Ovanhu mounyuni aushe otave lididimikile oupyu wa londa pombada nosho yo oiponga ikwao yopaushitwe, oyo tai etifwa koupyu. Tala keelaporta tadi shikula:

•   Ehangano lo-National Oceanic and Atmospheric Administration, U.S. Department of Commerce ola kundaneka mo 13 Juli 2023, la ti: “Oupyu oo wa li ko muJuni odula ei inau monika nande onale mondjokonona oule womido 174, okudja eshi ovanhu va hovela okukonakona onghalo yomhepo.”

•   Ehangano lo-European Space Agency ola popya mo 13 Juli 2023, la ti: “Italy, Spain, France, Germany naPoland ova taalela oupyu wa londa pombada, oo taku tiwa otau ka kala pondjele youpyu 48°C, kokanhunhu Sicily naSardini. Onghalo yomhepo ya tya ngaho inai kundanekwa nande onale muEuropa alishe.”

•   Stefan Uhlenbrook, omukulunhu wehangano lo- Hydrology, water and cryosphere okwa li a popya pomutumba oo wa li wa ningwa kehangano lo-World Meteorological Organization, mo 17 Juli 2023, a ti: “Eshi oupyu tau ende nokulonda pombada, otwa teelela odula i kale tai loko neenghono shi dulife nale notwa teelela yo i etife oikungulu inene.”

 Mbela onghalo yomhepo ipyu neenghono oye ku limbililika? Natu tale osho Ombiibeli tai ti kombinga yaasho.

 Heeno. Oupyu wa londa pombada nosho eenghalo domhepo odo tadi ende nokunaipala otadi wanifa po osho Ombiibeli ya xunganeka shi na sha nefimbo letu. Pashihopaenenwa, Jesus okwa xunganeka kutya ohatu ka mona “omamoniko matilifi.” (Lukas 21:11) Eshi eenghalo domhepo tadi ende nokunaipala mounyuni aushe, osha ningifa vamwe va kale ve na oumbada kutya eenghatu dovanhu vamwe otadi dulu okuningifa edu li hanauke po.

 Ahowe. Kalunga okwa shita edu li li onhele yetu yaalushe yokukala; ita ka pitika nande ovanhu ve li hanaune po. (Epsalme 115:16; Omuudifi 1:4) Shikwao vali, okwa udaneka kutya ota ka ‘hanauna po ovo tava nyono edu.’ — Ehololo 11:18.

 Ombiibeli otai hongo kutya Kalunga ota ka amena edu liha hanaunwe po koiponga oyo hai holoka omolweenghatu dovanhu.

•   “[Kalunga] okwa lotifa oshikungulu; nomandudumo omakufikufi okwa mwena.” (Epsalme 107:29) Oku na eenghono dokupangela eenghono domeshito. Ota dulu okukandula po omaupyakadi, oo taa naipike onghalo yomhepo, oyo tai shi ningifa shidjuu kovanhu okukala kombada yedu.

•   “Ove wa yavelela edu, to li tutike, ndele oto li ningi la punapala unene.” (Epsalme 65:9) Kekwafo laKalunga, edu otali ka kala vali oparadisa.

 Opo u lihonge shihapu kombinga yaasho Ombiibeli ya udaneka shi na sha nokuwapekululwa kwedu, tala oshitukulwa “Who Will Save the Earth?”