OSHILESHWA 42
Ombiibeli oya popya shike shi na sha nohombo nosho yo okukala ino hombola, ile ino hombolwa?
Momaputuko amwe, ovanhu ova itavela kutya omunhu ita dulu okukala a hafa, shapo ongeenge a hombola, ile a hombolwa. Ashike havalihomboli aveshe va hafa nosho yo kutya haaveshe ovo inava ya mohombo inava hafa. Oushili oyoo kutya Ombiibeli oya popya kutya okukala ino hombola, ile ino hombolwa nosho yo ohombo oi li oshali.
1. Ouwa ulipi hau di mokukala ino hombola, ile ino hombolwa?
Ombiibeli oya ti: “Ou ta hombola ota ningi nawa, naau ita hombola ota ningi nawa unene.” (Lesha 1 Ovakorinto 7:32, 33, 38.) Omeityo lilipi omunhu oo ina hombola ‘ta ningi nawa unene’? Ovakriste ovo inava hombola, ile inava hombolwa ihava kala ve na oshinakuwanifwa shokufila oshisho eemhumbwe dookaume kopahombo. Onghee hano, ohava kala ve na emanguluko lihapu. Pashihopaenenwa, vamwe ohava dulu okutamununa mo oukalele wavo meenghedi dihokwifa, ngaashi okuya koitukulwa imwe va ka udife onghundana iwa. Komesho yaaishe, ohava dulu okulongifa efimbo lavo lihapu va ehene popepi elela naJehova.
2. Ouwa ulipi hau di mokukala wa hombola, ile wa hombolwa paveta?
Ohombo ohai eta omauwa e likalekelwa, ngaashi ashike okukala ino hombola, ile ino hombolwa. Ombiibeli oya ti kutya “vavali ve dule umwe.” (Omuudifi 4:9) Osho oshoshili, unene tuu ngeenge Ovakriste ohava tula moilonga omafinamhango Ombiibeli mohombo yavo. Ovalihomboli, ovo va hombola paveta, ohava udaneke kutya otava ka kala ve holafane, va fimanekafana nokufilafana oshisho. Oshidjemo, luhapu ohava kala ve udite va amenwa shi dulife ashike okukala pamwe. Ounona vavo navo otava ka kala ve udite va amenwa.
3. Jehova okwa tala ko ngahelipi ohombo?
Eshi Jehova a hombolifa ovalihomboli votete, okwa ti: “Omulumenhu oku na okufiya po xe naina nokukanyatela komukainhu waye.” (Genesis 2:24) Jehova okwa hala omushamane nomukulukadi va kale ve holafane nokukala pamwe ofimbo ve li momwenyo. Okwa pitika ashike eteyohombo, ngeenge kaume kopahombo umwe okwa i moluhaelo. Monghalo ya tya ngaho, Jehova okwa pitika kaume kopahombo, oo ehe na ondjo, a tokole ngeenge ota teya ohombo, ile hasho. a (Mateus 19:9) Jehova ina pitika nande Ovakriste va hombole ombada.— 1 Timoteus 3:2.
KONAKONA MOULE
Lihonga nghee to dulu okukala wa hafa nosho yo nghee to dulu okuhafifa Jehova, kutya nee ou li mohombo, ile ino ya mohombo.
4. Longifa nawa oshali yokukala ino hombola, ile ino hombolwa
Jesus okwa li a tala ko okuhaya mohombo ku li oshali. (Mateus 19:11, 12) Lesha Mateus 4:23, ndele tamu kundafana epulo tali shikula:
-
Jesus okwa li a longifa ngahelipi oshali yokukala ina hombola, opo a longele Xe nokukwafela vamwe?
Ovakriste, ovo inava hombola, ile inava hombolwa, otava dulu okulongifa nawa onghalamwenyo yavo ngaashi Jesus. Dana OKAVIDIO, ndele tamu kundafana epulo tali shikula.
-
Ovakriste, ovo inava hombola, ile inava hombolwa, otava dulu okulongifa ngahelipi onghalamwenyo yavo nomupondo?
Owe shi shiiva tuu?
Ombiibeli inai popya kondadalunde kutya omunhu oku na okukala e na omido ngapi, opo a kale a wana okuya mohombo. Ashike otai ladipike omunhu a teelele a ‘pite monhemo younyasha,’ efimbo olo omahalo opamilele haa kala e na eenghono notaa dulu oku mu ningifa a ninge omatokolo ehe li mondjila.— 1 Ovakorinto 7:36.
5. Hoolola kaume koye kopahombo pandunge
Okuhoolola kaume kopahombo olimwe lomomatokolo a fimanenena, oo omunhu ha ningi. Lesha Mateus 19:4-6, 9, ndele tamu kundafana epulo tali shikula:
-
Omolwashike Omukriste ehe na okutondokela mohombo?
Ombiibeli otai dulu oku ku kwafela u mone ngeenge omunhu, oo to diladila mu hombole naye, oku na omaukwatya taa wapalele. Komesho yaaishe, konga kaume kopahombo oo e hole Jehova. b Lesha 1 Ovakorinto 7:39 nosho yo 2 Ovakorinto 6:14, ndele tamu kundafana omapulo taa shikula:
-
Omolwashike tu na ashike okuhombolafana nOvakriste vakwetu?
-
Ngeenge otwa i mohombo nomunhu, oo ehe hole Jehova, mbela Jehova ota ka kala e shi uditile ngahelipi?
Ngeenge oinamwenyo ivali, oyo ya yoolokafana, oya tulwa kondjoko imwe, otai ka longa noudjuu. Sha faafana, Omukriste oo ta hombola, ile ta hombolwa komunhu, oo ehe fi Ondombwedi, ota ka shakeneka omaupyakadi mahapu
6. Kala wa tala ko ohombo ngaashi Jehova he i tale ko
MuIsrael shonale, ovashamane vamwe ova li hava teya ohombo novakulukadi vavo omolwomatomheno okuliholamwene. Lesha Malakia 2:13, 14, 16, ndele tamu kundafana epulo tali shikula:
-
Omolwashike Jehova e tonde eteyohombo lihe li pauyuki?
Oluhaelo nosho yo eteyohombo ohai yahameke kaume kopahombo, oo ehe na ondjo, nosho yo ounona
Dana OKAVIDIO, ndele tamu kundafana epulo tali shikula.
-
Ngeenge owa hombola, ile owa hombolwa kuumwe oo ehe fi Ondombwedi yaJehova, oshike to dulu okuninga po, opo ohombo yeni i pondole?
7. Tula moilonga omafinamhango aJehova e na sha nohombo
Omunhu otashi dulika a pumbwa okuninga eenghendabala da mana mo, opo a tule moilonga omafinamhango aJehova e na sha nohombo. c Jehova oha nangeke noupuna ovo hava ningi ngaho. Dana OKAVIDIO.
Lesha Ovaheberi 13:4, ndele tamu kundafana omapulo taa shikula:
-
Mbela eshi to diladila, omafinamhango aJehova e na sha nohombo oku li ngoo pandjele? Omolwashike to tile ngaho?
Molwaashi moilongo ihapu omapangelo okwa teelela ovanhu va shangife eehombo davo nomateyohombo, Jehova okwa teelela Ovakriste va dulike koiteelelwa ya tya ngaho. Lesha Titus 3:1, ndele tamu kundafana epulo tali shikula:
-
Ngeenge owa hombola, ile owa hombolwa, mbela owa shilipaleka ngoo kutya ohombo yeni oi li paveta?
UMWE OTASHI DULIKA A PULE KUTYA: “Omolwashike tu na okuhombola? Mbela ovanhu itava dulu ashike okukala ve li pamwe, nande inava hombola?”
-
Ove oto ti ngahelipi?
ENGONGO
Okuhaya mohombo nosho yo ohombo oi li oshali ya dja kuJehova. Kutya nee omunhu oku li mohombo, ile hasho, ota dulu okukala a hafa noku udite ombili, shimha ashike ta longele Jehova.
Eendululo
-
Ongahelipi omunhu ta dulu okulongifa nawa onghalamwenyo yaye, nande ina hombolwa, ile ina hombola?
-
Omolwashike Ombiibeli ya ti natu hombolafane ashike nOvakriste vakwetu?
-
Etomheno lopamishangwa limwe alike lilipi tali pitike omunhu a dule okuteya ohombo?
TALA OUYELELE WA WEDWA PO
Okuhombola ‘ashike mOmwene’ osha hala okutya shike?
“Omapulo a dja kovaleshi” (Oshungonangelo, 1 Juli 2004)
Tala ouvidio vavali vaxupi ovo tava dulu oku ku kwafela u ninge omatokolo e li pandunge e na sha nokweendelafana nosho yo ohombo.
Tala kutya omolwashike omumwatate umwe a li e udite kutya osho Jehova e mu pa oshi na ongushu shi dule oinima aishe oyo a efa po.
Oinima imwe ilipi omunhu a pumbwa okukaleka momadiladilo, ngeenge ta diladila okuteya ohombo, ile okutopoka?
“Fimaneka ‘eshi Kalunga e shi tula kumwe’” (Oshungonangelo, Desemba 2018)
a Tala omafatululo oitya, oshitwa 4 shi na sha nokutopoka, nonande kape na oo a ya moluhaelo.
b Momaputuko amwe, ovadali ovo hava kongele ovana vavo ookaume kopahombo. Meenghalo da tya ngaho, ovadali ovanahole ihava tale ashike ngeenge omunhu oku na oimaliwa, ile kutya oku na ondodo ya tya ngahelipi momudingonoko, opo a ninge kaume kopahombo ta wapalele, ndele ohava tale ngeenge oku hole ngoo Jehova, ile hasho.
c Ngeenge ou li naumwe, oo inamu hombola naye, oshi li etokolo lopaumwene kutya oto mu efa po, ile otamu hombola.
Otashi dulika yo u hafele oikundafanwa ei
OMAPULO OO HAA PULWA LUHAPU
Ekonakonombiibeli olo hali ningwa kEendombwedi daJehova oshike?
Peenghundafana doshali odo hadi ningwa kEendombwedi daJehova, oto dulu okulongifa etoloko lOmbiibeli keshe. Owa manguluka okushiva oukwaneumbo weni aushe, ile keshe umwe oo wa hala a kale po.
