Hamushangandjai wOiwana ya Hangana, António Guterres, okwa popya molaporta i na sha nokulunduluka kwonghalo yomhepo mo 4 Aprili 2022 a ti: “Ovanhu otava ningi oinima ihapu oyo mafiku tai ka naipika onghalo yomhepo. Oilando inene otai ka ningina koshi yomeva, oupyu otau ka hapupala, tapa ka kala oikungulu itilifa, omeva mayela otaa ka kala a pumba, nomaludi mahapu oimeno noinamwenyo itaa ka kala po vali. Osho kashi fi ashike omupopyo wongaho, ndele otashi ka ningwa shili. Ovanongononi osho va ti ngaho, ngeenge omapangelo itaa lundulula omilandu di na sha nokulongifwa kweedjo domeshito.

 Oshifokundaneki sho-The New York Times sho 15 Juni 2022, koshi yoshitukulwa “Flooding Chaos in Yellowstone, a Sign of Crises to Come,” osha ti: “Ovanongononi ova londwela kutya mafiku eeparka doinamwenyo 423 domoUnited States otadi ka kala moshiponga, omolwonghalo yomhepo ipyu oyo tai ende nokulonda. Oinima ii oyo tai ningwa kunena ongaashi oyo twa lesha mOmbiibeli: omapeya noikungulu, oma-ice taa hengumuka, omeva efuta taa londo pombada nonghalo yomhepo ipyu.”

 Mbela omaupyakadi e na sha nonghalo yomhepo kedu oku na ngoo fiku a kandulwe po? Ngeenge osho, olye te ke a kandula po? Tala osho Ombiibeli tai ti.

 Ombiibeli oya ti kutya Kalunga ota ka “hanauna po ovo tava nyono edu.” (Ehololo 11:18) Ovelishe oyo yOmbiibeli otai tu hongo oinima itatu:

1.  1. Eenghatu dovanhu otadi ka nyona edu meendelelo.

2.  2. Okunyonwa kwedu otaku ka xula.

3.  3. Kalunga oye ta ka xulifa po omaupyakadi e na sha nonghalo yomhepo kedu, ndele havanhu.

 Ombiibeli oya popya kutya “edu otali kala po fiyo alushe.” (Omuudifi 1:4) Otaku kala alushe ovanhu.

•   “Ovayuki, vo otava ka fyuulula oshilongo, ndele tava kala mo alushe.” — Epsalme 37:29.

 Edu otali ka kala ngaashi la li pehovelo.

•   “Ombuwa nomalondo otaa ka hafa, nofuka tai ka nyakukwa pombada, otai liwapaleke ngaashi onhemo yedo.” — Jesaja 35:1.