7-ساباق
قۇداي پاتشالىعى دەگەن نە؟
1. قۇداي پاتشالىعى دەگەن نە؟
نەگە يسانى ەڭ جاقسى پاتشا دەۋگە بولادى؟ (مارقا 1:40—42).
قۇداي پاتشالىعى — جەردەگى بارلىق ۇكىمەتتەردىڭ ورنىن باساتىن كوكتەگى ۇكىمەت. قۇداي وسى ۇكىمەت ارقىلى ٶزىنىڭ ەركىن كوكتە دە، جەردە دە جۇزەگە اسىرادى. جۋىردا قۇداي پاتشالىعى ادامداردىڭ كوڭىلىنەن شىعاتىن ەڭ جاقسى بيلىك قۇرماق. ول جەر بەتىندەگى بارلىق ادامداردىڭ باسىن بىرىكتىرەدى. قۇداي پاتشالىعى تۋرالى وسى حابار شىنىمەن دە قۋانىشتى ەمەس پە؟ (دانيال 2:44؛ ماتاي 6:9، 10؛ 24:14 وقىڭىز).
كەز كەلگەن ۇكىمەتتىڭ باسشىسى بولاتىنى سياقتى، كوكتەگى ۇكىمەتتىڭ دە بيلەۋشىسى بار. ەحوبا قۇداي ٶز پاتشالىعىنىڭ بيلەۋشىسى ەتىپ رۋحاني ۇلى يسا ٴماسىحتى تاعايىندادى. (ايان 11:15 وقىڭىز).
«قۇداي پاتشالىعى دەگەن نە؟» دەگەن بەينەروليكتى كورىڭىز.
2. نەگە يسا ەڭ جاقسى پاتشا؟
يسا ەڭ جاقسى پاتشا، ويتكەنى ول مەيىرىمدى جانە ٵدىل نورمالاردى بەرىك ۇستانادى (ماتاي 11:28—30). سونداي-اق ول كوكتەن بۇكىل جەر بەتىنە بيلىك جۇرگىزەتىندىكتەن، ونىڭ ادامدارعا كومەكتەسۋگە قۇدىرەتى جەتەدى. ول قايتا تىرىلگەننەن كەيىن، كوككە كوتەرىلگەن بولاتىن. سودان پاتشا تاعىنا وتىرعانشا، قۇدايدىڭ وڭ جاعىندا كۇتىپ وتىردى (ەۆرەيلەرگە 10:12، 13). اقىرىندا، قۇداي وعان پاتشالىق بيلىگىن بەردى. (دانيال 7:13، 14 وقىڭىز).
3. يسامەن بىرگە كىمدەر بيلىك ەتەدى؟
يسا «قاسيەتتى حالىق» دەپ اتالاتىن توپپەن بىرگە كوكتە بيلىك جۇرگىزەدى (دانيال 7:27). جەردە بولعان كەزىندە يسا شاكىرتتەرىنىڭ اراسىنان كىشىگىرىم توپتى جيناپ، ولاردى ەلشىلەر دەپ اتادى. وسى ادال ەلشىلەر قاسيەتتىلەرگە جاتاتىنداردىڭ ەڭ العاشقىلارى بولىپ تاڭدالدى. ەحوبا قۇداي ادال ەر ادامدار مەن ايەلدەر اراسىنان قاسيەتتىلەردى وسى كۇنگە دەيىن تاڭداپ كەلەدى. ولار دا يسا سياقتى رۋحاني دەنەمەن ٴتىرىلىپ، كوكتە ٶمىر سۇرەتىن بولادى. (جوحان 14:1—3؛ قورىنتتىقتارعا 1-حات 15:42—44 وقىڭىز).
كوككە قانشا ادام بارادى؟ يسا ولاردى «كىشكەنە وتار» دەپ اتاعان (لۇقا 12:32). ولاردىڭ سانى 144000 دى قۇراماق. ولار يسامەن بىرگە جەر بەتىنە بيلىك جۇرگىزەتىن بولادى. (ايان 14:1 وقىڭىز).
4. يسا بيلىك ەتۋىن باستاعاندا قانداي وقيعالار ورىن الدى؟
قۇداي پاتشالىعى 1914-جىلدان باستاپ بيلىك ەتە باستادى *. پاتشا رەتىندە يسا ەڭ الدىمەن شايتان مەن ونىڭ جىن-پەرىلەرىن كوكتەن جەرگە لاقتىردى. سودان شايتان اشۋعا ٴمىنىپ، بار قاھارىن جەر بەتىندەگىلەرگە توكتى (ايان 12:7—10، 12). سول ۋاقىتتان بەرى ادام بالاسى قايعى-قاسىرەتتەن كوز اشپادى. سوعىس، اشتىق، ىندەتتەر، جەر سىلكىنىسى مەن زاڭسىزدىق جەردى جايلادى. مۇنىڭ ٴبارى پاتشالىقتىڭ جەر بەتىنە تولىق بيلىك جۇرگىزەتىن ۋاقىتىنىڭ تاياعانىن كورسەتەتىن «بەلگى» بولىپ تابىلادى. (لۇقا 21:7، 10، 11، 31 وقىڭىز).
5. قۇداي پاتشالىعى نەندەي ىستەردى اتقارىپ جاتىر؟
قۇداي پاتشالىعى دۇنيەجۇزى بويىنشا جۇرگىزىلىپ جاتقان ۋاعىزداۋ ٸسى ارقىلى قازىردىڭ وزىندە بارشا حالىقتان شىققان ۇلى جاماعاتتىڭ باسىن بىرىكتىرۋدە. وسى جاماعاتتى قۇرايتىن سان ميلليونداعان مومىن ادام يسانىڭ بيلىگىنە مويىنسۇنۋدى شەشتى. قۇداي پاتشالىعى وسى زۇلىم دۇنيەنى جويعاندا، ولاردى امان الىپ قالادى. ولاي بولسا، قۇداي پاتشالىعىنىڭ يگىلىگىن كورگىسى كەلەتىندەردىڭ بارلىعى يسانىڭ بيلىگىنە مويىنسۇنۋدى ۇيرەنگەندەرى دۇرىس. (ايان 7:9، 14، 16، 17 وقىڭىز).
يسا 1000 جىلدىق بيلىگى كەزىندە قۇدايدىڭ ادامزاتقا قاتىستى و باستاعى نيەتىن جۇزەگە اسىرادى. سوندا بۇكىل جەر بەتى جۇماققا اينالادى. اقىرىندا، يسا پاتشالىق بيلىگىن قايتادان قۇدايدىڭ وزىنە تاپسىرادى (قورىنتتىقتارعا 1-حات 15:24—26). قۇداي پاتشالىعى تۋرالى وسى قۋانىشتى حاباردى وزگەلەرگە ايتقىڭىز كەلەر مە ەدى؟ (ٴزابۇر 37:10، 11، 29 وقىڭىز).
^ 6-ابزاس كيەلى كىتاپتاعى قانداي پايعامبارلىقتاردىڭ 1914-جىلعا نۇسقايتىنىن ٴبىلۋ ٷشىن «كيەلى جازبالاردان نە بىلەمىز؟» باسىلىمىنىڭ 216—219 بەتتەرىن قاراڭىز.
