Ovanhu ashike vanini ve na elihumbato liwa. Ovanaudu, ovo ve na eenghedi dii, ohava hanyaukile eendokotola; ovanhu, ovo hava li meerestouranda, ohava ungaunga novanailonga monghedi ihe fi yefimaneko; ovatwaalelwa meedila, ovo vehe na elandulafano, ohava ula ovanailonga ovo hava kwafele meedila omalaka mai; ounona, ovo ihava dulika, ohava sheke ovahongi kofikola, have va ningile omatilifo noku va lwifa; ovanapolotika vamwe ohave lihumbata monghedi inai koshoka, ofimbo vamwe hava kendabala okuulika kutya ove na elihumbato liwa.

 Ombiibeli oi li ewiliko li shii okulineekelwa li na sha nokukala nelihumbato liwa. Oya yelifa yo kutya omolwashike ovanhu vahapu ve na elihumbato lii kunena.

 Okuhakala nelihumbato liwa nosho yo eenghedi, oshi li apeshe mounyuni.

•   Metwokumwe nomaetepo ovakwashiwana, oo opo a ningwa, Ovaamerica ova popya kutya ovanhu vahapu moUnited States ove na elihumbato la xutuka neenghono shi dulife nale, konima yomido 22 da ya.

•   Momakonakono vali amwe omo ovanhu ve dulife 32 000, va dja moilongo 28, va kufa ombinga, eepelesenda 65 oda popya kutya ovanhu ashike vanini ve na elihumbato liwa kunena.

 Ombiibeli oya xunganeka elihumbato olo tu wete kunena.

•   ‘Kala u shi shii kutya momafiku axuuninwa otapa ka kala omafimbo madjuu okukaliwa muo. Osheshi ovanhu otava ka kala ve lihole vo vene, ovanalwisho voimaliwa, ovalitangi, ovalinenepeki, ovasheki, ihava dulika kovadali, vehe shii okupandula, . . . vehe na elipangelo, novakwanyanya.’ — 2 Timoteus 3:1-3, Etoloko lounyuni mupe.

 Opo u mone ouyelele muhapu u na sha nanghee exunganeko olo tali wanifwa po, lesha oshitukulwa “Did the Bible Predict the Way People Think and Act Today?”

 Ovanhu vahapu mounyuni ove na elihumbato la xutuka, ashike ovanhu omamiliyona ova tala ko Ombiibeli i li ewiliko la denga mbada, olo tali kwafele ovanhu va kale nelihumbato liwa. Omayele ayo mawa e na sha neenghedi ‘otaa kalelele fiyo alushe.’ (Epsalme 111:8, KB-13) Tala koihopaenenwa inini tai shikula:

•   Osho Ombiibeli tai ti: “Keshe osho mwa hala ovanhu ve mu ningile, osho mu va ningila yo.” — Mateus 7:12.

   Sha hala kutya: Otu na okuungaunga navakwetu nonghenda nonefimaneko, ngaashi ashike twa hala va ungaunge nafye.

•   Osho Ombiibeli tai ti: “Onghee hano efeni oipupulu, popyeni oshili keshe tuu namukwao.” — Ovaefeso 4:25, KB-13.

   Sha hala kutya: Otu na okukala ovanashili mu keshe osho hatu popi nohatu ningi.

 Opo u mone ouyelele muhapu u na sha noshikundafanwa eshi, alikana lesha:

•   Oshunganangelo i na oshipalanyole “Osho shi li mondjila naasho sha puka — Ewiliko olo to dulu okulineekela.”

•   Oshitukulwa “Fimaneka etaleko lavamwe — Nghee Ombiibeli tai dulu oku tu kwafela.”