24-تاراۋ
قىزمەت اياسىن عاليلەيادا كەڭەيتتى
ماتاي 4:23—25 مارقا 1:35—39 لۇقا 4:42، 43
-
يسا ٴتورت شاكىرتىمەن عاليلەيادا ۋاعىزدادى
-
ۋاعىزى مەن كەرەمەتتەرى جايلى حابار كەڭ تارادى
قاپارناۋمدا يسا مەن شاكىرتتەرىنىڭ قولى كۇنى بويى بوسامادى. كەشكە جەرگىلىكتى حالىق وعان ناۋقاستارىن الىپ كەلدى. سوندىقتان يسانىڭ وڭاشا قالۋعا ۋاقىتى بولمادى.
تاڭعا جۋىق يسا تۇرىپ، جالعىز ٶزى سىرتقا شىعىپ كەتتى. ول اكەسىنە دۇعا ەتىپ الۋ ٷشىن، وڭاشا ٴبىر جەرگە باردى. ٴبىراق ۇزاق جالعىز قالا المادى. سەبەبى ونىڭ ۇيدە جوق ەكەنىن بايقاپ، «شيمون مەن قاسىنداعىلار ونى ىزدەپ شىقتى». يسا پەتىردىڭ قوناعى بولعاندىقتان، توپتى سول باستاسا كەرەك (مارقا 1:36؛ لۇقا 4:38).
يسانى تاۋىپ العاندا، پەتىر: «جۇرتتىڭ ٴبارى ٴسىزدى ىزدەپ ٴجۇر»،— دەدى (مارقا 1:37). قاپارناۋم تۇرعىندارى ونىڭ كەتپەگەنىن قالادى. ولار يسانىڭ ىستەرىنە ٴدان ريزا بولىپ، ودان «وزدەرىن تاستاپ كەتپەۋىن ٶتىندى» (لۇقا 4:42). الايدا يسانىڭ جەرگە كەلگەندەگى نەگىزى ماقساتى ادامداردى ساۋىقتىرۋ ما؟ ونىڭ قىزمەتى تەك وسى قالامەن شەكتەلمەك پە؟ بۇل جايلى يسانىڭ ٶزى نە دەدى ەكەن؟
يسا شاكىرتتەرىنە بىلاي دەپ جاۋاپ بەردى: «باسقا جەرلەرگە، جاقىن ماڭايداعى ەلدى مەكەندەرگە بارايىق. سول جەرلەردە دە ۋاعىزدايىن، سەبەبى مەن سول ٷشىن كەلدىم». ال وزدەرىمەن بىرگە قالۋدى وتىنگەن جۇرتقا ول: «قۇداي پاتشالىعى تۋرالى ىزگى حاباردى باسقا قالالاردا دا جاريالاۋىم كەرەك. ويتكەنى مەن سول ٷشىن جىبەرىلدىم»،— دەدى (مارقا 1:38؛ لۇقا 4:43).
راسىندا دا، يسانىڭ جەرگە كەلۋىنىڭ باستى سەبەبى — قۇداي پاتشالىعى تۋرالى ۋاعىزداۋ. ويتكەنى بۇل پاتشالىق بولاشاقتا اكەسىنىڭ ەسىمىن قاسيەتتى ەتەدى جانە ادامزاتتىڭ بار قيىندىعىن ٴبىرجولاتا شەشەدى. ال ادامداردى كەرەمەت تۇردە ساۋىقتىرۋ ارقىلى يسا ٶزىنىڭ قۇداي جىبەرگەن ادام ەكەنىن دالەلدەدى. عاسىرلار بۇرىن مۇسا دا تاڭعاجايىپ ىستەر جاساپ، قۇداي جىبەرگەن پايعامبار ەكەنىن كورسەتكەن بولاتىن (مۇسانىڭ 2-جازباسى 4:1—9، 30، 31).
سودان يسا باسقا قالالاردا دا ۋاعىزداۋ ٷشىن قاپارناۋمنان كەتتى. ٴتورت شاكىرتى وعان ەرىپ ٴجۇردى. ولار پەتىر مەن ونىڭ باۋىرى ٵندىر، جوحان مەن ونىڭ باۋىرى جاقىپ. وسىدان ٴبىر اپتا بۇرىن ولاردى يسا العاشقى ساپارىنا سەرىك بولۋعا شاقىرعان بولاتىن.
يسا مەن ٴتورت شاكىرتىنىڭ عاليلەياداعى ۋاعىز ساپارى كەرەمەت جەمىس بەردى! يسا تۋرالى حابار شالعاي ايماقتارعا دەيىن جەتتى. «ول تۋرالى حابار بۇكىل سيرياعا»، ون قالا ٶڭىرى دەكاپوليسكە جانە يوردان وزەنىنىڭ ارعى بەتىندەگى باسقا جەرلەرگە دە تارادى (ماتاي 4:24، 25). وسى ايماقتاردان جانە ياھۋدەيادان كەلگەن قالىڭ جۇرت يسا مەن ونىڭ شاكىرتتەرىنە ەردى. كوپ ادام وعان ناۋقاستارىن الىپ كەلىپ جاتتى. يسا ەشكىمنىڭ كوڭىلىن قالدىرماي، اۋرۋلاردى ساۋىقتىردى، بويىن جىن بيلەگەندەردى ازات ەتتى.
قىزىقتى بولار مالىمەتتەر
كيەلى كىتاپ. سۇراقتار مەن جاۋاپتار
قۇداي پاتشالىعى دەگەن نە؟
قۇداي پاتشالىعى نەگە ادامي ۇكىمەتتەردىڭ بارىنەن اسىپ تۇسەتىنى جايىندا ٴبىلىڭىز.
