jehova ha ulike ouyuki, otu na okudiladila kutya okwa tya ngahelipi, nomolwashike?

²¹ Eshi hatu dilonga shi na sha nanghee Jehova ha ulike ouyuki waye, katu na okudiladila kutya oku li omutokoli omukwanyanya oo a hala ashike okuhandukila ovakolokoshi. Ponhele yaasho, otu na oku mu diladila e li Xe omunahole oo ha ungaunga alushe novana vaye monghedi iwa elela, ndele ihe va efele. Natango, Jehova oku na ondjele molwaashi nonande oku hole ouyuki, oha kenukile pahole ovana vaye vokombada yedu ovo va pumbwa ekwafo laye nosho yo ediminepo. — Epsalme 103:10, 13.

22. Jehova omolwouyuki waye okwe shi ninga tashi shiiva tu kale tu na eteelelo lashike, nomolwashike ha ungaunga nafye monghedi ya tya ngaho?

²² Inatu hafa tuu eshi ouyuki waKalunga wa kwatela mo shihapu shihe fi ashike okutokola ovakolokoshi! Jehova omolwouyuki waye okwe shi ninga tashi shiiva opo tu kale tu na eteelelo lihafifa shili, olo loku ka kala nomwenyo waalushe wa wanenena mounyuni omo “tamu ka kala ouyuki.” (2 Petrus 3:13) Kalunga ketu oha ungaunga nafye monghedi ya tya ngaho molwaashi ouyuki waye ohau mu linyengifa a tale nghee ta dulu oku tu xupifa ponhele yoku tu tokola. Doshili, okushiiva nawa kutya ouyuki waJehova owa kwatela mo shike otashi tu ehenifa popepi naye. Momatukulwa taa landula, ohatu ka konakona moule nghee Jehova ha ulike oukwatya oo wa tongomana.