باۋىرلاستار ولاردى ىسپەن ٴسۇيدى
گۆاتەمالاداعى ٴبىر كىشكەنتاي اۋىلدا يومارا، مارسەلو جانە ايۆەر دەگەن ٷش باۋىر تۇرادى. اپكەلەرى يومارا ٴبىرىنشى بولىپ كيەلى كىتاپتى زەرتتەۋ ساباعىن باستايدى. ال ارتىنان ەكى ٸنىسى دە قوسىلادى. ٴبىراق ولاردىڭ ۇشەۋى دە زاعيپ بولاتىن جانە برايل قارپىن دە تانىمايتىن. سوندىقتان ولارمەن زەرتتەيتىن باۋىرلاس كىتاپتى دا، تارماقتاردى دا ٶزى وقىپ بەرەتىن.
ولارعا قيىنعا سوققان تاعى ٴبىر ماسەلە قاۋىم كەزدەسۋلەرىنە بارۋ ەدى. سەبەبى ەڭ جاقىن دەگەن پاتشالىق سارايىنىڭ ٶزى 40 مينۋتتىق جەردە ورنالاسقان بولاتىن. ٴبىراق ەر باۋىرلاستار ولاردى قاۋىم كەزدەسۋلەرىنىڭ ەشقايسىسىنان قالدىرماي، اپارىپ-اكەلۋدىڭ قامىن جاسادى. ال ۇشەۋى قاۋىم كەزدەسۋىندە تاپسىرمالارمەن شىعا باستاعاندا، قاۋىمداعىلار ولارعا ايتاتىن سوزدەرىن جاتتاۋعا كومەكتەسەتىن.
2019-جىلدىڭ مامىر ايىندا ولاردىڭ اۋىلىندا دا قاۋىم كەزدەسۋلەرى وتەتىن بولدى. سول ۋاقىتتارى بۇل اۋىلدا باسقا جەردەن كوشىپ كەلگەن ٴبىر تۇراقتى ٸزاشار ەرلى-زايىپتى تۇرىپ جاتتى. ولار برايل قارپىن بىلمەسە دە، وسى ٷش باۋىرعا سول قارىپتە وقىپ-جازۋدى ۇيرەتەيىك دەپ بەل بۋادى. ٴسۇيتىپ، ەكەۋى كىتاپحاناعا بارىپ، كوزى كورمەيتىن جاندارعا برايل قارپىن ۇيرەتۋ تۋرالى ادىستەمەلىك قۇرالداردى وقىپ-زەرتتەيدى.
مارسەلو قاۋىمدا جاۋاپ بەرىپ جاتىر
يومارا، مارسەلو جانە ايۆەر بىرنەشە-اق ايدىڭ ىشىندە برايل قارپىمەن وقۋدى مەڭگەرىپ الدى. سونىڭ ارقاسىندا ولار رۋحاني جەتىستىكتەرگە جەتە باستادى. قازىر ۇشەۋى دە — تۇراقتى ٸزاشار. مارسەلو قىزمەت كومەكشىسى بولدى. ولار بۇكىل اپتا بويى رۋحاني ىستەردى الدىنا جان سالماي اتقارادى. ولاردىڭ جالىندى قۇلشىنىسى باسقالارعا دا جۇعىستى بولىپ جاتىر.
بۇل ٷش اعايىندىنىڭ قاۋىمنىڭ كورسەتكەن سۇيىسپەنشىلىگى مەن قولداۋىنا دەگەن العىستارى شەكسىز. «العاش كەزدەسكەننەن-اق ٴبىز كۋاگەرلەردىڭ شىنايى ماسىحشىلىك سۇيىسپەنشىلىگىنە بولەنىپ كەلەمىز»،— دەيدى يومارا. ال مارسەلو بولسا: «ٴبىز وسى قاۋىمنان كەرەمەت دوستار تاپتىق. سونداي-اق ٴبىر-ٴبىرىن باۋىرداي جاقسى كورەتىن دۇنيەجۇزىلىك باۋىرلاستىقتىڭ مۇشەسى ەكەنىمىزگە قۋانىشتىمىز»،— دەدى. يومارا مەن ىنىلەرى جەر بەتىنىڭ جۇماققا اينالعانىن ٶز كوزدەرىمەن كورۋدى اڭسايدى (ٴزاب. 37:10، 11؛ يشايا 35:5).
