ٴدىن دە اقشا تابۋدىڭ كوزى مە؟
دىندەردىڭ كوبىسى ادامدارعا قۇدايدى تانىپ-بىلۋگە كومەكتەسۋدىڭ ورنىنا، اقشا تابۋعا كوبىرەك ٴمان بەرەتىنىن بايقادىڭىز با؟ ولار ٵرتۇرلى تاۋارلاردى جارنامالاپ، ساتادى، ٴدىني قىزمەتتەرى ٷشىن اقى الادى. كوپ ٴدىنباسىلارىنىڭ الاتىن جالاقىسى وتە جوعارى، ولار شالقىپ ٶمىر كەشەدى. سوعان بىرنەشە مىسال:
جۋرناليستەر جۇرگىزگەن ٴبىر زەرتتەۋ بويىنشا، ٴبىر كاتوليك ەپيسكوپى 13 جىل بويى شىركەۋگە تۇسكەن قاراجاتتى پايدالانىپ كەلگەن. ول سول اقشاعا 150 رەتتەي ٶزىنىڭ جەكە ۇشاعىمەن جانە 200 رەتتەي ليمۋزينمەن ساياحاتتاپتى. سونداي-اق 4 ميلليوننان استام دوللاردى شىركەۋدەگى ٷيىن جوندەۋگە جۇمساعان.
افريكانىڭ ٴبىر ەلىندە تۇراتىن ۋاعىزداۋشى ۇنەمى ٴدىني قىزمەتتەر وتكىزىپ تۇرادى. وعان ون مىڭداعان ادام قاتىسادى. ونىڭ ٴزاۋلىم شىركەۋىندە نەشە ٴتۇرلى تاۋارلار ساتىلادى: «قاسيەتتى مايدان» باستاپ، ٶزىنىڭ سۋرەتى بار سۇلگىلەر مەن فۋتبولكالارعا دەيىن. ٴدىني قىزمەتكە كەلەتىندەردىڭ باسىم كوپشىلىگى كەدەي تۇرادى، ال ٶزى بولسا شىرىگەن باي.
قىتايدا بۋدديستەردىڭ ٴتورت كيەلى تاۋىنىڭ ەكەۋى كوممەرسيالىق ۇيىم رەتىندە تىركەلگەن. ال اتاعى جەر جارعان شاولين عيباداتحاناسىن ناعىز بيزنەستىڭ ورداسى دەۋگە بولادى. ونىڭ باسىندا تۇرعان كىسى جۇرتقا «موناح-بيزنەسمەن» دەپ ايگىلى.
امەريكاداعى كوپتەگەن كومپانيالار مەن فيرمالاردا ٴدىني قىزمەت اتقاراتىن كەڭەسشىلەردى جالداۋ سانگە اينالدى. ٴبىر ەسەپكە ساي، ولار كومپانيالارعا جەكە وزدەرىنىڭ ٴدىني راسىمدەرىن ويلاپ شىعارۋعا كومەكتەسەدى. سونداي-اق سول جەردە ىستەيتىندەرگە باسقا دا ٴتۇرلى ٴدىني قىزمەتتەر كورسەتەدى.
دىندەردىڭ بارعان سايىن بيزنەسكە اينالىپ بارا جاتقانىنا ٴسىز قالاي قارايسىز؟ «ٴدىني قىزمەتتەرى ٷشىن اقشا العان ادامدارعا قۇداي قالاي قارايدى؟» دەپ ويلانىپ كورگەنسىز بە؟
ٴدىندى بيزنەسكە اينالدىرىپ جۇرگەندەرگە قۇداي قالاي قارايدى؟
قۇدايعا بۇل ەش ۇنامايدى. مۇنى كيەلى كىتاپتان بىلەمىز. مىسالى، قۇداي بۇرىن «اقىعا ٴتالىم بەرگەن» ٴدىني قىزمەتكەرلەرگە قاتتى نارازى بولعان (ميحا 3:11). سونداي-اق وعان عيبادات ەتكەن ورىندى «قاراقشىلاردىڭ ورداسىنا اينالدىرعان» اشكوز ٴدىني ساۋداگەرلەردى ايىپتاعان (ەرەميا 7:11).
يسا پايعامباردىڭ دا ٴدىندى تابىس كوزى ەتكەندەرگە اشۋى كەلگەن. ونىڭ كۇندەرىندە ٴدىني جەتەكشىلەر تويىمسىز ساۋداگەرلەرگە يەرۋساليمدەگى عيباداتحانادا ساۋدا-ساتتىق جاساۋعا رۇقسات بەرگەن. ال وزدەرى سولاردىڭ ەسەبىنەن پايدا كورىپ وتىرعان. ساتۋشىلار بولسا قۇدايعا عيبادات ەتۋگە كەلگەن اقجۇرەكتى قاراپايىم ادامداردى توناعان. يسا وسى ايلاكەر ساۋداگەرلەرگە: «اكەمنىڭ ٷيىن بازارعا اينالدىرۋدى دوعارىڭدار!»— دەپ، ولاردى عيباداتحانادان قۋىپ شىققان (جوحان 2:14—16).
يسا پايعامباردىڭ قۇدايعا قالاي قىزمەت ەتكەنىن دە ايتىپ وتپەسكە بولماس (جوحان 8:28، 29). ول قۇداي جايلى ۇيرەتكەنىنە ادامداردان ەشقاشان اقشا العان ەمەس. جاساعان تاڭعاجايىپ كەرەمەتتەرى ٷشىن دە، مىسالى، قارنى اشتاردى تويدىرعانى، اۋرۋلاردى ساۋىقتىرعانى جانە ولگەندەردى تىرىلتكەنى ٷشىن بىردە-ٴبىر تيىن سۇراماعان. قۇدايعا دەگەن قۇلشىلىعىنىڭ ەسەبىنەن بايىپ الۋ ونىڭ ويىنا دا كىرىپ-شىقپاعان. و تۇگىل، ونىڭ ٴتىپتى ٶز ٷيى بولماعان (لۇقا 9:58).
يسانىڭ I عاسىرداعى ٸزباسارلارى ٴدىندى تابىس كوزى ەتپەگەن
يسا پايعامبار ٶزىنىڭ ٸزباسارلارىنا ٴدىني قىزمەتتەرى ٷشىن ەشقاشان اقى الماۋلارى كەرەكتىگىن ايتىپ: «تەگىن الدىڭدار،— تەگىن بەرىڭدەر»،— دەگەن بولاتىن (ماتاي 10:8). سول ەرتەدەگى ٸزباسارلار وسى بۇيرىققا قۇلاق اسقان. سونىڭ بىرنەشە مىسالىن كورەيىك:
ٴبىر كۇنى شيمون دەگەن كىسى يسانىڭ ەلشىلەرىنىڭ ٴبىرى پەتىرگە اقشا ۇسىنادى. ول بيلىك پەن دارەجەنى ساتىپ العىسى كەلەدى. ٴبىراق ەلشى پەتىر ونىڭ ۇسىنىسىنان بىردەن باس تارتىپ: «قۇدايدىڭ سيىن اقشاعا ساتىپ الامىن دەپ ويلاعانىڭ ٷشىن اقشاڭ وزىڭمەن بىرگە قۇرىپ كەتسىن!»— دەپ قاتتى ايتىپ تاستايدى (ەلشىلەردىڭ ىستەرى 8:18—20).
ەلشى پاۋىل كوپ جەردى ارالاپ قىزمەت ەتكەن. جىلدار بويى ول كوپتەگەن قاۋىمعا ايانباي كومەكتەسسە دە، ەڭبەگى ٷشىن ەشقاشان اقى سۇراماعان. پاۋىل دا، قاسىنداعى سەرىكتەرى دە «قۇداي ٴسوزىنىڭ ساۋداگەرلەرى» بولماعان (قورىنتتىقتارعا 2-حات 2:17). قايتا، پاۋىل بىلاي دەپ ايتقان: «كوپ شىعىنعا ۇشىراتىپ، ەشقايسىسىڭا اۋىرتپالىق سالماۋ ٷشىن كۇنى-ٴتۇنى جۇمىس ىستەي ٴجۇرىپ، سەندەرگە قۇدايدىڭ ىزگى حابارىن ۋاعىزدادىق» (سالونيكالىقتارعا 1-حات 2:9).
ارينە، ەرتەدەگى يسانىڭ شاكىرتتەرىنە ىزگى حاباردى ايتۋ ٷشىن جانە قايىرىمدىلىق ىستەرىن جاساۋ ٷشىن قاراجات كەرەك بولمادى ەمەس، كەرەك بولدى. ٴبىراق ولار قۇدايعا عيبادات ەتۋگە كومەكتەسكەندەرى ٷشىن جۇرتتان ەشقاشان اقشا تالاپ ەتپەگەن. ال كىمدە-كىم العىسىن قارجىلاي بىلدىرگىسى كەلسە، مىنا ەكى ٴپرينسيپتى ەسكەرگەن:
قورىنتتىقتارعا 2-حات 8:12: «قۇدايعا اسىرەسە شىن ىقىلاسپەن بەرىلگەن سي-تارتۋ ۇنامدى. ول ادامنىڭ قولدا جوعىنا ەمەس، بارىنا قاراي قابىلدايدى».
ٴمانى: ادامنىڭ قانشا بەرگەنى ەمەس، قانداي نيەتپەن بەرگەنى ماڭىزدى.
قورىنتتىقتارعا 2-حات 9:7: «اركىم جۇرەك شەشىمىنە قاراي، ەش قينالماي، زورلىقسىز بەرسىن، سەبەبى قۇداي قۋانىشپەن بەرەتىندەردى جاقسى كورەدى».
ٴمانى: قۇداي ادامنىڭ ساداقانى قينالىپ، ٶز-ٶزىن ماجبۇرلەپ بەرگەنىن قالامايدى. ال ادام ٶزى قالاپ، شىن جۇرەكتەن بەرسە، بۇعان رازى بولادى.
اقشاعا تويمايتىن دىندەرمەن تاياۋدا نە بولادى؟
كيەلى كىتاپتا دىندەردىڭ ٴبارى بىردەي قۇدايعا ۇناي بەرمەيتىنى انىق ايتىلعان (ماتاي 7:21—23). ونداعى ٴبىر پايعامبارلىقتا بارلىق جالعان ٴدىن جەزوكشەگە تەڭەلگەن. سەبەبى ولار اقشانى جانە باسقا دا پايدانى كوزدەپ، ۇكىمەتتەرمەن وداقتاسىپ، اۋىز جالاسادى. ولار قاراپايىم حالىقتىڭ قالتاسىن قاعادى (ايان 17:1—3؛ 18:3). ٴبىراق سول پايعامبارلىقتا قۇداي تاعالا جاقىندا بۇكىل جالعان ٴدىندى جاۋاپقا تارتاتىنى دا ايتىلعان (ايان 17:15—17؛ 18:7).
قازىر بولسا جالعان دىندەر ادامداردى الداپ، قۇدايدان الشاقتاتۋدا (ماتاي 24:11، 12). ال قۇداي جۇرەگى تازا ادامداردى وعان قالاي دۇرىس عيبادات ەتۋ كەرەكتىگىن بىلۋگە جانە جالعان دىننەن كەتۋگە شاقىرادى (قورىنتتىقتارعا 2-حات 6:16، 17).
قىزىقتى بولار مالىمەتتەر
سەرگەك بولىڭدار!
ۋكرايناداعى ٴدىن مەن سوعىس. كيەلى كىتاپ بۇل جايلى نە دەيدى؟
ەكى جاقتاعى شىركەۋ باسشىلارى سوعىس ٶز ىقپالىن تەرىس قولدانۋدا. بۇدان ولار يسانىڭ شاكىرتتەرىنە بەرگەن وسيەتتەرىنە مويىنسۇنباي جاتقاندارى كورىنەدى.
كيەلى كىتاپ. سۇراقتار مەن جاۋاپتار
شىنايى ٴدىندى قالاي انىقتاي الاسىز؟
كيەلى كىتاپتا شىنايى ٴدىندى انىقتاۋعا بولاتىن 9 بەلگى بار.
كيەلى كىتاپ. سۇراقتار مەن جاۋاپتار
ۇلى بابىل دەگەن نە؟
كيەلى كىتاپتا ول جەزوكشە جانە قالا دەپ اتالادى.
كيەلى كىتاپ. سۇراقتار مەن جاۋاپتار
ادامنىڭ قانداي دا ٴبىر ٴدىني ۇيىمنىڭ مۇشەسى بولۋى شارت پا؟
ەشقايدا بارماي-اق، ٶز بەتىمىزشە اتقارعان عيباداتىمىزدى قۇداي قابىل قىلا ما؟
